HOBAS MA BANI HORJA NI TUHAN ! (Ambilan 06 Oktober 2019 Lahoan 20 : 21 – 31)

HOBAS MA BANI HORJA NI TUHAN !

Ambilan 06 Oktober 2019

Lahoan 20 : 21 – 31 

 

1. Ambilan on aima hata partadingan ni Paulus bani kuria na i Efesus pakon sintua na roh hun Miletus paima borhat ia hu Jerusalem. Tangkas do banta bahwa dob das Paulus i  Jerusalem itangkap ma ia. Bani ambilan on ipatugah Paulus do sonaha ia mandalankon horja haapostelonni. Domma isaksihon Paulus ambilan Na Madear in bani goluhni. Marsaksi (Jun. diamarturromai, marasal humbani hata martureo), artini: manaksihon ibagas ringgas ampa pongkut ni uhur (ay.21,23,24,25). Pongkut ni uhur ai do mambahen lang tarolat Paulus manaksihon Ambilan Na Madear i tongah-tongah ni ragam ni tali / ay.23 (Jun. desma), artini: hurungan, penjara pakon bagei ni sitaronon (jun. thlifseis). Pongkut ni uhur ai do homa mambahen Paulus lang marnaloja manaksihon Ambilan Na Madear arian pakon borngin marhasoman iluh-iluh (ay.31). Pongkut ni uhur ai do homa mambahen Paulus sirsir ibobai Tonduy Na Pansing bani horja parambilanonni sonai age na laho misir ia hu Jerusalem pori pe seng ibotoh aha na sihol masa bani ijai (ay.21). Artini, na marhorja bani diri ni Paulus lang be dirini tapi domma Naibata ibagas Tonduy. Ia lang sipanjua bani suruhan ampa horja na iondoskon Naibata. Hal on boi terjadi halani na menggerakon goluhni lang be uhur hajolmaonni tapi haporsayaonni do. Haporsayaonni mambahen ia mampu mangondoskon haganup goluhni ipakei Naibata. Goluhni Paulus lang be laho pasaudkon rosuhni sandiri tapi ase rosuh ni Naibata ipasaud marhitei dirini do. Halani ai na iutamahon Paulus bani goluhni lang be aha harosuh ni uhurni tapi aha na iharosuhkon Naibata bani dirini do. Halani ai iakuhon Paulus do bahwa na borsih do ia humbani sapata ni daroh ni sidea (ay.26). Artini, haganup na dob ijaloni humbani Naibata domma ipabotohkon hubani sidea (ay.27) lang adong na iponop-ponopkon halani alasan tertentu.

2. Sadar do homa Paulus bahwa hosahni pe sedo ia simadasi tapi Naibata do. Adong do panorangni tadingkononni dunia on. Ibotoh do bahwa goluhni i dunia on sedo na kebetulan tapi domma ibagas rencana ni Naibata. Halani sibere-bere ni Naibata do ai maka Paulus sadar bahwa kesempatan hidup na ibere Naibata bertujuan do ase isaksihon Ambilan Na Madear. Bahkan isobut ‘lang pala harga huhira hosahku, asal ma boi hupaujung langkahku ampa horja na dob hujalo humbani Tuhan Jesus, ai ma na manaksihon Ambilan Na Madear pasal idop ni uhur ni Naibata’ (ay.24). Na utama iparayak Paulus bani goluhni sedo hosahni (‘kepentingan-kepentingan duniawi) tapi ase tarambilan do goran ni Naibata marhiteihonsi.    

3. Tujuan hasaksian na ipadas Paulus hubani kuria aima ase adong hamubahon ni uhur (Jun. metanoia = pertobatan) bani Naibata ampa haporsayaon (Jun. pistis) bani Tuhanta Jesus Kristus (ay.21). Ambilan Na Madear ai do na mangubah goluh ni na porsaya humbani na marhabutakon ibagas dosa gabe goluh na sadalan hubani rosuh ni Naibata aima hapintoron, hasintongan, damei pakon holong ni uhur. Hamubahon ni uhur ai menyatu do pakon haporsayaon, artini: jolma na porsaya taridah do humbani na sirsir homa margoluh na baru. Ladung do haporsayaon anggo lang adong hamubahon ni pangabak ampa paruhuron.

4. Sekaligus do ipaingat Paulus sintua-sintua ai ase lambin ihagoluhkon sidea tohonan na domma ipaondos hubani sidea laho marmahani kuria ni Tuhan (ay.28). Bani horja on sintua-sintua ai porlu manjaga dirini sidea (ay.28,31). Hal on porlu halani horja marmahani sedo horja na urah tapi rentan hubani bagei resiko pakon sitaronon. Halani ai iporluhon ketulusan ampa pongkut ni uhur. Tanpa ketulusan ampa pongkut ni uhur maka sangat terbuka kemungkinan peran ni sidea lang be marmahani tapi gabe mangerap janah parsedahon do use songon begu panoroh (ay.29). Tanpa ketulusan ampa pongkut ni uhur kehadiran ni sidea lang be mangutamahon hadearon ni kuria tapi gabe madabuh hubani kepentingan pribadi, hisap ni daging, mencari kehormatan dunia, pnl. On ma mambahen boi do terjadi hun tongah-tongah ni sintua-sintua ai mamodahkon na lepak janah lang be mamodahkon hasintongan ni Ambilan Na Madear (ay.30).

5. Refleksi

a. Domma sonaha nuan pongkut ni uhur ni kuria age parhorjani bani horja parambilanon i dunia on? Anggo pangkei hita mangidah, adong kecenderungan pitah sirsir manjalo idop ni uhur ampa pasu-pasu ni Naibata tapi hurang menyadari tanggungjawabni mambere diri, gogoh ampa panorangni bani horja ni Naibata i dunia on.

b. Pongkut ni uhur do mambahen daoh sidalian banta gabe lang sipardihut bani horja ni Tuhan. Maningon itarimakasihkon hita do anggo ibere Tuhan ope kesempatan banta loja bahkan marsitaronon halani pasaudkon horja-Ni i dunia on. 

c. Marpanorang do haganup. Lang torus hita manggoluh i dunia on. Anggo ibere Tuhan ope panorang boi hita marhosah pakon pasu-pasu na legan, sedo na kebetulan ai tapi halani adong do sura ni Tuhan sihobashononta aima ase dihut hita gabe saksi-Ni i dunia on. Ulang ma masuk hita bani barisan ni begu panoroh na mangolati ampa na parsedahon horja ni Tuhan i dunia on.

d. Pataridahkon hita ma buah ni Ambilan Na Madear na ijalo hita marhitei hamubahon ni uhur ampa parlaho.

e. Haleluya No. 488 : 1 – 3.

Read 647 times

Leave a comment

Make sure you enter all the required information, indicated by an asterisk (*). HTML code is not allowed.

Ambilan & Sibasaon

Go to top