HORJAHON MA HORJAMU IBAGAS BIAR BANI TUHAN ! (Sibasaon 10 Nopember 2019 Epesus 6 : 1 – 9)

HORJAHON MA HORJAMU IBAGAS BIAR BANI TUHAN !

Sibasaon 10 Nopember 2019

Epesus 6 : 1 – 9 

1. Marbeda-beda do status, horja ampa talenta na ipaondos Tuhan bani jolma. Secara status keluarga adong anak ampa orangtua ; Secara horja ampa talenta adong jabolon/siparhorja ampa kopala/tuan. Tapi perbedaan ai sedo laho manirang hasadaon antar sesama tapi laho pasadahon do marhitei na masing-masing bertanggungjawab mamakeihon status atap horjani bei ase boi marguna na sada hubani na legan. Haganupan do ningon menyadari janah mantarimakasihkon hajongjonganni bei, ulang ma ipaksahon maningon sarupa ia pakon halak na legan. Anggo anak marparlahou sebagai anak ma, orangtua marpambahenan ma sebagai orangtua, anggo jabolon pokkut ma mangkorjahon horja ni tuanni, anggo kopala iramotkon ampa ihaholongi ma jabolonni. Ulang ma ipakei perbedaan ai gabe kesempatan gabe marsisidingan (ituk), margijang ni uhur, marsiakal-akalan, mangkorjahon na masambor, pnl.

2. Ase boi perbedaan ai bersinergi janah ulang saling marsisedaan, maka haganupan ningon mandalankon tugas pakon tanggungjawabni bei ibagas biar ampa pambalosion hubani Tuhan. Porlu isadari bahwa pori pe marbeda hajongjongan ampa status ni horja, tapi anggo i lobei ni Tuhan sarupa do jolma in, lang adong sigijangan atap sietekan. Perbedaan status ampa hajongjonganta bei lobih mengarah do hubani tanggungjawab sedo untuk kuasa atau tindakan sewenang-wenang.

 

3. Hubani dakdanak, sidea martanggungjawab manangihon podah ni orangtua janah pasangapkon orangtua (ay.1-3). Dakdanak na ibagas pertumbuhan pengajaran maningon mangisi dirini bani podah halani podah ai do na manontuhon dear atap lang masa depan ni sidea. Pasangapkon na matoras mararti do homa sirsir iajari orangtuani. Sebagai na marlajar ope, maka na maningon ihorjahon dakdanak sedo rosuhni tapi rosuh ni sipangajari do aima orangtuani. Dakdanak sitangihon podah pamalaskon uhur ni orangtuani tapi na manulak podah mendukakan orangtuani. Selanjutni orangtua pe maningon berperan gabe siparpodah bani dakdanakni. Ase boi gabe siparpodah, maningon do parlobei mambohali dirini bani podah atau hata ni Naibata, halani lang mungkin na pitung manogu na pitung. Lang boi pitah kemauan ni orangtua ipadas hubani niombahni tapi kemauan atap rosuh ni Tuhan do. Ulang gabe partolsuan orangtua hubani dakdanak tapi gabe na mambohali anak bani hata ni Tuhan do. Ase anggo lang bertumbuh dakdanak ibagas rosuh ni Tuhan, sangat dimungkinkan terjadi halani orangtua lang mandalankon tugas ampa tanggungjawab na ipaondos Tuhan hubani sidea. Pangajarion ai lang homa cukup marhitei hata tapi ningon homa gabe orangtua na talup sitiruon bani pangabak. Tanda ni rumah ni na porsaya aima anggo tarbogei tongtong ijai hata ni Tuhan. Rumah ni na porsaya aima rumah didik hubani dakdanak. Rumah ni na porsaya aima rumah doa.

 

4. Hubani jabolon pe isuruh do ase pongkut mangkorjahon horja ni tuanni. Ihorjahon ma horjani sadear-dearni humbani bujur ni uhur songon bani Tuhan in, sedo bani jolma (ay.7). Maksudni, marhitei horja do terbukti haporsayaon ampa pambalosionni hubani Tuhan. Aha pe horja ampa status ni jolma, haganupan ai maningon ihorjahon ibagas biar hubani Tuhan. Perrtanggungjawaban pertama bani haganup horjanta sedo hubani jolma tapi hubani Tuhan do. Halani ai do ase isobut bani ay.8 ‘suang do jaloon ni ganup humbani Tuhan in, anggo adong na madear na hinorjahonni’. Suang artini lang rugi, isarihon Tuhan do jolma na mangkorjahon horjani ibagas na dear. Selanjutni hubani kopala pe ipaingat ase ulang ipakei jabatanni laho mangodoh-odoh jabolonni. Na mangimbang Naibata do jolma na memanfaatkon jabatanni gabe ikorbanhon halak na legan. Mase? Halani haganup jolma harga do i lobei ni Naibata, janah domma itobus sidea marhitei daroh-Ni. Halani ai jolma na bertindak sewenang-wenang, na bersikap tidak adil hubani sesama doskon na mangimbang Tuhan do ai.

 

5. Refleksi

 

a. Nilai ni sasada halak i lobei ni Tuhan sedo itontuhon aha status atap horjani tapi sonaha ia pasangapkon Tuhan marhitei horjani do. Aha pe status ampa profesinta harga do ai i lobei ni Tuhan halani ai horjahon hita ma haganup horjanta laho pasangapkon goran-Ni. 

b. Ulang ma perbedaan status pakon horja patubuhkon gijang ni uhur atap kecemburuan. Perbedaan status pakon horja sedo mararti marbeda hita i lobei ni Tuhan. 

c. Pertanggungjawabanta na parlobei bani haganup hajongjongan ampa horjanta sedo hubani jolma tapi hubani Tuhan do. Halani ai dalankon hita ma haganup horjanta ibagas biar bani Tuhan. 

d. Lambin sirsir ma hita manjalo ampa mangkagoluhkon podah ni Tuhan ase horja ampa goluhta memancarhon harosuh ni Tuhan janah gabe siboan pasu-pasu hita hubani keluarga ampa dunia on.

e. Haleluya No. 340 : 1, 3.    

Read 1140 times

Leave a comment

Make sure you enter all the required information, indicated by an asterisk (*). HTML code is not allowed.

Go to top