MANOMBAH NAIBATA IBAGAS HASINTONGAN AMPA TONDUY (Ambilan 20 Oktober 2019 Johanes 4 : 21-26)

MANOMBAH NAIBATA IBAGAS HASINTONGAN AMPA TONDUY

Ambilan 20 Oktober 2019

Johanes 4 : 21-26

1. Ambilan on aima parsahapan ni Tuhan Jesus pakon sahalak boru Samaria. Adong do tradisi panorang ai bahwa ianan martonggo pitah bani ianan tertentu. Domu hujin ipatorang Tuhan Jesus do sonaha martonggo atau parsombahon na sintong, nini: ‘seng be i dolog an atap i Jerusalem nasiam marsombah bani Bapa in’ (ay.21), Hunjon tangkas bahwa tang siporlunan sedo ianan parsombahon tapi ise na isombah do. Sedo bangunan fisik siporlunan tapi uhur ni kuria atap sipartonggo do. Soya do pori pe gareja jenges anggo hauhuron ni kuria lape sintong. On dihut mangajarhon bahwa bani ganup ianan do hita ningon marsombah bani Naibata marhitei uhur ampa parlahou. Naibata lang boi iklaim (‘ipenjarahon’) hita pitah marianan bani ianan tertentu halani bebas do Ia hadir bani haganup ianan. Ase porlunan do na isombah dari pada ianan parsombahon. 

2. Selanjutni isobut Tuhan Jesus, ‘Isombah nasiam do na so tinanda nasiam, tapi anggo hanami na tinanda nami do isombah hanami’ (ay.22). Anggo halak Samaria ijia marsombah bani naibata na lang itanda, hal on pe boi do terjadi age nuan. Gabe evaluasi do on bani kuria halani ra adong ope na marsombah hubani na so tinandani misalni hubani datu, peramal, pnl. Na gabe sukkun-sukkun homa, anggo martonggo janah beribadah hita hubani Naibata, domma sintong itanda janah ihaporsayai hita Ia? Jangan-jangan roh hita marsombah ampa martonggo hubani Naibata tapi sasintongni lape itanda janah ihaporsayai hita Ia. Anggo sonin ope, on ma mambahen pori pe hita domma martonggo atap marminggu tapi lalap do hita bulinsah janah goluhta lalap ope lokkot ibagas dosa.

 

3. Iperjelas Tuhan Jesus use ‘na roh ma panorangni, anjaha domma roh ai nuan, gabe ibagas Tonduy ampa Hasintongan ma sagala sipartonggo na sintong martonggo hubani Bapa in, ai partonggo na sonai do ipangindo Bapa in’ (ay.23). Ibagas Hasintongan (Jun. aletheia) maksudni marsombah janah martonggo ibagas goran ni Tuhan Jesus halani pitah Ia do dalan hasintongan na boi mamboan hita hubani Naibata. Pitah Tuhan Jesus do standar na talup i lobei ni Naibata. Halani ai  maningon ibagas goran ni Jesus do ase boi das tonggo atap parsombahonta hubani Naibata. Ase lepak do anggo adong na mangkatahon sarupa do haganup haporsayaon atap agama carani do hansa marbeda. Marosuh do Naibata isombah hita tapi maningon marhitei dalan hasintongan aima Tuhan Jesus. Pitah Tuhan Jesus do Mesias na iutus Naibata roh hu dunia on patalupkon jolma pardosa boi use roh hu lobei ni Naibata (ay.26).

 

4. Selanjutni itandashon use bahwa maningon do martonggo ibagas Tonduy (ay.24). Tonduy na imaksud ijon aima Tonduy Napansing atap Tonduy na roh humbani Naibata. Lang boi itanda jolma Naibata anggo humbani kemampuanni sidea halani haganup jolma domma madabuh hubagas dosa. Halani ai ase boi roh hu lobei ni Naibata maningon marsombah ibagas Tonduy halani Tonduy Napansing do hansa na mananda janah mambotoh harosuh ni Naibata. Ase bani na martonggo atau marsombah hubani Naibata maningon do ibagas toruh ni uhur janah sirsir mamparnalang diri, lang boi pitah mangajamhon pingkiranta tapi paturutkon hauhuronta iajaari Tonduy do. Hal on porlu gabe evaluasi halani boi do age bani horja i kuria lang be Tonduy ai na marhorja bani hauhuron ni kuria age parhorjani tapi domma harosuh ampa pingkiranta sandiri. On ma mambahen gati tubuh parsalisihan ampa paringoran age i kuria in halani na ihorjahon lang be harosuh ni Naibata domu hubani pangajaran ni Tonduy tapi domma harosuh ni jolma ; Na ipasangap lang be Naibata tapi domma orang-orang tertentu misalni pemimpin atau orang-orang na berpengaruh. Hataridahan na legan na lape ibobai Tonduy aima, pori pe domma marianan ibagas gareja tapi pingkiranni gati lang fokus hubani Naibata, pitah angkula hansa i gareja. Lang boi homa roh marsombah hubani Naibata tapi bani kenyataan totap ope homa porsaya janah mangindo pangurupion hubani tonduy na legan misalni tonduy ni na dob matei ampa tonduy na legan (haporsayaon na maragu). Ningon takkas do hubanta bahwa iidah janah ibotoh Naibata do uhur ampa pingkiranta sanggah roh hita marsombah hu-Bani. 

 

5. Refleksi

a. Bani ganup ianan ampa horjanta do hita ningon roh marsombah hubani Naibata. Manonggohon horja janah mangkorjahon tonggo ai do parsombahon na iharosuhkon Naibata.

b. Roh ma hita marsombah janah martonggo halani domma sintong itanda janah ihaporsayai hita Naibata. Ulang ma sisoya-soya parugamaonta halani lape sintong itanda janah ihaporsayai hita Ia. Roh ma hita hu lobei-Ni ibagas Hasintongan ampa Tonduy.

c. Haleluya No. 340 : 1 – 3 

Read 654 times

1 comment

  • Albano Sinaga

    posted by Albano Sinaga

    Wednesday, 16/10/2019

    Malas uhur mambasa ambilan pakon sibasaon nai patakkas ham bani kolom on. Tar Puji ma Tuhanta Naibata. Dtupama panitia nami. Horas.*

Leave a comment

Make sure you enter all the required information, indicated by an asterisk (*). HTML code is not allowed.

Ambilan & Sibasaon

Go to top