PAUBAH HAM MA UHURMU ! (Sibasaon 13 Oktober 2019 Matius 21 : 28 – 32)

PAUBAH HAM MA UHURMU !

Sibasaon 13 Oktober 2019

Matius 21 : 28 – 32 

 

1. Domu hubani pangajaran ampa randa-tanda halongangan na ihorjahon Tuhan Jesus, heran do simbuei sonai age tokoh agama Jahudi. Halani ai sanggah mangajari Ia roh do sintua ni malim ampa pangintuai manungkun-Si, ‘Marhitei kuasa aha do ibahen Ham ganupan in? Mambalosi sungkun-sungkun ai ibobai Tuhan Jesus do uhur ni sidea hubani si Johanes (Pandidi) marhitei sungkun-sungkun, ‘ia pandidion ni si Johanes, na hunja do ai? hun nagori atas do atap humbani jolma?’ (ay.24-25). Sasintongni halak Jahudi mangakui do bahwa si Johanes aima nabi na iutus Naibata. Tapi pori pe iakui sidea anggo hasaksian ni si Johanes pasal Tuhan Jesus bahwa Ia aima Mesias Anak ni Naibata lang tarjalo sidea (3:11-17). Halani ai ma ase ibalosi sidea ‘Seng ibotoh hanami’ (ay.27). Hunjon tarbukti ma ketidak-jujuran ni sidea halani pori pe iakui sidea si Johanes roh humbani Naibata tapi bani kenyatan itulak sidea do hata na ipadas si Johanes pasal Tuhan Jesus sebagai Mesias.  

 

2. Domu hubani ketidak-jujuran ni sidea ai ibahen Tuhan Jesus ma limbaga. Bani limbaga ai ipatugah adong dua anak ni sada halak. Isuruh do sidea laho marhorja hu pohon anggur. Balos ni sikahanan ‘dear tuan, tapi seng laho ia’; tapi balos ni sianggian ‘Seng ra ahu!, tapi manosal do ia use, gabe laho ma! (ay.28-30). Isungkun Tuhan Jesus do sidea ise do humbani na dua ai na mandalankon hata ni bapani ai janah ibalosi sidea do ‘Sianggian ai!’ (ay.31). Sintong do panimbangion atau balos ni sidea ai. Tapi domu hujin ma Tuhan Jesus mambuka ketidak-jujuran ni sidea. Mase? Halani usih do sidea hubani anak sikahanan ai na seolah-olah idahon bujur apa lagi sebagai tokoh agama tapi pitah ibagas hata hansa. Bani kenyataan, sidea lang porsaya janah  lang sirsir mangkorjahon hata ni Naibata (ay.32). Ibotoh sidea do hata ni Naibata tapi lang sirsir mandalankon Hata ai. Agama bani sidea hanya sebagai topeng.

 

3. Selanjutni anak sianggian ai aima gambaran ni halak pardosa, sijalo sohei ampa boru jalang na ianggap halak Jahudi lang talup i lobei ni Naibata. Tapi pori pe bani mungkahni sidea sipanlawan bani hata ni Naibata, tapi kemudian sirsir do sidea manolsoli dosa ampa hahuranganni. Dob isolsoli dosani ai gabe sirsir homa mandalankon hata ni Naibata. Domu hubani ambilan on justru sidea do sisintongan i lobei ni Naibata marimbang halak Jahudi.

 

4. Halani ai secara tegas nini Tuhan Jesus ‘Lobeian ni sijalo sohei pakon boru jalang do nasiam masuk hu bagas Harajaon ni Naibata’ (ay.31). Hatahonon, parugamaon na sintong sedo pitah penampilan luar (memiliki tohonan), na pitah mansahapkon hata ni Naibata tapi anggo sirsir do homa mangkaporsayai ampa mandalankon Hata ai. “Seng haganup halak na mangkatahon Bangku ‘Tuhan, Tuhan!’ masuk hu Harajaon nagori atas ai, pitah na mandalankon harosuh ni Bapang-Ku na i nagori atas ai do” (Mat. 7:21). Sekaligus do on sebagai dilo-dilo hubani hamubahon ni uhur (pertobatan) atau pemurnian agama. Lang otomatis haganup halak Kristen maluah tapi na sirsir mangkagoluhkon hata ampa harosuh ni Naibata do. Parugamaon na sintong lang sekedar symbol tapi kemauan paubah uhur do. Hata ni Naibata lang pitah untuk itangar janah ibotoh tapi ningon ihaporsayai janah ihagoluhkon do. Ukuran ni halak na sintong  sedo iukur marhitei jabatanni i kuria tapi apakah hata ni Naibata domma berotoritas bani diri ni sidea do. Agama bukan sekedar seremonial dan organisasi tapi meliputi aksi atau cara hidup do homa.

 

5. Refleksi

a. Secara ilmu boi do ibotoh hita hata ni Tuhan, tapi untuk mangkaporsayai ampa mangkagoluhkon pitah marhitei pangurupion ni Tonduy Na Pansing do. Halani ai ulang ma hita berpusat bani dirinta (keakuanta) tapi berpusat hubani Tuhan ma. Anggo domma Tonduy na marhorja ibagas uhurta, gabe malas ni uhur do banta mandalankon hata ni Tuhan. Tanda ni na terbangun haporsayaon aima anggo lambin terhilang biak keakuanta janah lambin marbanggal biak atau rosuh ni Tuhan bani dirinta. 

b. Pakkei hita, sisoya-soya bahkan gabe hagigi ni Tuhan do parugamaon, tohonan age ibadahta anggo lang irik ihagoluhkon hita harosuh ni Tuhan in. Sihol ma lambin pitah (murni) parugamaonta ase hakristenonta ulang pitah popular ibagas hata tapi terbukti ma homa age humbani pangabakta.

c. Ulih ni na porsaya aima Harajaon ni Naibata na lobih humbani aha pe na harga na adong i dunia on. Halani ai ulang ma iparlanseihon hita dilo-dilo ni Tuhan, sirsir ma paubah uhur ampa mangkagoluhkon hata-Ni. 

d. Haleluya 496 : 1 – 3

Read 733 times

Leave a comment

Make sure you enter all the required information, indicated by an asterisk (*). HTML code is not allowed.

Ambilan & Sibasaon

Go to top