HASOMANKU DO HAM ! (Sibasaon 25 Agustus 2019 3 Musa 25 : 39 – 43)

HASOMANKU DO HAM !

Sibasaon 25 Agustus 2019

3 Musa 25 : 39 – 43

 

1. Halani keadaan tertentu boi do sasada halak gabe miskin janah untuk mempertahankon goluhni iombouhon dirini hubani halak na legan. Hal na sonon pe  boi do terjadi age bani bangsa ni Naibata bani Padan Na Basaia. Halani ai ibere Naibata do aturan bani sidea (age banta) sonaha bersikap hubani halak na miskin na mangombouhon dirini.

2. Isobut ‘Anggo lambin miskin hasomanmu sabangsa i lambungmu, pala ijualhon dirini bam, seng bulih songon jabolon ia pahorjahononmu’ (ay.39), ‘maningon songon halak sipangan gaji atau panginsolat do ia i lambungmu’ (ay.40). Jabolon (Heber. Yamukh) aima sasada halak na mambere dirini, gogohni, panorangni pitah untuk haporluan ni tuanni. Sahalak jabolon marhorja seng ongga untuk dirini tapi pitah untuk kepentingan ni tuanni do. Jabolon lang ongga berhak manjalo gaji atap hasil ni horjani tapi ganup hasil ni horjani pitah untuk tuanni hansa. Anggo isobut seng bulih songon jabolon ia pahorjahononmu tapi maningon halak sipangan gaji (Heber, kesyakir) artini: maningon iperlakuhon sidea ibagas holong janah wajib mambere hak / gajini sidea sebagai siparhorja sehingga sidea pe boi memiliki masa depan na dear. Lang boi homa maborattu panrajaion bani sidea songon bani sahalak jabolon (ay.43). Haganupan on patugahkon sifat ni Naibata sebagai Parholong na lang marosuh mangidah pangodoh-odohon ampa ketidak-adilan bani pargoluhan ni bangsa-Ni. Pori pe sidea memiliki status na berbeda sebagai tondokan (tuan) ampa na tondok (siparhorja), tapi ningon memiliki tujuan na sarupa aima manlawan hamiskinon. Tondokan ampa siparhorja maningon sama-sama diuntungkan ase riap sejahtera. 

3. Alasanni ase iperlakuhon sebagai sipangan gaji isobut bani ay. 42 ‘Ai sidea pe juak-juak do na dob Huboan luar hun tanoh Masir’. Halak na miskin ai pe isobut do juak-juak ni Naibata, na dihut ipaluah Naibata hun parjabolonan Masir. Artini, ganup bangsa ai memiliki status na sarupa i lobei ni Naibata sebagai sesama na dob ipaluah Naibata hun parjabolonan Masir. Ipaluah Naibata sidea hun Masir halani Naibata sandiri lang marosuh anggo iparjabolon bangsa na legan juak-juak atau bangsa-Ni. Halani ai bangsa ai pe maningon manggoluh ibagas holong halani domma parlobei Naibata mangkaholongi sidea. Halani ai merupakan panlanggaran na banggal do i lobei ni Naibata anggo terjadi use parjabolonan antar sesama sidea. Berlaku adil janah mangkaholongi siparhorja na adong i rumahni sebagai sesama maningon idasari biar bani Naibata ampa uhur na martarimakasih bani holong ampa haluahon na humbani Naibata. 

4. Secara waktu pe maningon ibebashon do sidea bani tahun parolob-oloban, Jobel (ay.40). Status sebagai pekerja memiliki batas waktu. Anggo domma jumpah panorang tahun parolob-oloban maka secara otomatis (tanpa syarat/partobus) ipaluah ma sidea rap pakon dakdanakni janah mulak bei ma sidea hubani status semula domu hubani parbagianan ni ompung ni sidea bei. Bani tahun parolob-oloban lang adong be humbani bangsa ai na terikat hubani tuanni tapi haganup domma mengalami pembebasan janah halani ai ma ase isobut tahun parolob-oloban (tahun pa-50 kon). Sonin ma Naibata mambere aturan laho menjamin ase ulang adong pangodoh-odohon i tongah-tongah ni bangsa-Ni.

5. Refleksi

a. Membangun diri lang terlepas humbani kemauan membangun sesama. Ulang ma sura-sura jumpahan pasu-pasu hape goluhta justru ‘mamenjarahon’ (manunsahi, mambahen hasoman marsitaronon). Ibadah ningon iarusi hita secara holistik, lang pitah ibadah seremonial tapi menyangkut goluh na marsihaholongan do homa. Marholong aima bukti kesetiaanta hubani Tuhan.

b. Malas ni uhur sedo anggo pitah maruntung hita marhitei horjanta tapi anggo dihut halak na legan marmalas ni uhur halani horjanta do homa. Mangkorjahon holong dihut do ai sebagai cara mambangun hasadaon ibagas kuria. Hasadaon i tongah-tongah ni kuria ulang ma pitah sanggah riap hundul i gereja tapi nyata ma homa anggo riap hundul hita bani sitaronon ampa na masa bani hasomanta. Hasadaon ni halak na porsaya lang cukup marhitei ibadah tapi ningon nyata age ibagas aksi marsiurupan. 

c. Perbedaan potensi, status, ide ningon igunahon merekat hasadaon bani keluarga, masyarakat marhitei na manggunahon haganupan ai ibagas holong. Ulang isalah-gunahon perbedaan status halani aha pe statusta sibere-bere ni Naibata do ai.

d. Munsuh ni haporsayaon do sifat egois na pitah mamingkiri dirini sandiri. Ulang ma anggo adong halobihanta gabe tubuh gijang ni uhur tapi sifat na peduli ma. Anggo lambin tambah pasu-pasu, ulang pitah penampilan (style) hansa na marubah tapi horja holong pe lambin marbanggal ma homa. Sikap peduli na sirsir sapangahapan pakon hasoman tarlobih na ibagas sitaronon merupakan warna hidup ni na porsaya. 

e. Anggo ipatambah Tuhan banta panorang ni goluh, gogoh ampa pasu-pasu sedo na kebetulan ai tapi halani isurahon Tuhan do mamakei hita gabe tangan-Ni laho mangurupi atau mangkaholongi halak na legan na mamorluhon pangurupionta. Malas do tongon uhurta marhasoman pakon halak na boi mangurupi hita, tapi maningon malas homa uhurta marhasoman pakon hasoman na mamorluhon pangurupionta.

f. Marhitei goluhta do ibotoh janah itanda dunia on ise do Tuhan na ihaporsayai hita. Anggo hita peduli janah parholong, gabe ibotoh dunia on ma Parholong do Tuhanta ai. Ulang ma ipahiri hita goran ni Tuhan marhitei goluh ampa parlahounta na daoh humbaani holong.

g. Haleluya 250 : 1, 4, 5 

Read 2870 times

1 comment

  • heri dasuha

    posted by heri dasuha

    Tuesday, 29/10/2019

    bahen ham lobe hatoranganni sibasaon bani minggu bapa tanggal 03-11-2019 bapa pandita.1 musa 3:6-13

Leave a comment

Make sure you enter all the required information, indicated by an asterisk (*). HTML code is not allowed.

Go to top