MANOMBAH NAIBATA IBAGAS HASINTONGAN AMPA TONDUY

Ambilan 20 Oktober 2019

Johanes 4 : 21-26

1. Ambilan on aima parsahapan ni Tuhan Jesus pakon sahalak boru Samaria. Adong do tradisi panorang ai bahwa ianan martonggo pitah bani ianan tertentu. Domu hujin ipatorang Tuhan Jesus do sonaha martonggo atau parsombahon na sintong, nini: ‘seng be i dolog an atap i Jerusalem nasiam marsombah bani Bapa in’ (ay.21), Hunjon tangkas bahwa tang siporlunan sedo ianan parsombahon tapi ise na isombah do. Sedo bangunan fisik siporlunan tapi uhur ni kuria atap sipartonggo do. Soya do pori pe gareja jenges anggo hauhuron ni kuria lape sintong. On dihut mangajarhon bahwa bani ganup ianan do hita ningon marsombah bani Naibata marhitei uhur ampa parlahou. Naibata lang boi iklaim (‘ipenjarahon’) hita pitah marianan bani ianan tertentu halani bebas do Ia hadir bani haganup ianan. Ase porlunan do na isombah dari pada ianan parsombahon. 

UHUR NA ISONDANGI HATA NI NAIBATA

Sibasaon 20 Oktober 2019

Jesaya 2 : 2 – 5 

1. Sanggah panorang ni nabi Jesaya, halak Israel (na i Utara pakon Selatan) relatif mengalami kenyamanan baik secara ekonomi ampa keamanan pori pe adong ancaman humbani bangsa Asyur. Tapi goluh parugamaon ni sidea domma maseda halani isombah sidea do gana-gana janah rosuh mangkorjahon dosa (Jesaya 1:21-31). Pori pe mardalan ope ibadah i rumah panumbahan tapi lang be sinkron ibadah ai hubani goluh ni sidea ari-ari. Bani keadaan na sonin ipadas Naibata do hata-Ni marhitei nabi Jesaya ase ipaubah sidea uhurni ase ulang hasedaon ulih ni sidea. Singat-singat ai pataridahkon na holong do tong uhur ni Naibata hubani bangsa-Ni.

ULANG SALAH MAMILIH DALAN !

Ambilan 13 Oktober 2019

Psalmen 25 : 8 – 15 

1. Ambilan on patugahkon panandaion ni par-psalmen bani Naibata. Itanda janah ihaporsayai do Naibata  na markuasa paluahkon ampa mambobai jolma marhitei hata-Ni janah paridop ni uhur manasap dosa. Panandaion on lang sekedar hata tapi buah ni haporsayaon do. Bani ambilan on iakuhon parpsalmen na doyuk do ia halani dosani tapi ihaporsayai paridop ni uhur  do Naibata manasap dosani. Banggalan do idop ni uhur-Ni marimbang dosani. Halani ai nini ‘layak anjaha bonar do Jahowa, halani ai ipatuduh do dalan na pintor bani pardosa’ (ay.8). Itanda do dirini na gok hahurangan tapi ihaporsayai ihaholongi Naibata do ia marhitei na lang ipaturut ia torus iparseda dosa ai tapi ibere do dalan ase boi sirang ia humbani dosa. 

PAUBAH HAM MA UHURMU !

Sibasaon 13 Oktober 2019

Matius 21 : 28 – 32 

1. Domu hubani pangajaran ampa randa-tanda halongangan na ihorjahon Tuhan Jesus, heran do simbuei sonai age tokoh agama Jahudi. Halani ai sanggah mangajari Ia roh do sintua ni malim ampa pangintuai manungkun-Si, ‘Marhitei kuasa aha do ibahen Ham ganupan in? Mambalosi sungkun-sungkun ai ibobai Tuhan Jesus do uhur ni sidea hubani si Johanes (Pandidi) marhitei sungkun-sungkun, ‘ia pandidion ni si Johanes, na hunja do ai? hun nagori atas do atap humbani jolma?’ (ay.24-25). Sasintongni halak Jahudi mangakui do bahwa si Johanes aima nabi na iutus Naibata. Tapi pori pe iakui sidea anggo hasaksian ni si Johanes pasal Tuhan Jesus bahwa Ia aima Mesias Anak ni Naibata lang tarjalo sidea (3:11-17). Halani ai ma ase ibalosi sidea ‘Seng ibotoh hanami’ (ay.27). Hunjon tarbukti ma ketidak-jujuran ni sidea halani pori pe iakui sidea si Johanes roh humbani Naibata tapi bani kenyatan itulak sidea do hata na ipadas si Johanes pasal Tuhan Jesus sebagai Mesias.  

HOBAS MA BANI HORJA NI TUHAN !

Ambilan 06 Oktober 2019

Lahoan 20 : 21 – 31 

1. Ambilan on aima hata partadingan ni Paulus bani kuria na i Efesus pakon sintua na roh hun Miletus paima borhat ia hu Jerusalem. Tangkas do banta bahwa dob das Paulus i  Jerusalem itangkap ma ia. Bani ambilan on ipatugah Paulus do sonaha ia mandalankon horja haapostelonni. Domma isaksihon Paulus ambilan Na Madear in bani goluhni. Marsaksi (Jun. diamarturromai, marasal humbani hata martureo), artini: manaksihon ibagas ringgas ampa pongkut ni uhur (ay.21,23,24,25). Pongkut ni uhur ai do mambahen lang tarolat Paulus manaksihon Ambilan Na Madear i tongah-tongah ni ragam ni tali / ay.23 (Jun. desma), artini: hurungan, penjara pakon bagei ni sitaronon (jun. thlifseis). Pongkut ni uhur ai do homa mambahen Paulus lang marnaloja manaksihon Ambilan Na Madear arian pakon borngin marhasoman iluh-iluh (ay.31). Pongkut ni uhur ai do homa mambahen Paulus sirsir ibobai Tonduy Na Pansing bani horja parambilanonni sonai age na laho misir ia hu Jerusalem pori pe seng ibotoh aha na sihol masa bani ijai (ay.21). Artini, na marhorja bani diri ni Paulus lang be dirini tapi domma Naibata ibagas Tonduy. Ia lang sipanjua bani suruhan ampa horja na iondoskon Naibata. Hal on boi terjadi halani na menggerakon goluhni lang be uhur hajolmaonni tapi haporsayaonni do. Haporsayaonni mambahen ia mampu mangondoskon haganup goluhni ipakei Naibata. Goluhni Paulus lang be laho pasaudkon rosuhni sandiri tapi ase rosuh ni Naibata ipasaud marhitei dirini do. Halani ai na iutamahon Paulus bani goluhni lang be aha harosuh ni uhurni tapi aha na iharosuhkon Naibata bani dirini do. Halani ai iakuhon Paulus do bahwa na borsih do ia humbani sapata ni daroh ni sidea (ay.26). Artini, haganup na dob ijaloni humbani Naibata domma ipabotohkon hubani sidea (ay.27) lang adong na iponop-ponopkon halani alasan tertentu.

MARMALAS NI UHUR MA !

Sibasaon 06 Oktober 2019

Parambilan 3 : 1 – 14 

1. Buku Parambilan isuratkon anak ni Daud (1:1) na marisi hikmat laho mangajari jolma mangarusi pasal arti atau makna ni goluh. Terkenal do buku on bani ungkapan na buei manobut ‘sisoya-soya’ halani na laho salpu do haganup na i tanoh on. Bani ambilan on pe ipatugah do bahwa pagantih soluk do na masa bani goluh ni jolma (ay.1-9). Lang tarbaen songon na ibagas uhur haganup. Adong do panorang marmalas ni uhur tapi lang tarelakkon bani panorangni adong do homa pusok ni uhur. Domma homa gabe bangkou ni jolma maningon loja bani goluh on, loja angkula age pingkiran (ay.10). Tapi tujuanni haganupan ai sedo bermaksud ase jolma in bersifat pesimis tapi sihol menyadarhon jolma pasal fakta hidup na maningon idompakkon sidea.  Humbani haganup fakta ai  Parambilan sihol mangajar ase jolma sadar bani keberadaanni na sangat terbatas (bani umur, pamingkirion, gogoh, mangarusi na masa, pnl.) sehingga boi lambin marhatengeran bani Naibata. Anggo isobut na laho salpu do haganup sedo imaksudhon ase jolma boi maruhur-uhur tanpa peduli bani horja na madear. Tapi tujuanni ase sadar jolma in bahwa lang sidea na markuasa mangatur goluhni tapi pitah Naibata do. Lang berdaya jolma mamparayak na madear humbani gogoh pakon pingkiranni, pitah halani idop ni uhur ni Naibata do. Halani ai lang boi keadaan na marubah-ubah ampa na terbatas ai gabe alasan manundalhon Naibata tapi sebalikni gabe kesempatan mambuka uhur janah marhatengeran ampa marhabiaran i lobei ni Naibata do (ay.14c). 

SADA SEBAGAI SESAMA ANGKULA NI KRISTUS 

Ambilan 29 September 2019

Epesus 4 : 7 – 16 

1. Sebagai komunitas minoritas, kuria ni Tuhan na i Epesus mandompakkon dua keadaan gabe pergumulan ijia. Na parlobei, sidea ihagigihon pamarentah (pamarentah Rom) ampa pambobai ni halak Jahudi na lang satuju hubani kehadiran ni gereja janah na paduahon, sidea marharohan humbani latar belakang na berbeda-beda (adong humbani Jahudi ampa humbani sipajuh begu-begu hinan). Domu bani keadaan on ma Paulus paingatkon ase sidea membangun hasadaon. Hasadaon ai porlu ase boi sidea saling meneguhkan sanggah mandompakkon hamaholon. Pori pe sidea roh humbani latar belakang na berbeda tapi sasintongni domma ipasada sidea sebagai sesama pagori ni Kristus. Halani ai ipatugah bahwa Tuhan Jesus na dob roh hu tanoh on janah na dob naik hu nagori atas (ay.8-10), hum-Bani do haganup kuria in manjalo sibere-bere domu hubani ukuran ni pambere-Ni (ay.7). Pori pe marbeda latar-belakang ampa talenta na adong bani sidea tapi sada do sumber ni haganupan ai aima Tuhan Jesus.

PUJI JANAH SAKSIHON MA NAIBATA SIPALUAH IN !

Sibasaon 29 September 2019

Psalmen 40 : 7 – 11 

1. Sadokah manggoluh i tanoh on haganup do jolma mandompakkon hansunsahan atau pergumulan. Bani ambilan on, parpsalmen (Daud) pe ongga do mandompakkon hasunsahan bahkan isobut domma marianan ia bani godung hamagouan (ay.3). Tapi bani keadaan na sonai ternyata Daud memiliki pangarapan ibagas haporsayaon sehingga sanggah idompakkon hasunsahan, marpangarapan ampa marondos do ia bani Jahowa (ay.1). Tongon iurupi Jahowa do ia nini, idokdok do ahu humbani godung hamagouan (ay.3). Marhitei na sonin ma Daud mandodingkon/mamuji Jahowa na mansarihon goluhni (ay.4). Dob maluah ia, ibotoh janah isadari Daud do bahwa respon na ipindo Naibata humbani sedo galangan sisayaton tapi pinggol na buha do laho manangar hata ni Jahowa (ay.7). Halani ai  roh do ia bani buku na ginulung (hata ni Jahowa) laho marlajar ase ibotoh aha do sibahenonni domu hubani isi ni buku/hata ai (ay.8). Hunjon boi iidah hita bahwa Daud lang talu ibahen hasunsahan tapi italuhon do hasunsahan ai marhitei na marondos bani Jahowa. Halani ai lambin ibohali do homa dirini bani hata ni Jahowa halani ibotoh do anggo domma marosuh Jahowa hubani marhitei na mardalan ia domu hubani hata-Ni, sedo parkara na mahol bani Jahowa laho mangurupisi laho mengatasi haganup persoalan ni goluhni.

PITAH JAHOWA DO SISOMBAHON !

Ambilan 22 September 2019

Josua 24 : 13 – 25         

1. Dob das halak Israel i tanoh Kanaan, Josua sebagai pemimpin berusaha ase bangsa ai terdidik ibagas hata ni Naibata janah setia mambalosi Naibata. Panorang hatuaonni Josua dob marumur 110 tahun (24:29), ihasiholhon do patoguhkon uhur ni bangsa ai ase marhabiaran bani Jahowa. Nini: ‘On pe sai habiari nasiam ma Jahowa, anjaha totap ma uhur nasiam mambalosi-Si ibagas putih ni uhur ampa hasintongan’ (ay.14). Sadar do Josua bahwa masa depan ni bangsa ai lang bergantung hubani tanoh Kanaan na ikenal sebagai habaoran ni susu pakon dadih tapi pitah bergantung hubani Naibata do. ‘Tanoh Kanaan’ (malas ni uhur) lang itontuhon ianan ampa keadaan tapi anggo totap sipambalosi bani Jahowa do. Halani ai mutlak do sipambalosi sidea hubani Naibata anggo sihol do totap jumpahan pasu-pasu janah boi sonang marianan i tanoh Kanaan. Domu hujin idilo Josua do ganup pangintua ni bangsa ai hu Sikem (ianan parjumpahan ni Naibata pakon Abraham na manjanjihon tanoh Kanaan berehonon-Ni bani bangsa Israel) laho patoguhkon uhurni sidea ase ulang mubah haporsayaon ni sidea bani Naibata. 

HUJA DO HAM DOB MATEI HAM ?

Sibasaon 22 September 2019

Pangukabon 20 : 11 – 15 

1. Buku Pangukabon marisihon aha na iidah si Johanes sanggah tarbuang ia i Pulau Patmos. Pangidahan ai aima pasal na sihol masa na isuratkon hubani na pitu kuria panorang ijia (Efesus, Smirna, Pergamus, Tiatira, Sardis, Filadelfia dan Laodikia). Ipatugah do bani pangukabon ai pasal hamonangan ni Tuhan Jesus manaluhon haganup kuasa na i dunia on janah harajaon-Ni meliputi nagori atas (1:11). Domu hujin isi ni buku Pangukabon bertujuan mambere panotap hubani kuria ase totap setia mangirikkon Tuhan Jesus marhitei na ipatugah ulih hamonangan na sihol sijaloon ni na porsaya. Na setia das bani ujungni jumpahan hagoluhan janah pori pe idompakkon sidea sitaronon halani mangirikkon Tuhan, sapardihani pe lang sitaronon ai anggo ibandingkon hubani hasangapon na dob ipasirsir Tuhan hubani sidea. Ase isi ni buku pangukabon bertujuan do mendorong kuria ase totap bersemangat pori pe gati ipahiri dunia on halani mangirikkon Tuhan. Sekaligus martujuan ase na porsaya lang be pitah fokus hubani na adong i dunia on tapi domma goluh na berorientasi sorgawi janah ipahami bahwa dunia on pitah sebagai rute dalan do hansa. Marhitei na sonai ma na porsaya totap sirsir mematuhi rambu-rambu dalan aima hata ni Naibata bani na mandompakkon haganup na masa ase boi das hu tujuan aima hagoluhan na totap ai.