BAYAK BANI HOLONG NI UHUR (Sibasaon 17 Nopember 2019 5 Musa 24 : 19 – 22)

BAYAK BANI HOLONG NI UHUR

Sibasaon 17 Nopember 2019

5 Musa 24 : 19 – 22 

1. Mardingat sejarah masa lalu marguna tumang laho menyadarhon hita pasal idop ni uhur ampa haluahon na dob ijalo hita humbani Naibata. Kesadaran na sonon akan berdampak membenuk cara berfikir ampa cara hidup na lambin martarimakasih janah pasangapkon Naibata. Sonin ma ipaingat halak Israel bahwa jabolon hinan do sidea i Masir, tapi halani idop ni uhur ni Naibata boi gabe bangsa na merdeka janah tarpasu-pasu (ay.22). Marhitei kesadaran na sonin ipangindo do ase sipambalosi sidea hubani Naibata. Salah sada hataridahanni aima, maningon gabe jolma siparholong homa sidea usih songon Naibata na mangkaholongi ampa mamasu-masu sidea. Biak ni Naibata siparholong ai maningon nyata bani goluh ni sidea ari-ari tarlobih bani parsaoran sesama sidea.

 

2. Domu hujin ibere Naibata do aturan bahwa teba-teba ni pariama ni sidea lang boi ulakan mambuat ai tapi maningon ipaturut ai buaton ni halak dagang, na tading maetek pakon puang-puang na mabalu (ay.19-21). Kepedulian bani na musil janah doyuk merupakan aturan na melekat bani bangsa ai. Bahkan lang pitah sanggah panorang pariama ibere aturan bani sidea pasal kepedulian sesama, tapi ibere do homa aturan pasal tahun Sabat (shmita) pakon tahun Jobel (yobel). Tahun Sabat aima setiap tahun papituhon, na isobut homa tahun pelepasan na ija bani panorang ai lang boi isuani juma ni sidea, janah pori adong na tubuh i juma ai gabe parbagianan ni halak na miskin ma ai. Bani tahun Sabat iadongkon do homa pembebasan hutang bani siparutang (3 Musa 23-25). Tahun Jobel (tahun palimapuluhkon) aima tahun pembebasan bani budak atap jabolon ampa pembebasan bani haganup juma na ongga berpindah tangan (3 Musa 25). Hunjon boi iidah hita bahwa Naibata sangat peduli do hubani halak na musil pakon na doyuk i tongah-tongah ni bangsa ai. 

 

3. Aturan on ibere bertujuan menyadarhon sidea bahwa haganup na adong termasuk buah ni juma ni sidea pitah halani idop ni uhur ni Naibata do. Halani sibere-bere ni Naibata do ai, maka pasu-pasu ai ningon ipakei domu hubani rosuh ni Naibata. Harosuh ni Naibata aima holong halani Siparholong do Ia. Halani ai anggo adong i tongah-tongah ni sidea na musil/doyuk ningon gabe kesempatan mandalankon hata ni Naibata marhitei sikap peduli ampa holong. Na gogoh janah marsinadongan ningon gabe panjaliran ni pasu-pasu hubani na galek ampa na marhahurangan. Sirsir mangurupi halak na doyuk janah na musil ai do bukti atap hataridahan ni bangsa ni Naibata. Anggo lobih ijalo sasada halak pasu-pasu sedo mararti na lang markuasa Naibata mambere pasu-pasu na sarupa hubani halak na legan tapi ibahen Naibata sonai bertujuan manguji pambalosion ni sidea hubani Naibata do. Anggo ipasu-pasu Naibata gabe bayak atap marhinadongan, maningon bayak do homa sidea  ibagas holong pakon paridop ni uhuran. Anggo tambah pasu-pasu ulang pitah penampilan na berubah tapi kepedulian do homa. 

 

4. Sekaligus do on mangajarhon bahwa jaminan ni goluh ampa masa depan ni bangsa ai sedo bergantung hubani arta tapi pitah bergantung hubani Naibata do. Anggo setia sidea mandalankon hata ni Naibata, lambin talar panramotion ampa pasu-pasu ni Naibata. Halani ai pambalosion bani Naibata ningon gabe prioritas manlobihi holong bani arta. Ulang holongan uhur bani arta marimbang mambalosi hata ni Naibata. Mase? Halani pori pe junjun arta tapi anggo lang sirsir mambalosi Naibata hasedaon do ujung ni goluh ni sidea halani pitah bergantung bani Naibata do masa depan ni sidea lang bani arta.

 

5. Refleksi

 

a. Ganup na adong banta sibere-bere ni Naibata do ai. Anggo malas uhurta manjalo pasu-pasu ni Naibata, ningon malas do homa uhurta ipakei Naibata gabe panjaliran ni pasu-pasu-Ni hubani hasoman tarlobih na marhahurangan. Tuah ampa pasu-pasu do ai anggo ibere Naibata ope banta kesempatan berbagi halani nini hata ni Tuhan do: martuahan do na  mambere dari pada na manjalo.

b. Anggo lambin tambah arta ampa pasu-pasu ni Tuhan ijalo hita ningon lambin buei ma homa na tarsirom ibahen hita halani lambin marbanggal uhur holong banta. Ulang ma hatanta kopur patugah-tugahkon artanta tapi miskin bani holong janah polit bani halak na marhahurangan. 

c. Doskon na manimpan arta i nagori atas do hita anggo iurupi hita hasomanta na marhasunsahan. Halani ai horja marsibere-bere sedo harugian tapi paruntungan do. 

d. Buei do nuan jolma na lang marhahurangan tapi lang boi mangan na enak janah sipanganonni pe ibatasi ma halani faktor kesehatan. Ra do sonai torus das hubani na marujung goluh. Anggo marujung goluhni tading ma homa artani.  Ternyata lang mampu arta na i tanoh on paluahkon hita pitah Naibata do. Halani ai hubani Naibata ma hita marpangajaman ulang hubani arta.

e. Haleluya No. 216 :  1,6,8.  

 

Read 1160 times

Leave a comment

Make sure you enter all the required information, indicated by an asterisk (*). HTML code is not allowed.

Go to top