Ambilan & Sibasaon

Ambilan & Sibasaon (187)

Pdt. SA Girsang, S.Th, Ambilan Minggu Jubilate, 3 Mei 2020, 1 Kronika 16:31-36

Pdt. SA Girsang, S.Th, Ambilan Minggu Jubilate, 3 Mei 2020

1 Kronika 16:31-36

Topik Minggu : Marsurak ma bani Tuhan!

1. Teks ambilan on ai ma doding puji-pujian na iluarhon halak Israel bani panorang ni raja Daud, sanggah inahkon poti parpadanan ni  Jahowa hu lampo-lampo na dob pinasirsir ni raja ai (Ayat 1). Poti parpadanan gabe simbol kehadiran ni Naibata do ai i tongah-tongah ni bangsaNi, na dob pinaluahNi hun parjabolonan Masir. Sompat do irampas halak Palistim poti parpadanan in, tapi halani mangkorhon hasunsahan banggal do ai bani sidea pakon bani dewa ni sidea gabe ipaulak ma use poti ai hu tanoh Israel (1 Samuel 4-6). Ase patut do sonai hamegahon pakon malas ni uhur  ni halak Israel sanggah na inahkon poti ai bani  ianan na khusus i Jerusalem. Hona atap relevan do puji-pujian on age banta kuria ni Tuhan panorang on domu bani Minggu Jubilate, mar-olob-olob, marsurak-surak marmalas uhur. Tang onjolan ni malas ni uhur in ai ma parpuhoon ni Kristus humbani na matei na ipestahon hita piga-piga minggu na salpu, ai anggo lang puho Kristus humbani na matei soya ma haporsayaonta. Tapi hinorhon ni parpuhoonNi in gabe dong ma banta na porsaya pangarapan parpuhoon, halani Ia do parlobei ni sagala na dob modom in. Tongon, bani keadaanta sonari na mengalami buei hamaholon tarlobih hinorhon ni covid-19 nuan on,  baik selaku bangsa pakon pangisi ni dunia on, ra do  songon na marlawanan suruhan in hubagas uhurta, ai isuruh hita  mar-olob-olob, marsurak ibagas malas ni uhur. Tapi anggo pangkei ipardiatei hita ambilan on, patut do tongon hita marmalas ni uhur selaku na dob tinobus ni Naibata janah irik hujai ihorjahon hita homa aha na patut horjahononta.

2. Marhitei ambilan on, dong piga-piga pahara na sihol renunghononta, na patotap uhur, na gabe malas ni uhur, tapi dihut do homa pasal  sibahenonta, pasal tanggung-jawabta sadokah goluhta on. 

Parlobei. Parduli ope Naibata bani na tinompaNi. Anggo ipardiatei hita terjemahan hata Indonesia, bani ayat 31-33 jumpah hita do piga-piga hali hata ‘biarlah’ (Inggeris: let), na boi mararti : paturut ma, padihut ma, sihol ma.  Paturut ma marmalas ni uhur langit, anjaha marolob-olob tanoh on. Langit pakon tanoh na itompa Naibata bani mungkahni dear, bahkan ibagas keserasian pakon tinompa na legan iidah Naibata “domma dear tumang” (1 Musa 1:31), domma maseda ibahen jolma. Ai taratur ope langit sonai tanoh nuan on? Cuaca na lang manontu, hamilason na martambah-tambah, banjir na lang isangka-sangka, pakon na legan! Ibagas na sonai ai porlu idingat hita jolma, Naibata do na manjadihon na adong in, Ia do simadasi, Ia do Raja ni haganupan! Laut pakon ganup isini, ladang pakon ganup na iatasni, sonai pakon harangan sihol ma marolob-olob mamuji Naibata na manompasi. Tapi nuan, laut domma gabe sihabiaran, isini, ihan pakon binatang laut na legan in mandoruhi  halani pencermaran, ladang pakon harangan pe marsurak halani biar : bois ma hanami! Ibagas na sonin ma roh Naibata manguhum, patugahkon ija na lepak, janah mangajarhon sonaha na sintong sibahenonta, selaku jolma na iparentahkon Naibata laho manrajai, mengelola pakon merawat haganup jadi-jadianNi.

Paduahon. Puji ma Jahowa ai layak do Ia, ronsi sadokah ni dokahni do idop ni uhurNi. Seng ongga ipuji hita halak na mambahen na lang madear hubanta. Jadi, maningon iahapkon janah iparhatongon hita do pambahenan ni Naibata na madear banta ase tubuh uhur pamujion humbanta. Naibata totap ope layak, idop ni uhurNi lang marnarotap, iparmudu, isarihon, ibere banta haporluan pardagingon pakon partonduyon. Lang singgan parsatongkinan on, tapi dihut hagoluhan na manongtong. Anggo ibere ma AnakNi in bahen partobusta, na legan-legan in pe seng anjai lang bereonNi banta. Bani haganupan in patut do pujionta Ia.

Patoluhon. Urupi Ham ma hanami! Dilo-dilo pakon pangindoan na sonon ma ra sibahatan luar age humbagas uhur pakon pamangan ni hita na porsaya tarlobih ibagas panorang sonari. Tontu hal na patut do in, halani porsaya do hita bani kuasa ni Naibata na mangatasi haganup, janah homa ihaporsayai hita do paridop ni uhur do Tuhanta. Sihabiaranta nuan sedo kuasa atap panggomgomion ni bangsa na legan songon na idompakhon Israel bani panorangni, tapi naborit na mambahen hita sindunia on do marhamaholon bani  buei sisi ni pargoluhon. Sonai pe, itangihon Naibata do tonggo, dilo-diloonta

Marsurak, marolob-olob ma bani Tuhan, ipardulihon ope hita, iajari bani na patut, ipasingat bani na ulang. Iparditei, isarihon do hita anjaha itangihon sora dilo-dilonta. HataNi in do na mangajarhon in banta. Amen.

 

Pdt.Jaharianson Saragih, PhD, Ambilan Partonggoan, 1 Mei 2020 (Epesus 5:15-21)

Pdt.Jaharianson Saragih, PhD, Ambilan Partonggoan, 1 Mei 2020 (Epesus 5:15-21)

 

Hita haganupan na hinarga Jesus Tuhan

Aha do isu atap masalah na sihol ibalosi apostel Paulus marhiteihon surat hu kuria Efesus secara spesifik? Adong do? Anggo adong pasal aha ma ai?

Surat Efesus on tarmasuk bindu  5:15-21 isurathon dalam rangka pasingathon, paratahkon pasal aha do hataridahan, aha do faktor penanda pakon pembeda secara substansial antara halak na porsaya dob ipilih, na domma ipaluah, na dob pinapansing, na bertumbuh menuju kedewasaan iman, na dob pinabayu pakon halak na lape. Ase tertarik halak laho porsaya bani Tuhan Yesus. 

Adong do hinaotini jumpah hita ompat kategori faktor penanda pakon pembeda songon na sinobut bani perikop na i atas pakon sebelumni.  

Faktor penanda/pembeda na pertama ai ma soal kematangan   emosional. Halak karisten na domma pinapansing, pinaluah, pinabayu, manggoluh ibagas haliharon, bertumbuh menuju kedewasaan rohani lebih matang secara emosional, lobih mampu mengendalikan emosinya ketimbang na lape dalam segala situasi (Ef 4:26-31). Tentu bukan perkara yang mudah.

Faktor penanda/pembeda na paduahon ai ma bani sisi perilaku dan pikiran(15-17).

Faktor penanda/pembeda halak karisten na domma pinapansing, pinaluah,pinabayu, manggoluh ibagas haliharon, bertumbuh menuju kedewasaan rohani ai ma bekhikmat, pangkei manggunahon panorang janah rindu mencari kehendak Tuhan. Baik pikiran suang sonai perilakuni diarahkan untuk mencari kehendak Tuhan, untuk waspada atas kemungkinan pengaruh lingkungan pakon pengaruh roh zaman. Faktor pembeda na paduahon secara perilaku pakon pikiran ai ma   lang urah taruyun.  Lang urah dihanyutkan arus tapi marhagogohon melawan arus. Lang sekedar gabe pengikut arah tapi dihut gabe penentu arah. 

Sungkun-sungkunni sonari ai ma sibar ja do faktor penanda/pembeda on na berkhikmat, na rindu mencari kehendak Tuhan masih jelas bani hagoluhanta. 

Napatoluhon (18-20)

Faktor penanda/pembeda  halak karisten na domma pinapansing, pinaluah, pinabayu, manggoluh ibagas haliharon, bertumbuh menuju kedewasaan rohani napatoluhon ai ma: dari sisi kematangan hidup  Spiritual (rohani).  Igoki Tonduy, goluh na gok pamujion, goluh sipartarimakasih. Bohini minar memancarkan sukacita. Kehadiranni ditungu-tunggu orang bukan dijauhi. Kehadiranni menularkan sukacita bani orang lain. Setiap bertemu kita terinspirasi halani sukacita na memancar humbani goluhni.  

Anggo goluh halak na porsaya domma igoki Tonduy na Pansing langdikendalikan oleh nafsu duniawi. Ia lang gabe korban roh-roh zaman janah lang urah binoan-boan logou ni ajaran (4:14). Ia lang dikendalikan oleh kesenangan, atap hidup hanya untuk mencari kesenangan atap kenikmatan belaka,  songon nini ahli psikologi Sigmund Freud tapi dikendalikan oleh Roh kudus. Sehingga rindu untuk selalu mencari dan menyatakan kebenaran.

Faktor pembeda na parpudi isobut bani ayat 21 atap cerdas secara sosial. Saling mendukung, saling menopang lang saling menjatuhkan. 

Mulak hubani pesan perikop nongkan aha do penanda/pembeda  na adong banta na mambahen hita marbeda pakon halak na legan? Pesan Firman Tuhan cerdaslah secara emosional, cerdaslah secara perilaku dan cerdaslah secara moral pakon spiritual on ma faktor pembeda hita pakon orang dunia. on ma penanda bahasa hita ai ma halak na porsaya na domma pinaluah, pinapansing, pinabayu, manggoluh ibagas haliharon, bertumbuh menuju kedewasaan rohani. Ase tertarik halak na legan gabe porsaya bani Tuhan Yesus. Amen. 

 

Ambilan 24 Nopember 2019 (Habakuk 3 : 1 – 6 HABIARI MA JAHOWA !)

Ambilan 24 Nopember 2019

Habakuk 3 : 1 – 6 

HABIARI MA JAHOWA !

1. Ambilan on aima tonggo ni nabi Habakuk. Bani tonggoni, itanda Habakuk do Jahowa sebagai na sangap janah siparkuasa bani haganup na i atas tanoh on. Parholong do Ia tapi parringis do homa. Jahowa do na paluahkon bangsa Israel ibagas holong, sebalikni  sipanringis do Ia hubani halak Masir na mangodoh-odoh bangsa-Ni. Anggo manringis Naibata lang adong na tahan i lobei-Ni, sebalikni lang adong na boi mangolati horja-Ni paluahkon bangsa-Ni. Iakuhon Habakuk bahwa Naibata do na berotoritas bani sab tanoh on. Halani hajombuton-Ni nini bani ay.5 ‘mardalan do sampar i lobei-Ni, anjaha irik do ipudi-Ni bunrung’ (Ind. sakit sampar dan demam). Na dua naborit on sangat ihabiari do panorang ai. Sonin ma sitaronon mangonai bani jolma na lang marhabiaran hu-Bani. Bahkan isobut, anggo jongjong Ia dugur ma tanoh on, anggo mangkawah Ia mangkalumpat bangsa halani hirjatni, masarsar ma dolog-dolog anjaha marongrong buntu-buntu (ay.6). On sihol patugahkon gok bani kuasa-Ni do tanoh on, lang adong na mampu bertahan i lobei-Ni. Domu hujin ma iojur ase marhabiaran janah marondos jolma in pitah hu-Bani. Pitah marondos hubani Jahowa do hansa dalan ase boi maluah sedo bani na adong i tanoh on.

HUJA DO HAM DOB MATEI HAM ? (Sibasaon 24 Nopember 2019 Mateus 13 : 47 – 50)

HUJA DO HAM DOB MATEI HAM ?

Sibasaon 24 Nopember 2019

Mateus 13 : 47 – 50 

1. Ambilan on aima pangajaran ni Tuhan Jesus pasal harajaon nagori atas na ipadas marhitei limbaga. Usih hubani sipanjala na manampakkon jalani hu laut, dob gok ikan, itarik ma jala ai hu darat janah dekke na madear inahkon hu bagas raga tapi na so madear iambukkon. Jala manggambarhon hata ni Naibata na ipadas bani jolma. Ise na manjalo janah mangkagoluhkon Hata ai jumpahan haluahon, tapi na manulak gabe hona uhum. Sonai ma masa bani ajal ni dunia on, laho do malekat manirang parjahat humbani parpintor. Ambilan on martudu-tudu hubani panorang paruhuman bani parroh ni Tuhan Jesus padua-halihon hu dunia on. 

BAYAK BANI HOLONG AMPA HORJA NI TUHAN (Ambilan 17 November 2019 Pilipi 4 : 10 – 20)

BAYAK BANI HOLONG AMPA HORJA NI TUHAN

Ambilan 17 November 2019

Pilipi 4 : 10 – 20 

 

1. Itarimaksihkon Paulus do sibere-bere ni kuria Pilipi na dihut mangurupisi bani horja parambilanon. Na tang ihamalaskon Paulus aima halani marbuah do Ambilan Namadear na ijalo kuria ai marhitei na sirsir mangurupi horja parambilanon. Ambilan Namadear patubuhkon uhur holong janah sirsir sipardihut manumpaki horja parambilanon. Memang secara waktu poso ope kuria ai tapi anggo bani buah domma lambin matoras. Ipataridahkon sidea do tanggungjawabni sebagai kuria na lang pitah sirsir iidangi tapi kuria na sirsir homa menunaikan tugas ampa tanggungjawabni do. Sifat marsibere-bere idalankon sidea sedo halani marlobih-lobih atau bayak sidea bani arta tapi halani domma bayak bani haporsayaon. Haporsayaon do na menggerakkon sirsir manumpaki horja parambilanon domu hubani na tarbahen sidea. Kuria Pilipi domma manggoluh ibagas haporsayaon ampa pambahenan. Sobuton ma, marhitei horja atap pambahenan do taridah haporsayaon na manggoluh.

BAYAK BANI HOLONG NI UHUR (Sibasaon 17 Nopember 2019 5 Musa 24 : 19 – 22)

BAYAK BANI HOLONG NI UHUR

Sibasaon 17 Nopember 2019

5 Musa 24 : 19 – 22 

1. Mardingat sejarah masa lalu marguna tumang laho menyadarhon hita pasal idop ni uhur ampa haluahon na dob ijalo hita humbani Naibata. Kesadaran na sonon akan berdampak membenuk cara berfikir ampa cara hidup na lambin martarimakasih janah pasangapkon Naibata. Sonin ma ipaingat halak Israel bahwa jabolon hinan do sidea i Masir, tapi halani idop ni uhur ni Naibata boi gabe bangsa na merdeka janah tarpasu-pasu (ay.22). Marhitei kesadaran na sonin ipangindo do ase sipambalosi sidea hubani Naibata. Salah sada hataridahanni aima, maningon gabe jolma siparholong homa sidea usih songon Naibata na mangkaholongi ampa mamasu-masu sidea. Biak ni Naibata siparholong ai maningon nyata bani goluh ni sidea ari-ari tarlobih bani parsaoran sesama sidea.

HOLONG DO URAT NI PARRUMAHTANGGAON (Ambilan 03 Nopember 2019 Epesus 5 : 22 – 33)

HOLONG DO URAT NI PARRUMAHTANGGAON

Ambilan 03 Nopember 2019

Epesus 5 : 22 – 33 

 

1. Tontu malas do uhur anggo pasu-pasu na ijalo hita surung humbani na legan. Tapi gati on patubuhkon gijang ni uhur janah tubuh sikap paetek-etekkon hasoman. Sasintongni anggo lobih ijalo hita sibere-bere mararti do ai lambin surung homa tanggungjawabta halani statusta aima sebagai penatalayan atap na mengelola sibere-bere ni Naibata do. Hita jolma pe surung do itompa Naibata marimbang tinompa na legan halani itompa do hita usih hubani rupa ni Naibata (imago dei). Hasurungan ai lang terlepas humbani tanggungjawab manramotkon haganup tinompa na legan bahen hasangapon ni Naibata. Usih sonai do age paramangon ampa parinangon bani rumah tangga. Marbeda do sidea tapi perbedaan ai sedo mengarah hubani kuasa tapi hubani tanggungjawab do.  

SAUHUR SAPINGKIRAN MANGKORJAHON ROSUH NI TUHAN ! (Sibasaon 03 Nopember 2019 1 Musa 3 : 6 – 13)

SAUHUR SAPINGKIRAN MANGKORJAHON ROSUH NI TUHAN !

Sibasaon 03 Nopember 2019

1 Musa 3 : 6 – 13 

1. Sada do dalahi pakon naboru itompa Naibata bani parrumahtanggaon. Hasadaon ai martujuan ase riap janah marsada ni uhur sidea mangkorjahon hata ni Naibata sedo mangkorjahon hajahaton. Sonin ma ibere Naibata hata-Ni bani jolma na parlobei (Adam pakon Hawa) janah ipatugah bahwa hamateian do konsekwensi ni anggo ilanggar sidea hata-Ni. Tapi ilanggar sidea do hata ni Naibata marhitei na mangankon buah ni hayu na ilarang Naibata. Tergiur do Hawa bani jengesni buah ni hayu ai sehingga ipangan janah ibere homa hubani paramangonni si Adam. Lang pala homa isungkun si Adam hunja buah ai tapi langsung do ipangan. Hasadaon ni sidea lang be mangkorjahon na madear tapi domma mangkorjahon dosa. Halani ai, pori pe na madear do isurahon Naibata bani parrumahtanggaon tapi na jumpah hamateian ampa uhuman do use, iusir do sidea hun taman Eden. Sonin ma ulih ni rumah tangga na lang sada mangkorjahon hata ni Tuhan. Sekaligus do on gabe singat-singat banta ase ulang ma halani hajengeson ni dunia, halani bueini tawaran-tawaran na indah humbani sibolis gabe lupa hita bani hata ni Naibata.  Ningon isadari hita bahwa hasedaon do ulih ni jolma na manlangar hata ni Naibata. 

TANGIHON MA PODAH ! (Ambilan 10 Nopember 2019 Podah 19 : 20 – 29)

TANGIHON MA PODAH !

Ambilan 10 Nopember 2019

Podah 19 : 20 – 29 

 

1. Podah atau hikmat aima pangajaran na marharohan humbani Naibata martujuan laho patorsa goluh ni jolma. Porlu isadari bahwa haganup na i tanoh on marianan do i toruh kuasa ni Naibata sehingga na manjalo pangajarion ni Naibata, ai do na boi mardohar bani goluhni. Isobut ‘Buei do ranggian ni jolma, tapi sura-sura ni Jahowa do na saud’ (ay.21). Artini, lang mangasup gogoh atau hapentaron ni jolma patorsahon goluhni. Lang markuasa jolma humbani gogohni pakon ranggianni mambere jaminan hadearon bani dirini halani Jahowa do na berotoritas bani haganup na i atas tanoh on. Domu hujin ma iporluhon manangihon pangajarion ni Jahowa (ay.20). Manangihon lang sekedar manangar tapi mangkagoluhkon. Marhitei na sonai ma jolma in lang be kahou humbani hauhuron (ay27), maksudni: domma memiliki sisi pandang na baru na boi manimbangi aha na madear ampa na lang madear janah isimbili do sagala horja hajahaton ampa hagedukon. Marhitei podah ai do tubuh pangarusion bahasa uhuman ampa lonsing-lonsing do rupei ni parjahat (ay.29), tapi bosur janah sonang do modom halak na manangihon podah (ay.23). Halani ai ihagigihon sitangihon podah do sagala horja hajahaton tapi na lang manangihon podah mantin do bani horja hajahaton halani haotoonni (ay.28). Pondok do hansa pingkiran ni parjahat halani haotoonni halani lang mamingkirhon akibat ni hajahatonni, sebalikni na manangihon podah takkas do ibotoh na itumpakkon Jahowa sagala na madear bani goluhni. Na manangihon podah lang ra terlena pori pe adong kenikmatan bani horja hajahaton halani domma ibotoh pitah sesaat do ai.

HORJAHON MA HORJAMU IBAGAS BIAR BANI TUHAN ! (Sibasaon 10 Nopember 2019 Epesus 6 : 1 – 9)

HORJAHON MA HORJAMU IBAGAS BIAR BANI TUHAN !

Sibasaon 10 Nopember 2019

Epesus 6 : 1 – 9 

1. Marbeda-beda do status, horja ampa talenta na ipaondos Tuhan bani jolma. Secara status keluarga adong anak ampa orangtua ; Secara horja ampa talenta adong jabolon/siparhorja ampa kopala/tuan. Tapi perbedaan ai sedo laho manirang hasadaon antar sesama tapi laho pasadahon do marhitei na masing-masing bertanggungjawab mamakeihon status atap horjani bei ase boi marguna na sada hubani na legan. Haganupan do ningon menyadari janah mantarimakasihkon hajongjonganni bei, ulang ma ipaksahon maningon sarupa ia pakon halak na legan. Anggo anak marparlahou sebagai anak ma, orangtua marpambahenan ma sebagai orangtua, anggo jabolon pokkut ma mangkorjahon horja ni tuanni, anggo kopala iramotkon ampa ihaholongi ma jabolonni. Ulang ma ipakei perbedaan ai gabe kesempatan gabe marsisidingan (ituk), margijang ni uhur, marsiakal-akalan, mangkorjahon na masambor, pnl.

Go to top