PUJI JANAH SAKSIHON MA NAIBATA SIPALUAH IN ! (Sibasaon 29 September 2019 Psalmen 40 : 7 – 11)

PUJI JANAH SAKSIHON MA NAIBATA SIPALUAH IN !

Sibasaon 29 September 2019

Psalmen 40 : 7 – 11 

 

1. Sadokah manggoluh i tanoh on haganup do jolma mandompakkon hansunsahan atau pergumulan. Bani ambilan on, parpsalmen (Daud) pe ongga do mandompakkon hasunsahan bahkan isobut domma marianan ia bani godung hamagouan (ay.3). Tapi bani keadaan na sonai ternyata Daud memiliki pangarapan ibagas haporsayaon sehingga sanggah idompakkon hasunsahan, marpangarapan ampa marondos do ia bani Jahowa (ay.1). Tongon iurupi Jahowa do ia nini, idokdok do ahu humbani godung hamagouan (ay.3). Marhitei na sonin ma Daud mandodingkon/mamuji Jahowa na mansarihon goluhni (ay.4). Dob maluah ia, ibotoh janah isadari Daud do bahwa respon na ipindo Naibata humbani sedo galangan sisayaton tapi pinggol na buha do laho manangar hata ni Jahowa (ay.7). Halani ai  roh do ia bani buku na ginulung (hata ni Jahowa) laho marlajar ase ibotoh aha do sibahenonni domu hubani isi ni buku/hata ai (ay.8). Hunjon boi iidah hita bahwa Daud lang talu ibahen hasunsahan tapi italuhon do hasunsahan ai marhitei na marondos bani Jahowa. Halani ai lambin ibohali do homa dirini bani hata ni Jahowa halani ibotoh do anggo domma marosuh Jahowa hubani marhitei na mardalan ia domu hubani hata-Ni, sedo parkara na mahol bani Jahowa laho mangurupisi laho mengatasi haganup persoalan ni goluhni.

2. Domu hujin ma Daud memiliki pengakuan: ‘Mangkorjahon rosuh-Mu ai do na huharosuhkon, Ham Naibatangku, anjaha ibagas uhurhu do titah-Mu’ (ay.9). Hunjon gabe takkas bahwa Daud marondos bani Jahowa lang pitah sanggah mandompakkon hasunsahan tapi dohor janah ipuji do homa Jahowa age dob maluah ia humbani hasunsahan ai. Hatahonon, panandaion ampa haporsayaonni bertumbuh seiring hubani haluahon na dob ijalohon humbani Jahowa. Iakuhon do bahwa haluahon pakon haganup na adong bani termasuk jabatanni sebagai raja, aima sibere-bere ni Jahowa sedo halani gogohni. Halani ai lambin ipuji do Jahowa marhitei haganup sibere-bere ampa haluahon na dob ijaloni. Hatahonon ma, pasu-pasu ampa panramotion na ijalo humbani Jahowa lang mambahen ia margijang ni uhur tapi lambin ipaunduk do uhurni hubani Jahowa. Lambin  ibohali do homa hauhuronni pasal hata ni Jahowa janah ibere goluh ampa gogohni mandalankon hata ai. Artini, haganup pambahenan ampa holong ni Jahowa na ijalohonni iparbuahkon marhitei na mangkagoluhkon hata ampa rosuh ni Jahowa. Daud lang pitah mangindo pangurupion sanggah ibagas hasunsahan tapi na sirsir martarimakasih ampa mamuji Jahowa do homa. 

3. Selanjutni bani ay.10-11 ipatugah do sonaha Daud mambere dirini manaksihon idop ni uhur, habujuron, pangurupion, hapintoron ampa hasintongan ni Jahowa hubani humpulan banggal. Na menarik aima: Na isaksihon Daud bani keberhasilanni sedo dirini atau kehebatanni tapi habanggalon ampa holong ni Jahowa do. Na lambin marbanggal ibagas keberhasilanni sedo dirini tapi goran ni Jahowa do. Isadari Daud bahwa boi pe ia gabe jolma na banggal sedo halani na ipabanggal-banggal dirini tapi halani na iramoti ampa halani idop ni uhur ni Jahowa do ai. On ma na mendorong Daud patugahkon habanggalon ni Jahowa ase haganup jolma dihut mananda ampa marondos bani Naibata marhitei hasaksianni hubani humpulan banggal. Ijon ia lang pitah mansahapkon pasal Jahowa tapi patugahkon hasaksianni pasal kuasa ampa holong ni Jahowa na dob iahapkon janah ihaporsayaini do. Ia lang pitah sirsir iurupi tapi na sirsir do homa gabe alat/utusan ni Jahowa laho manaksihon pambahenan-Ni.

 

4. Refleksi

a. Martonggo mangindo pangurupion ni Jahowa umumni lang horja na mahol bani kuria. Bahkan ipangindo do homa ase dihut hasomanni manonggohonsi. Na gabe pergumulan aima: gati ope gabe horja na mahol bani deba kuria laho martarimakasih ampa mamuji Naibata bani haganup sibere-bere ampa haluahon na ijalo sidea.

b. Martarimakasih hubani Naibata gati do homa ipahami sebatas mambere galangan hu gareja. Sasintongni lang pitah ai hataridahanni tarimakasihta hubani Naibata halani sedo Naibata na porlu siidopan Ia halani Ia do simada haganup na adong i tanoh on. Maningon ipataridahkon hita do homa tarimakasih ampa pamujionta hu-Bani marhitei na sirsir  manggoluh janah mardalan bani hata ampa rosuh-Ni. Halani ai do ase ihatahon Daud seng marosuh uhur-Mu bani galangan sisayaton tapi pinggol na buha bani hata-Mu do. Anggo ipadas hita pe galangan/guguanta sedo mararti na hurangan Naibata tapi Ia sihol mangidah sonaha ma pangkargahononta bani pasu-pasu ampa haluahon na ibere-Ni do hubanta. Artini, galangan na sintong aima anggo haganup goluhta (pangabakta) ampa na adong banta termasuk artanta ipakei hita bahen hasangapon ni Naibata. Pasal on pe porlu gabe perenungan banta halani boi do  terjadi orientasi ni gereja (termasuk sipangidangi) lang be pelayanan tapi domma materi. Memang porlu do materi halani ai pe pasu-pasu ni Naibata do tapi tujuan utama ni gereja lang laho patumpuhon materi tapi laho padoraskon pangidangion do ase lambin rarat hata ni Naibata, ase lambin martambah jolma na manjalo ampa mangkaporsayai hata ni Naibata do.

c. Goluh ni na dob porsaya aima goluh na marsaksi, manaksihon holong ampa haluahon na humbani Naibata bani dunia on (humpulan banggal). Pergumulanta, anggo hita pe lape porsaya sonaha ma hita boi manaksihon haporsayaonta? Anggo hita pe lalap do gobir sonaha ma hita boi manaksihon bahwa Siparkuasa janah Siparholong do Naibata? Anggo hita pe lalap do marsipahata-hataan sonaha ma hita boi manaksihon damei? Anggo ukuran na sintong banta pe pitah aha na sosok bani pingkiran ampa rosuhta do sonaha ma hita boi manaksihon hasintonganni hata ni Tuhan? Goluhta ampa parsahapta ningon do gabe hasaksian bani dunia on. Halani ai ulang ma ipertopenghon hita statusta sebagai pagori, sipangidangi age sebagai sipambobai.

d. Haleluya No.  219 : 1, 3, 4.   

Read 643 times

Leave a comment

Make sure you enter all the required information, indicated by an asterisk (*). HTML code is not allowed.

Ambilan & Sibasaon

Go to top