Ambilan 24 Nopember 2019 (Habakuk 3 : 1 – 6 HABIARI MA JAHOWA !)

Ambilan 24 Nopember 2019

Habakuk 3 : 1 – 6 

HABIARI MA JAHOWA !

1. Ambilan on aima tonggo ni nabi Habakuk. Bani tonggoni, itanda Habakuk do Jahowa sebagai na sangap janah siparkuasa bani haganup na i atas tanoh on. Parholong do Ia tapi parringis do homa. Jahowa do na paluahkon bangsa Israel ibagas holong, sebalikni  sipanringis do Ia hubani halak Masir na mangodoh-odoh bangsa-Ni. Anggo manringis Naibata lang adong na tahan i lobei-Ni, sebalikni lang adong na boi mangolati horja-Ni paluahkon bangsa-Ni. Iakuhon Habakuk bahwa Naibata do na berotoritas bani sab tanoh on. Halani hajombuton-Ni nini bani ay.5 ‘mardalan do sampar i lobei-Ni, anjaha irik do ipudi-Ni bunrung’ (Ind. sakit sampar dan demam). Na dua naborit on sangat ihabiari do panorang ai. Sonin ma sitaronon mangonai bani jolma na lang marhabiaran hu-Bani. Bahkan isobut, anggo jongjong Ia dugur ma tanoh on, anggo mangkawah Ia mangkalumpat bangsa halani hirjatni, masarsar ma dolog-dolog anjaha marongrong buntu-buntu (ay.6). On sihol patugahkon gok bani kuasa-Ni do tanoh on, lang adong na mampu bertahan i lobei-Ni. Domu hujin ma iojur ase marhabiaran janah marondos jolma in pitah hu-Bani. Pitah marondos hubani Jahowa do hansa dalan ase boi maluah sedo bani na adong i tanoh on.

 

2. Domu hujin roh do Habakuk padaskon tonggoni ibagas biar (ay.1). Hata biar ijon mararti ibagas hormat, bulus ni uhur marondos hubani Naibata janah sirsir manangihon ampa mandalankon hata-Ni. Tangkas do isadari bahwa lang talup namin ia roh hu lobei ni Naibata anggo humbani hadirionni tapi ibotoh do paridop ni uhur do Naibata sehingga ipatalup do ia roh hu-Bani. Artini, ibotoh Habakuk do bahwa parholong do Naibata bani jolma na marhabiaran hu-Bani tapi panringis do Ia bani halak na lang sirsir manangihon hata-Ni. Uhur biar on do mambahen Habakuk roh hu lobei ni Naibata ibagas haporsayaon. Gabe parlajaran na harga do on age banta halani boi do terjadi roh hita hu lobei ni Naibata ibagas tonggo, ibadah tapi gati uhurta lape ibagas biar mangidah Naibata marhitei na lang sirsir manangihon hata-Ni. Uhur biar do na mambahen roh hita hu lobei ni Naibata ibagas haporsayaon, atau anggo lang adong uhur biar bani Naibata lape sintong hita halak na porsaya..

 

3. Itonggohon Habakuk do ase tongtong holong ni Naibata marianan bani bangsa-Ni janah ase ulang ringis ni Naibata mangonai bani sidea. Bahkan isobut ‘pabayu Ham ma ai bani partongahan ni tahun, bani partongahan ni tahun ma tongon pabotohkon Ham ai’ (ay.2), maksudni, ihaporsayai Habakuk bahwa markuasa do Naibata bertindak bani ganup panorang manramotkon bangsa-Ni. Halani ai pori pe gati buei idompakkon bangsa-Ni hamaholon tapi porsaya do Habakuk bani ganup panorang do sidea marianan bani jangkawan holong ni Naibata laho paluahkon sidea. Halani ai lang adong istilah gobir atap mandolei bani bangsa ni Naibata.

 

4. Ipatugah do homa bahwa ‘Roh do Naibata hun Teman, anjaha Na mapansing salian ai hun Dolog Paran (ay.3). Teman (arah Selatan) na secara geografis aima Betlehem, aima huta hatubuhon ni Mesias. Dolok Paran patugahkon hasangapon ampa habanggalon ni Jahowa na ipausih hubani sada pahlawan na roh paluahkon ampa mamasu-masu bangsa-Ni (bd. 5 Musa 33:2). On martuduh-tuduh hubani parroh ni Mesias hu tanoh on. Gabe tangkas ma bahwa Naibata lang pitah paluahkon bangsa-Ni hun Masir tapi dihut do paluahkon humbani gomgoman ni dosa ampa hamateian sehingga boi parsimada bani hagoluhan na sadokah ni dokahni. Pori pe idagei jolma hamateian tapi lang be markuasa hamateian manrahut goluh ni na porsaya hu-Bani.

 

5. Refleksi

a. Haporsayaonta hubani Naibata, ai do na boi patoguh uhurta mandalani goluh on. Pori pe ragam na masa bahkan sitaronon, markuasa do Naibata pamonangkon hita asal ma sintong hita marondos janah porsaya hu-Bani. Haporsayaon na lang toguh do mambahen gati magou malas ni uhurta. 

b. Marhitei na dob tangkas panandionta bani Naibata gabe roh ma hita martonggo hu-Bani ibagas uhur biar. Ulang ma roh hita hu-Bani hape lape ibagas biar janah haporsayaon, pitah hata marhatengeran tapi pangabak lang pasangapkon Naibata. Hatengerhon janah haporsayai hita Ia, ulang ma marpangunsandeian bani gogohta ampa na adong i tanoh on.

c. Minggunta aima Ujung Tahun Kuria (pardingatan bani na matei). Ambilan on sihol menyadarhon hita bani kefanaanta sebagai jolma na maningon manuju hamateian halani dosa. Tapi i balik ni ai tubuh do malas ni uhurta halani marhitei holong pakon kuasa ni Naibata domma italuhon kuasa ni  dosa ampa hamateian sehingga jumpahan hita bani parpuhoon ampa hagoluhan.

d. Lang sihabiaran be hamateian tapi na tang sihabiaran anggo lang porsaya hubani Naibata do halani ringis do ulih ni na lang porsaya.

e. Haleluya No. 407 : 1 – 2 .

Read 1202 times

Leave a comment

Make sure you enter all the required information, indicated by an asterisk (*). HTML code is not allowed.

Go to top