2. Ambilan on patugahkon aha na masa bani ari parpudi. Iiidah si Johanes do maporus ma tanoh pakon langit (ay.11), artini: berakhir ma zaman dunia. Dob ai iidah si Johanes ma paratas na banggal anjaha putih ampa na hundul i atasni ai. Paratas na banggal anjaha putih patugahkon harajaon ni Naibata na gok ibagas hasangapon janah na pansing janah na hundul ijai aima Tuhan Jesus. Artini, Tuhan Jesus do Panguhum bani ganup jolma bani ari paruhuman na parpudi ai. Bani panorang ai jongjong ma homa haganup na matei i lobei ni paratas ai janah iukkab ma buku-buku ampa buku hagoluhan, gabe iuhum ma na matei ai mangihutkon na tarsurat ibagas buku-buku ai romban hubani horjani sidea bei (ay.12-13), janah barang ise na so jumpah tarsurat bani buku hagoluhan ai idabuhkon ma sidea hubagas laut apuy aima ianan ni hamateian ampa nagori toruh (ay.14-15).

3. Domu bani ambilan on piga-piga renungan banta :

a. Haganupan goluh ampa pangabak ni jolma talar do hape i lobei ni Naibata. Bani paruhuman ai lang boi jolma mamonopkon haganup aha na ihorjahonni sadokah manggoluh. Lang homa porlu ‘penasehat hukum’ songon paruhuman i tanoh on halani talar do haganup horja ni jolma  i lobei ni Naibata. Anggo sadokah i tanoh on boi iponop-ponopkon uhur ampa horja hajahaton tapi anggo bani paruhuman ni Naibata ipatalar janah iungkap ma use haganup. Sebalikni, horjanta na madear pe ra do lang ihira janah idingat hasoman, tapi anggo bani ari paruhuman ai ipatalar ma haganup horjanta na madear ai. Halani ai pori pe gati lang ihargahon dunia on habujuronta bahkan ipahiri dunia on use hita halani haporsayaonta lang be pala etek uhurta halani harga tumang do hape horjanta ai i lobei ni Naibata. Ase pongkut ma tongtong mamparbuahkon haporsayaonta.

b. Na mardalan do hita i dunia on manuju paruhuman ni Naibata. Paruhuman ai gabe haluahon ampa malas ni uhur bani na porsaya tapi gabe hamateian na sadokah ni dokahni bani na lang porsaya. Hita do manontuhon dalan sipilihonta. Memang secara fakta gati do dalan ni parjahat mamboan kenikmatan sebalikni dalan ni parpintor justru patubuhkon hamaholon halani maningon ilawan hisap ni angkulani. Perenungan banta pasal on isuratkon bani 1 Kor. 5:19, nini: ‘Anggo sanggah manggoluh on do hansa mangarap hita bani Kristus, hita ma sisombuhan humbani haganup’. Maksudni, upah ampa malas ni uhur na utama bani na porsaya sedo sonaha ase boi sonang i dunia on tapi upahta aima halani domma ipasirsir banta hagoluhan sisadokah ni dokahni do. On ma na mendorong semangat bani na porsaya totap setia mangirikkon Tuhan bani haganup keadaan ampa panorang.

c. Tuhan Jesus do Panguhum Bolon ai janah Ia do homa na dob membela hita i lobei ni Bapa na i surga marhitei parmatei ampa parpuhoon-Ni. Halani ai ulang be ragu hita mangkaporsayai Tuhan Jesus. I tongah-tongah ni na buei jolma meragukan silang ni Kristus, tapi banta na porsaya hauntungan bolon do silang ni Kristus ai. Domma ibere Tuhan Jesus homa jaminan banta ‘sai na hasomanan-Ku do hanima ganup ari, ronsi roh ujung ni dunia on’ (Mat.28:20). Artini, marhasoman Tuhan Jesus tartaluhon hita do haganup kuasa ni sibolis na sihol mangagou langkah ampa goluhta. Halani ai sirsir ma tongtong mambere uhur ampa goluhta ibobai Tuhan Jesus, ulang be manlembang hu siamun barang hu siambilou halani mirlang (hajengeson) ni dunia on. Ulang ma homa iparnaibata hita dirinta ampa kuasa-kuasa na i dunia on halani pitah Tuhan Jesus do na markuasa paluahkon hita sonari ampa na boi paluahkon hita humbani paruhuman parpudi ai.

d. Ase lang be sihabiaran hamateian na i tanoh on halani sedo hamateian hape ujung ni goluh ni na porsaya. Sihabiaran aima anggo matei haporsayaonta do halani berakibat gabe idabuhkon hubagas laut apuy aima ianan ni hamateian ampa nagori toruh (matei paduahalihon). Sedo maksudni lang porlu be banta goluh i dunia on, tapi sebalikni do, anggo ibere Tuhan ope panorang banta manggoluh pakeihon hita ma sadear-dearni laho patoraskon ampa mamparbuahkon haporsayaonta marhitei horja na iharosuhkon Naibata.

e. Marpanorang do haganup. Adong panorang dakdanak, na maposo das hubani na matua. Tapi ujungni  tadingkononta do use hasiangan on. ‘Sanggah milas ari manjomur ma’, sanggah ibere Tuhan ope panorang banta manggoluh pakeihon hita ma sadear-dearni mangkorjahon rosuh ni Tuhan ase ulang panosalan ujungni. 

f. Haleluya No. 116 : 1 – 2