Ambilan & Sibasaon (187)
HAPORSAYAON NA MARBUAH MA ! (Sibasaon 15 April 2018, Epesus 2 : 4 – 10)
HAPORSAYAON NA MARBUAH MA !
Sibasaon 15 April 2018, Epesus 2 : 4 – 10
1. Surat Epesus isuratkon Paulus hu kuria Epesus tahun 62/63 sanggah ipenjara Roma ia. Panorang ai hakristenon buei menghadapi podah-podah na kahou. Paulus paingatkon ase ulang taruyun kuria tapi sebalikni totap ma pataridahkon pargoluhan na domu bani Ambilan Na Madear. Ulang terpengaruh tapi na mempengaruhi atap na manggarami ma i dunia on marhitei na mangkagoluhkon hata ni Tuhan. Surat on bertujuan patoguhkon haporsayaon ampa panandaion ni kuria bani holong ni Tuhan Jesus.
2. Ipatugah bahwa hinan sidea manggoluh ope ibagas dosa na marbuahkon hamateian tapi nuan domma ilayak-layakkon Naibata hasasapan ni dosa marhitei Kristus. Marhitei parmatei ni Kristus, kuria in domma matei ibagas dosa janah marhitei parpuhoon-Ni, kuria in pe domma dihut ipapuho gabe margoluh na baru (ay.4-6). Maksudni, ibagas Kristus kuria in domma tubuh padua halihon gabe jolma na baru aima goluh na dob ipapansing marhitei daroh ni Kristus. Sidea domma imerdekahon humbani biak ni dosa (goluh na lama) gabe tubuh ma biak na baru aima biak na marhapansingon. Biak na baru taridah marhitei na ringgas bani horja na madear. Haluahon ai dihut mambere gogoh bani kuria ase mampu manimbili dosa janah margogoh mangkorjahon na madear. Ase status sebagai halak na porsaya lang pitah perobahan nama tapi dihut do perobahan sifat pakon cara hidup.
PARMAHANI MA BIRI-BIRING-KU ! (Ambilan 08 April 2018, Johanes 21 : 15 – 19)
Ambilan 08 April 2018
Johanes 21 : 15 – 19
PARMAHANI MA BIRI-BIRING-KU !
1. Dob puho Tuhan Jesus humbani na matei, tubuh do malas ni uhur ampa panandaion na baru bani susian pasal Tuhan Jesus na markuasa do tongon Ia manaluhon hamateian. Panandaion na baru on menjadi kekuatan na baru bani susian laho manaksihon hamonangan ni Tuhan Jesus bani dunia on.
2. Ibotoh Tuhan Jesus do homa na laho itadingkon ma susian-Ni halani na laho mulak ma Ia hubani Bapa-Ni. Halani ai iondoskon do tugas hubani susian laho mambaritahon parpuhoon ampa haluahon ai bani sab dunia on. Domu hujin isukkun Tuhan Jesus do si Petrus pasal holong ni uhurni hu-Bani. Mase? Halani bani na mambaritahon Ambilan Na Madear pasal Tuhan Jesus adalah tugas na sangat porlu janah maningon idalankon tapi sekaligus iperhadapkon homa hubani resiko atau tantangan bani horja ai. Ase ulang mundur bani horja ai ningon parlobei terbangun holong ni uhur bani Tuhan Jesus. Artini, Tuhan Jesus sihol patalarhon holong-Ni bani dunia on marhitei hasaksian na ipadas susian. Holong do uhur ni Jesus bani haganup jolma janah haluahon na ihorjahon-Ni ai menjangkau haganup jolma. Halani ai mangkaholongi Tuhan Jesus mararti mangkaholongi ganup jolma marhitei na padaskon barita haluahon ai bani sidea.
3. Pala do tolu hali isungkun Tuhan Jesus si Petrus pasal holongni bani Tuhan Jesus. Tujuanni ase tertanam ibagas uhurni pasal hinaporluni tugas marasaksi janah ase ulang mundur ia humbani tugas ai pori pe buei ancaman na ihadapi. Ibotoh Tuhan Jesus do bahwa horja ai lang na urah sehingga mamorluhon komitmen na bagas pasal holongni bani Tuhan Jesus. Semakin bagas holong pakon panandaion bani Tuhan Jesus, ijai ma semakin berani janah pongkut susian mandalankon horja na ipaondos Tuhan Jesus. Itandashon Tuhan Jessus bahwa bukti na holong uhur ni susian hu-Bani aima ‘Parmahani ma biri-biring-Ku’, sirsir marmahani biri-biri ni Tuhan Jesus aima jolma na gok ibagas haotoon, hagalekon halani dosa. Halani ai tugas ni susian aima patugahkon dalan hasintongan ampa mambobai biri-biri (jolma in) ase ulang lalap mardalan baani hakahouon ampa dosa na manuju hamateian. Ungkapan atau hata marmahani mengandung makna atau sifat na sirsir marhasabaron, marhapongkuton janah sirsir manaron atau berkorban demi tugas marmahani.
4. Manaksihon Ambilan Na Madear ningon idasari hubani holong bani Tuhan Jesus. Janah holong bani Jesus ai idasari hubani haporsayaon bahwa Tuhan na marhamonangan do Tuhan Jesus bahkan markuasa manaluhon hamateian. Artini, pori pe manaron janah berkorban bani horja ai bahkan agouan hosah, tapi domma ihaporsayai bahwa sedo sisoya-soya goluh ni sidea halani domma ibotoh janah ihaporsayai bahwa domma dihut sidea bani hamonangan ampa parpuhoon ni Tuhan Jesus das bani goluh na i surga. Halani ai orientasi atau tujuan utama ni susian manggoluh i dunia on aima mamakei ganup gogoh ampa kesempatan laho mambaritahon Ambilan Na Madear. Ningon isadari homa bahwa terbatas do kesempatan ai halani ai ningon pokut janah ulang lansei mamakei panorang. Ningon isadari homa bahwa lang adong dalan haluahon na ipasirsir Naibata sobali marhitei Tuhan Jesus. Halani ai ningon do iporluhon mangambilankon haluahon ibagas Tuhan Jesus ai bani dunia on.
5. Refleksi
a. Tugasta do sebagai kuria ni Tuhan manaksihon Tuhan Jesus bani sab dunia on. Marsaksi marhitei hata pakon pambahenan. Gereja na manggoluh aima gereja na marsaksi.
b. Marsaksi aima patugahkon dalan haluahon bani dunia na dob kahou ibagas dosa ase mulak sidea hubani dalan na iharosuhkon Naibata.
c. Ambilan Na Madear lang pitah ijalo tapi ningon isaksihon janah ihagoluhkon do. Marhitei goluh ni na porsaya tercermin ma bani lingkunganta pasal holong ni Tuhan Jesus ampa hata ni Tuhan.
d. Manaksihon Ambilan Na Madear sangat rentan mandapot penolakan humbani dunia on. Tapi lang boi ai alasan untuk berhenti bani horja ai. Sangat iporluhon komitmen iman ase mampu berkorban janah menderita halani horja ai.
e. Malas ni uhur bani na porsaya sedo anggo lang adong sitaronon atau mengambil posisi aman janah menghindari resiko marhitei na lang marsaksi, tapi marmalas ni uhur aima anggo ipakei Tuhan ope ia laho marsaksi pori pe sipata manaron ia bani horja ai.
f. Haleluya No. 497 : 1 – 2
JAHOWA DO PARMAHAN BOLON BANTA (Sibasaon 08 April 2018, Psalmen 23 : 1 – 6)
Sibasaon 08 April 2018
Psalmen 23 : 1 – 6
JAHOWA DO PARMAHAN BOLON BANTA
1. Ambilan on aima psalmen ni Daud na marisi hasaksian pasal kuasa ampa holong ni Naibata na tongtong marmahani goluhni. Gati do ialami Daud ancaman humbani musuhni halani kesetiaanni mangirikkon Naibata tapi bani ganupan ai iahapkon do na lang ongga itadingkon Naibata ia bahkan isaksihon do homa bahwa lang markuasa munsuhni atau parjahat parseda goluhni. Halani ai bani ganup na masa iakuhon do bahwa maningon mardalan do ia bani dalan na ipatuduhkon Naibata halani ijai do boi jumpahsi gogoh ampa malas ni uhur. Parpsalmen memiliki komitmen untuk totap margoluh ibagas hapintoron pori pe aha na masa. Ia lang ra larut mangirikkon tahi atau dalan ni parjahat pori pe gabe ihagigihon parjahat ia halani ai.
2. Sadalan hujin iakuhon do homa bahwa rasa aman lang itontuhon ija ia marianan tapi nini ‘age pe mardalan au bani lombang bagas ni hagolapan, seng mabiar ahu, ai Ham do mangkasomani au’ (ay.4). Lombang bagas hagolapan gati iartihon goluh na sangat borat bahkan ipausih hubani jolma na dob matei. Tapi bani ianan ampa keadaan na sonai pe iakuhon do bahwa lang mabiar ia. Hatahonon rasa aman bani parpsalmen sedo itontuhon ianan ampa keadaan tapi anggo domma rap pakon Naibata do ia. Ia lang ongga merasa lungunan bani ianan na lungun halani adong do Naibata manungkoli ampa manramotkon. Ia lang gobir age ilobei ni munsuh halani Naaibata do sinjata ampa gantar bani (ay.5). Iakuhon par-psalmen, ‘sirnib do panginumanku’ (ay.5), maksudni: tuk do gogoh pakon kuasa ni Naibata manjaga ia humbani haganup keadaan ampa munsuh. Bahkan ia boi menikmati malas ni uhur pori pe buei ancaman anggo domma rap pakon Naibata.
3. Ipatugah do hubungan ni Naibata pakon par-psalmen sebagai Parmahan hubani biri-biri. Artini, sadar do parpsalmen na galek do ia janah lang mampu paluahkon dirini humbani ganup ancaman anggo humbani kekuatanni usih songon biri-biri na rawan bani ancaman tanpa kehadiran ni parmahan. Par-psalmen lang mangunsagah bani gogohni tapi memilki sifat martoruh ni uhur i lobei ni Naibata. Sebagai biri-biri, par-psalmen totap do mambuka goluhni bani pambobai atau pandu ni Parmahan aima Naibata. Na idalankon bani goluhni sedo aha na ibagas pingkiranni sandiri tapi aha na ihatahon Naibata do. Ia lang ra mamaksahon kemauanni tapi totap palobeihon kemauan ni Naibata. Marhitei sikap na sonai ma ialami kekuatan ampa keamanan na dahsyat halani Naibata do na manjaga ampa marmahanisi.
4. Marhitei pengalaman rohani ai ipatugah par-psalmen do homa sihol ni uhurni ase marianan ia i rumah ni Jahowa sadokah ni dokahni (ay.6). Rumah ni Naibata aima ianan marlajar ampa manjalo hata ni Naibata, ianan mamuji Naibata, ianan martarimakasih bani Naibata. Sonin ma sikap ni par-psalmen na totap siholan janah horahan manangihon hata ni Naibata. Lambin marianan hata ni Naibata ibagas hadirionni, lambin iahapkon do lambin margogoh ia janah lambin marmalas ni uhur. Hata ni Naibata do na manggoki uhurni lang be sora ni dunia on. Janah marhitei aima homa ia mambahen kesimpulan bahwa goluhni maningon do totap mamuji pakon pasangapkon goran ni Naibata bani ganup ianan ampa na masa.
5. Refleksi
a. Sebagai halak na porsaya, gati do ialami hita ancaman humbani munsuhta aima halak parjahat na i dunia on. Bani keadaan na sonai ningon totap ijaga hita jati dirinta sebagai bangsa ni Naibata, ulang gabe iirikkon hita dalan ni parjahat dengan tujuan mencari kenyamanan halani kenyamanan na semu do in.
b. Jahowa do siparmahan banta. Halani ai posisihon hita ma totap dirinta sebagai biri-biri ni Naibata na setia manangar ampa mandalankon hata ni Naibata ase boi terluput hita humbaani ganup ancaman na sihol parsedahon goluh age haporsayaonta.
c. Lambin bohali hita ma dirinta bani hata ni Naibata halani marhitei Hata ai do ibobai goluh age langkahta hubani hadearon ampa haluahon. Ulang ma tanginan bani sora ni dunia on marimbang bani sora atau hata ni Naibata.
d. Domma ijamin Naibata hagoluhan ampa haluahonta ronsi das bani goluh simagira marhitei Tuhan Jesus. Halani ai ulang ma halani biarta bani na masa i dunia on gabe itundalhon hita use Naibata Parmahanta ai. Anggo manggoluh do hita rap pakon Naibata, iparorot do hita tongtong.
e. Haleluya No. 118 : 1 – 3
HAKRISTENON NA MARBUAH MA ! (Ambilan 04 Pebruari 2018, Lukas 8 : 9 – 15)
Ambilan 04 Pebruari 2018
Lukas 8 : 9 – 15
HAKRISTENON NA MARBUAH MA !
1. Kehadiran ni Tuhan Jesus hu dunia on aima laho mamboan hagoluhan bani jolma marhitei na padaskon hata hagoluhan pasal Harajaon ni Naibata. Ipadas do hata ai marhitei pangajarion janah salah sada metode na ipakei aima limbaga. Bani ambilan on ilimbagahon do hubani bonih na isuan tapi ternyata adong bonih na madabuh i tongah dalan, i tanoh na marbatu-batu, i parhupi-hupian janah adong i tanoh na lambutan. Bonih na imaksud ijon aima Hata ni Naibata atau Ambilan Na Madear, sedangkan ianan hadabuhan ni bonih aima jolma in. On patugahkon ragam ni sikap atau respon ni jolma manjalo Hata ai.
a. Na madabuh i tongah dalan aima na manangar hata ai tapi siluk do homa ia lupa sehingga lang soppat tubuh janah marbuah. Ibogei do hata ai tapi halani gogohan do sora ni sibolis ibagas uhurni lang soppat iparuhurhon Hata ai tapi mintor do itulak bahkan ianggap use na mengganggu kenyamananni. Pori isungkun aha do hata ni Naibata na idingat lang tarpatugahsi halani ijin ibogei mintor lupa do ia. Lang adong ubahni sonin roh hu gareja sonai do homa dob mulak hun gareja.
b. Na madabuh bani tanoh na marbatu-batu aima jolma na marmalas ni uhur sanggah manjalo Hata ai tapi podas do ia lupa halani lang soppat marurat ibagas uhurni. Anggo sanggah manangar Hata ai malas do uhurni tapi ijin kembali hubani kehidupan sehari-hari mintor lupa do ia tarlobih sanggah roh sitaronon atau pergumulan hidup (milas ni ari). Lang berdampak Hata ai membentuk jati dirini, sehingga lang adong ubahni cara hidupni pakon halak na lang porsaya.
c. Na madabuh bani parhupi-hupian aima na manjalo Hata ai. Tapi halani ragam ni sura-sura ampa rosuh parduniaon gabe tarpisat do Hata ai. Ia ragu mamilih antara mansuhuni hisap / sura-surani atau mandalankon hata ni Naibata. Ternyata mabiar do ia agoan pasal parduniaon halani mandalankon hata ni Naibata. Tengeran do uhurni bani na i dunia on marimbang bani Naibata. Ujung ni dunia on ma lalap manrajai uhur ampa pingkiranni, sedo hata ni Naibata. Umumni halak na sonon sirsir mangirikkon Tuhan hanya ketika bani situasi na nyaman. Ijalo do Hata ai tapi lang ihatengerhon janah ihaporsayai sehingga urah itadingkon anggo lang sosok bani pingkiranni.
d. Na madabuh bani tanoh na lambutan aima na manjalo hata ai, iparuhurhon, iparimbagaskon janah ihaporsayai do Hata ai sehingga Hata ai paubah uhur ampa goluhni sehingga goluhni marbuahkon na madear domu hubani Hata ai. Pori pe roh logou ni ari (masalah hidup), lang melus bonih (Hata) ai halani i tanoh na lambutan (sintong do iparuhurhon-iamenhon) do Hata ai.
2. Hunjin boi iidah hita ternyata lang haganup na manangar hata ni Naibata otomatis gabe na porsaya. Bahkan boi do ibotoh Hata ai tapi bani kenyataan rosuhni hansa idalankon. Hata ai pitah konsumsi otak tanpa meresap das hubagas hauhuronni, pitah pinggolni hansa manangar lape mendengar dengan hati.
3. Pasal porlu ni manjalo janah mangkaporsayai Hata ai, isobut Tuhan Jesus do ‘Sedo ruti hansa hagoluhan bani jolma, tapi haganup hata ni Naibata, na luar humbani pamangan-Ni’ (Mat.4:4). Artini, Hata ai ningon gabe kebutuhan primer. Lang boi boltok hansa bosur tapi merung haporsayaon. Hata ai do na boi menjamin hagoluhan na lang terbatas halani memberi kehidupan na kekal.
4. Domu hujin tugas manabur bonih atap Hata ai gabe tugas prioritas bani na porsaya (Mat. 28:19-20 ; 1 Pet. 2:9 ; 2 Tim. 4:2). Halak na porsaya lang pitah manjalo tapi iutus do homa manaksihon Hata ai bani dunia on. Pori pe bagei respon ni jolma bani na manjalo Hata ai, tapi tugas ai ningon totap idalankon. Masalahni, anggo halak Kristen in pe lape mangkaporsayai Hata ai, sonaha ma sidea laho manaksihon? Manaksihon Hata ai lang pitah marhitei hata tapi ningon do homa marhitei sikap hidup.
5. Refleksi
a. Humbani na opat usihan na isobut bani ambilan on, tontu gabe sada evaluasi do banta domma bani kelompok na ija hita. Daripada halak na legan menilai hita dearan ma hita bei mamunten dirinta. Tapi atap na ijahanin pe hita, na porlu aima tekad masing-masing untuk berubah do.
b. ‘Humbani buahni do tandaon bonani’. Hakristenonta ulang pitah formalitas tapi Kristen na marbuah ma, marbuahkon biak-biak na madear na sadalan hubani rosuh ni Bonanta ai, aima Tuhan Jesus.
c. Hata ni Tuhan na ihaporsayai pasti mambere gogoh hubanta mandompakkon ragam ni na masa. Markuasa do Hata ai mangurupi janah patorangkon uhurta. Na ganggang darngos marhaporsayaon manganggap na oto mandalankon Hata ai, tapi na sintong porsaya gabe marmalas ni uhur do mandalankon Hata ai halani takkas do ibotoh na isarihon Tuhan in do ia tongtong.
d. Manggoluh ma hita lang pitah secara parangkulaon (jasmani), tapi manggoluh ma homa ibagas haporsayaon atau partonduyon.
e. Haleluya 205 : 1, 4.
MAMUJI DIRI MA HALANI MANANDA NAIBATA (Ambilan 28 Januari 2018, Jeremia 9 : 22 – 24)
Ambilan 28 Januari 2018
Jeremia 9 : 22 – 24
“MAMUJI DIRI MA HALANI MANANDA NAIBATA”
1. Jeremia (=Naibata na pabangkithon), aima nabi na iutus Naibata sanggah panorang ni raja Josia i Juda (1:2). Jeremia terkenal sebagai sahalak nabi na tegas janah berani menyurahon hata ni Naibata pori pe buei tantangan bahkan pori pe hosahni terancam (bindu 20). Halani ai isobut do ia ‘pamangan ni Jahowa’ (15:19). Hata ni Naibata do gabe pusat ni goluh ampa pangajarionni.
2. Bani ambilan on ipatugah Jeremia do sebab akibat mase hona uhum bangsa ni Naibata, aima halani iparseda sidea relasi antara Naibata pakon bangsa-Ni. Naibata domma membangun relasi pakon sidea marhitei na mambere hata-Ni sebagai pedoman hidup. Ternyata bangsa ai madabuh hubani sikap na manlupahon hata ni Naibata bahkan merasa mampu hidup tanpa Naibata marhitei na mangenjengkon hapentaron, kuasa ampa habayakon. Sidea beranggapan dengan hapentaram, kuasa ampa habayakon terjamin ma goluh. Lupa sidea bahwa haganupan ai marsumber humbani Naibata. Sedo maksudni lang porlu hapentaran, kuasa ampa habayakon, tapi penekananni aima: ulang gabe maseda hubungan pakon Naibata halani haganup na i dunia on, ulang gabe iparnaibata na adong i dunia on. Hapentaran, kuasa ampa habayakon ningon iposisihon bani posisi na benar sebagai sibere-bere ni Naibata, sedo Naibata.
3. Halani ai itegashon bahwa anggo adong jolma na sihol mamuji diri (‘bermegah’), mamuji diri ma halani itanda Naibata sebagai paridop ni uhur na mandalankon hasintongan ampa hapintoron i tanoh on (ay.24). Maksudni: menyadari bahwa haganup na adong i dunia on marharohan humbani Naibata janah ketika ijalohon atau inikmati ai ningon lambin isadari do holong ampa kuasa ni Naibata, lambin itanda do Naibata. Artini: bermegah atau bangga karena memiliki Tuhan yang maha Pengasih. Goluhni lang berpusat bani gogohni ampa na adong i dunia on tapi berpusat bani Naibata do. Ia lang memperilah diri atau na adong bani. Haganup na i dunia on ipakei janah inikmati ibagas syukur bani Naibata.
4. Sadalan hujin prioritas na utama sebagai bangsa ni Naibata sedo mangutamahon dunia on tapi membangun relasi pakon Naibata marhitei na mandalankon hata-Ni do. Hubungan pakon Naibata lang boi ikaburhon marhitei na i dunia on. Jolma na mananda Naibata, tenger do uhurni bahwa bani haganup keadaan isarihon Naibata do sidea. Halani ai bangsa ni Naibata (na memiliki relasi na jenges pakon Naibata) lang ongga kuatir pasal atap aha pe halani ibotoh paridop ni uhur do Naibata mansarihon bangsa-Ni. Lang itorihi jalur hidup na bertentangan bani hata ni Naibata laho mandapotkon sesuatu atau mamparayak sura-sura. Totap do ijaga goluhni ase gabe harosuh bani Naibata marhitei na mardalan bani hata-Ni. Lang ra ia mengaburkan, membelokkan hata ni Naibata bani ganup situasi ampa kondisi. Lang ra ia mengorbankan hasintongan demi sura-sura. Malas ni uhur sibanggalan bani aima mardalan bani hata ni Naibata.
5. Refleksi
a. Kecenderungan ni zaman na materialistis (lebih mengutamakan materi), mangutamahon kuasa, pnl., merupakan kesempatan banta pataridahkon jati diri sebagai bangsa ni Naibata. Ulang ma gabe ipengaruhi tapi na mempengaruhi ma marhitei na totap iutamahon hita hasintongan ni Naibata. Memang ra do ianggap dunia on hita na oto, tapi sedo penilaian ni dunia on potretta na sasintongni tapi pangidah ni Naibata do.
b. Malas ni uhur sibanggalan sedo ketika memiliki dunia tapi ketika memiliki Tuhan atau tetap setia ibobai Tuhan do. Bermegah ma halani mananda Naibata. Ulang sompit paruhuran pitah bangga janah megah halani perkara-perkara dunia. Panonggor ampa cara berfikir ni na porsaya ningon mampu melampawi cara berfikir dunia. Goluh ni na berpusat bani Naibata yakin bahwa sedo perkara na borat bani Naibata mansarihon goluhni bangsa-Ni. Bahkan ketika marhahurangan pe ibotoh do bahwa Naibata selalu merancangkan na dahsyat janah indah bani goluhni.
c. Secara fakta ternyata jolma na memiliki hapentaran, kuasa, ampa habayakon lang otomatis bahatan malas ni uhurni marimbang halak na legan. Bahkan boi do sebalikni, gabe isunsahi na adong ai use pingkiran ampa goluhni. Boratan janah loja use ibahen na adong bani apalagi lang adong ukuran na cukup i dunia on. Fakta on sihol menyadarhon hita bahwa porlu do hapentaran, kuasa ampa habayakon tapi anggo lang sintong sisi pandangta boi do paroh hasunsahan ai banta halani iajari do hita use gabe serakah, lang ongga merasa bersyukur. Na paling tragis, na laho tading do ai ganup. Bahkan boi memiliki dunia tapi tidak memiliki sorga. Jolma na paling berbahagia janah beruntung aima na mananda Naibata janah mampu mensyukuri aha na adong bani.
d. Haleluya No. 234 : 1 – 3
SIMBILI MA NA MASAMBOR ! (Ambilan 21 Januari 2017 2 Petrus 2 : 10b – 16)
Ambilan 21 Januari 2017
2 Petrus 2 : 10b – 16
SIMBILI MA NA MASAMBOR !
1. Antara rosuh hajolmaon ampa rosuh ni Naibata, on ma na gati sulit ipilih jolma. Rosuh hajolmaon lobih mangutamahon hisap ni angkula tanpa mamingkirhon akibat ni horja ai, tapi rosuh ni Naibata mangutamahon hasintongan janah sadar bani akibat ni horjani. Pasal on ma na ipaingat bani ambilan on halani adong panorang ai pangajar na kahou na lobih mangutamahon hisap ni angkula marhitei goluh habutakon. Sidea aima na dob mabuk bani hisap ni angkula (ay.13). Panonggor ni sidea gok parbangkison maksudni: tertarikan hubani kenikmatan dunia dari pada hasintongan, seng marnamaronti mangkorjahon dosa, iompan-ompani do uhur ni halak na galek janah maruhur haut do tong sidea (ay.14). Hatahonon, aha na sintong bani sidea pitah iukur bani kenikmatan dunia, lang be hata ni Naibata. Bani sada sisi sidea memposisihon diri do sebagai guru sipangajari tapi kenyataan iapasi sidea do hasangapon ni Naibata (ay.10b-11) janah kehadiran ni sidea justru dihut parsedahon halak na galek haporsayaonni.
2. Halani ai ipausih do sidea hubani binatang na so maruhur (ay.12), maksudni: lang marhabadoron be, lang memiliki kesadaran be halani lobih mangutamahon rosuhni dari pada hasintongan. Bani kondisi on isobut do sidea na mangapasi hasangapon ni Naibata. Bahkan ibahen do bandingan, sedangkan malekat na gogohan humbani sidea pe lang ra mangapasi hasangapon ni Naibata. Artini, sobali bebal, sidea domma igolongonkon homa hubani halak na oto atap na mabuk. Ipausih do homa sidea hubani si Bileam (ay.15 ; 3 Musa 26:11-13) na tertarikan uhurni hubani duit atau arta dunia gabe itadingkon hasintongan.
3. Domu hujin tangkas do ipatugah akibat sijaloon ni sidea. Usih songon binatang na pitah mangutamahon sipanganon janah lang ipingkiri tujuan ni goluhni, sonai ma sidea halani hisap, sipanganon ampa rosuh-rosuh pardagingon gabe hona siding ni hamateian, sitangkapon janah sibunuhon ase tubuh (ay.12). Artini, lang mararti be goluh ni sidea, sisoya-soya do sidea manggoluh, hamateian do ulih sijaloon ni sidea, usih hubani na lang do sidea i lobei ni Naibata. Anggo na porsaya mottoni, mati untuk hidup tapi parpodah na kahou bermotto hidup untuk mati. Maksudni: na porsaya sirsir pamateihon hisap ni angkula untuk hagoluhan sejati, tapi parpodah na kahou justru sebalikni, manggoluh ibagas hisap ni angkula sehingga manuju hu hamateian na kekal.
4. Refleksi
a. Ukuran ni hakristenonta na sintong aima sejauh ja hita sirsir manulak sagala na masambor. On ma tantangan age banta tarlobih bani hamajuan on halani buei do na menarik tapi lang haganupan ai harosuh ni Naibata. Kenyataanni, lang otik jolma na mabuk bani arta, hasangapon, pnl., sehingga na utama bani lang be aha rosuh ni Naibata tapi domma kenikmatan dunia.
b. Adong do homa kecenderungan ni jolma rosuhan manangar hata na pamalas uhur pori pe lang sintong hata ai dari pada manangar hata na sintong. Bahkan boi do jolma marah, tarsinggung anggo ipaingat marhitei hata hasintongan atau hata ni Naibata. Bahkan age bani ambilan ra do homa jolma pitah rosuhan managar hata pasu-pasu dari pada hata singat-singat. Hataridahan ni jolma na mabuk ope ai. Na lang maruhur do jolma na sonai na ipausih hubani binatang halani lang ra ipaingat marhitei hata hasintongan sehingga totap bertahan bani goluh na marhabutakon.
c. Marhitei hata ni Tuhan na marianan janah menguasai uhurta do ase boi hita pamateihon sagala hisap ni pardagingonta. I tongah-tongah ni buei godaan ni zaman on ningon torus ibohali hita dirinta bani hata ni Tuhan ase mampu hita manadingkon janah mangkagigihon roh-roh zaman na boi parsedahon haporsayaonta. Ningon isadari hita bahwa hasedaon terjadi sedo halani borat ni goluh atau sitaronon tapi halani ketidak-mampuan menguasai hauhuron do. ‘Dirimin do munsuh nima’, maksudni: segala sesuatu selalu idasari humbani dirinta atap hauhuronta. Anggo lang mampu hita manrajai uhur ampa hadirionta, on ma sumber ni hasedaon ampa dosa.
d. Halani ai ningon pakkei do hita laho mambedahon antara na nikmat ampa na sintong. Lang haganup na nikmat mampangkorhon hu hadearon tapi jolma na manggoluh ibagas hasintongan goluhni pasti do manuju hu hadearon bahkan parsimada bani hagoluhan na dob ipasirsir Tuhan Jesus. Ulang ma gabe soya-soya goluhta halani balosan hubani dunia on dari pada hubani Tuhan.
e. Porlu ma iuji hita dirinta domu bani ambilan on. Maruntol ope hita anggo mardomdom, berbohong, apatis, manranai hasoman, pnl., atau domma ianggap hita ai sebagai hal na biasa? Atau, rosuh ni ise do gatinan ipasaud hita bani goluh on? Jangan-jangan sasintongni rosuhta do ai tapi iklaim hita ai gabe rosuh ni Tuhan. Sasintongni ningon rosuh ni Tuhan ma homa gabe harosuhta.
f. Haleluya No. 108 : 1 – 6
ULANG MABIAR, IRAMOTKON NAIBATA DO HITA (Ambilan 14 Januari 2018, 2 Musa 6 : 1 – 7)
Ambilan 14 Januari 2018
2 Musa 6 : 1 – 7
ULANG MABIAR, IRAMOTKON NAIBATA DO HITA
1. Mamungkah humbani na tarjual si Josep, anak ni si Jakob hu tanoh Masir, aima mungkahni marianan janah lambin bueini halak Israel i tanoh Masir. Ihasomani janah ipasu-pasu Naibata do si Josep gabe boi ia sipanrajai i tanoh Masir. Idilo si Josep do homa saninani ase marianan sidea i tanoh Masir. Tapi sadalan bani pardalanan ni panorang, halani lambin bueini ma halak Israel i tanoh Masir, tubuh ma uhur ni raja Masir mangarsik halak Israel halani ibagas pingkiranni, anggo lang iarsik tontu gabe halak Israel ma holi sibueinan janah na markuasa i tanoh Masir (2 Musa 1:9). On ma mungkahni manaron sidea i Masir, bahkan soppat do iparentahkon raja Masir ase ibunuh haganup anak dalahi ni halak Israel (2 Musa 1:16, 22). Iarsik do sidea marhitei horja rodi na borat pala sampai doruh-doruh halani boratni (2 Musa 1: 14 ; 2 Musa 5:6 - 18). Bani keadaan na sonin ma idilo Naibata si Musa paluahkon halak Israel luar hun Masir. Aha na dob ibagahkon Naibata bani ompung ni sidea aima si Abraham, bahwa ginomparni gabe bangsa na banggal maningon do saud. Pori pe lang ilopas halak Masir luar halak Israel. halani humbani gogoh ni halak Israel na iparjabolon ai do sidea boi marsonang-sonang, tapi rencana ampa hata ni Naibata lang tarolati, ipaluah do halak Israel hun tanoh Masir.
2. Ipatugah Naibata do bani si Musa aha na sihol sibahenon-Ni hubani Parao raja ni Masir, bahwa marhitei tangan-Ni na gogoh, gabe palopasonni Parao do halak Israel luar hun Masir janah mamboan bangsa Israel hu tanoh Kanaan, aima tanoh na dob ibagahkon Naibata hinan bani ompung ni sidea, si Abraham. Adong tolu alasan mase iutus Naibata si Musa paluahkon halak Israel hun parjabolonan Masir aima:
a. Domma ipajongjong Naibata padan atau hata-Ni hubani ompung ni sidea si Abraham, Isak pakon Jakob na sihol mamberehkon tanoh Kanaan hubani sidea (ay.3-4). Ternyata sintong do haganup hata ni Naibata. Aha na dob ipadankon Naibata maningon do saud. Lang adong na boi menggagalhon hata ni Naibata. Halani ai haganup hata ni Naibata maningon do ijalo janah ihaporsayai pori pe aha na masa. Halak na porsaya janah mangajamhon hata ni Naibata pasti do jumpahan haluahon. Jolma na marsijolomaan bani hata ni Naibata seng anjai tarbador.
b. Itangihon Naibata do dorak-dorak ni halak Israel na pinarjabolon ni halak Masir (ay.5-6). Ternyata Naibata aima na sari bani doruh-doruh ni halak na madoyuk. Ia selalu berpihak hubani halak na hona odoh-odoh atau korban ketidak-adilan. Naibata lang marosuh hubani praktek ketidak-adilan atau horja pangodoh-odohon. Naibata do mangimbang halak sipangodoh-odoh. Horja haotoon do anggo adong na meraih keuntungan dengan cara mengorbankan halak na legan halani Naibata do imbang ni sidea. Lang sintong parugamaon anggo lang adong uhur holong bani dirini. Parholong do Naibata, halani ai halak na mandilo goran-Ni maningon do manggoluh ibagas holong.
c. Ase itanda bangsa Israel bahwa Naibata do Sipaluah, na padaratkon sidea humbani horja rodi ni Masir (ay.7). Naibata sirsir mengangkat sidea gabe bangsa Bani, janah Ia gabe Naibata bani sidea. Haluahon ai bertujuan do homa ase ibotoh janah isadari sidea pitah Naibata do Siparkuasa i tanoh on. Sekaligus marisi pangajaran ase pitah hubani Naibata sidea marsombah ampa martenger ni uhur. Sobuton ma, karya haluahon na humbani Naibata martujuan do homa membangun haporsayaon. Ketika manjalohon haluahon na humbani Naibata ningon do homa dihut terbangun haporsayaon. Ihagigihon Naibata do jolma na mambahen na legan sisombahon ampa hatengeran ni uhurni.
3. Refleksi
a. Sebagai kuria ni Tuhan, domma ipatalup Naibata hita sebagai bangsa-Ni. Ia do Sipaluah banta. Halani ai, pitah Ia ma sibalosan ampa pangajamanta mandalani ari-arini goluhta. Panotap banta, gogohan do Ia marimbang haganup siparkuasa na adong i tanoh on. Halani ai dalani hita ma tahun na baru on ibagas semangat iman bahwa aha pe na sihol masa gok bani holong ni Naibata do goluhta, Ia do Naibata ampa Raja na markuasa manjaga ampa mamasu-masu hita. Ulang ma iparnaibata hita na adong i dunia on ase ulang tarbador hita.
b. Sebagai bangsa ni Naibata, pakei hita ma homa hata-Ni gabe sijoloman ampa na mambobai goluhta. Hatengerhon hita ma hata ni Naibata halani sintong janah markuasa botul do haganup Hata ai mambobai hita hubani haluahon ampa malas ni uhur. Ulang ma terlena hita bani bueini sora i dunia on tapi pakei hita ma totap hata ni Naibata gabe pandu ampa pangguruanta.
c. Halani Parholong do Naibata, pataridahkon hita ma homa goluh siparholong bani hasomanta. Lang talup hita mangindo ase iurupi, ipaluah janah ihaholongi Naibata hape hita sandiri lang sirsir mangkaholongi hasomanta. Rimpun ni haganup titah ampa hata ni Naibata aima holong.
d. Haleluya No. 57 : 1 – 3
ROH MA HUBANI NAIBATA, PARIDOP NI UHUR DO IA ! (Ambilan 03 Desember 2017 (Adven I) Jesaya 64 : 1 – 9)
ROH MA HUBANI NAIBATA, PARIDOP NI UHUR DO IA !
Ambilan 03 Desember 2017 (Adven I)
Jesaya 64 : 1 – 9
1. Ambilan on aima pangakuan pasal kuasa habanggalon ni Naibata na markuasa bani ganup tanoh on. Iakuhon do anggo iribakkon Naibata langit in anjaha susur Ia hu taanoh on, dugur ma tanoh on anjaha ganup bangsa-bangsa gobir ma (ay.2). Kuasa ni Naibata lang terjangkau oleh hapentaran ni jolma, na lang do haganup hapentaran ni jolma i lobei ni Naibata. Anggo susur Ia, malala ma dolog i lobei-Ni (ay.3).
2. Tapi pori pe gok kuasa Naibata, Ia Naibata Parholong do homa. Isarihon do halak na marhatengeran janah marpangarapan hu-Bani janah halak na bujur mangkorjahon hapintoron (ay.4-5). Naibata lang menuntut jolma in sempurna tapi ase itanda sidea do keterbatasan ampa hagalekonni janah marhitei ai sirsir roh hubani Naibata. Roh hubani Naibata lang pitah hata tapi ningon ibarengi hauhuron na sirsir mananda hapintoran janah ipabayu ase boi lambin margoluh ibagas hapintoron.
3. Naibata memiliki jati diri na jelas aima na mangkarosuhkon hapintoran janah na mangkagigihon hajahaton Ia lang marosuh hubani horja hajahaton janah halani ai do homa ase iuhum Naibata bangsa-Ni, aima halani dosani sidea. Hasedaon ni sidea gabe melus, sedo halani na lang markuasa Naibata paluahkon tapi halani na iluahon hajahaton ai do sidea (ay.6-7). Hajahaton ai do na manarik goluh ni side gabe manaron janah ijajah bangsa na legan.
4. Domu hujin ipangindo do kesadaran bani bangsa ni Naibata laho mananda hagalekon ampa dosa ni sidea janah roh ibagas toruh ni uhur mansopotkon dosa ai hu lobei ni Naibata. Isadari bahwa jolma in usih hubani tanoh halampung na pitah boi ipauli janah marguna anggo Naibata na paulihon janah padearhon (ay.8). Lang adong na boi siajamhonon ni jolma in humbani dirini sobali mangajamhon holong ni Naibata. Halani ai iarapkon idop ni uhur ni Naibata ase ulang mamarahtu Ia bani dosa hajahaton ni sidea tapi ase marpanatap Naibata hubani bangsa-Ni na galek ai (ay.9). Ijon Naibata itanda sebagai Parholong na sirsir homa manasap dosa hajahaton ni jolma. Sekaligus mangajarhon ase jolma in roh ibagas toruh ni uhur manolsoli dosa ampa hagalekonni sidea i lobei ni Naibata. Iporluhon kesiapan roh hubani Naibata. Kesiapan ai sedo marhitei na pabanggal-banggal dirini atau mangajamhon habujuronni tapi marhitei na mananda hagalekon ni sidea i lobei ni Naibata do. Artini, adong kesadaran bahwa jolma in boi janah talup roh hubani Naibata sedo halani habujuronni tapi halani na ipatalup Naibata do, halani Siparholong do Ia bani jolma na sirsir mananda dosa ampa hagalekonni. Halani ai roh do sidea hubani Naibata ibagas toruh ni uhur janah ihaporsayai bahwa anggo hubani Naibata sidea roh, maka terluput ma sidea humbani paruhuman ni Naibata, lang mangonai be bani sidea ringis ni Naibata halani dosa na ihorjahon sadokah on.
5. Refleksi
a. Lang adong hita na talup i lobei ni Naibata anggo humbani horjanta ai gok ibagas dosa ampa hagalekon do hita. Halani ai iporluhon panandaion diri janah manolsoli dosanta i lobei-Ni. Sonin ma hita mempersiapkon diri bani minggu Adven on mangalo-alo parroh ni Tuhan Jesus hu dunia on. Menjelang perayaan Natal, na utama sedo sekedar selebrasi tapi na utama aima mempersiapkan hati laho mananda idop ni uhur ampa holong ni Naibata do.
b. Ase boi semakin dohor hubani Naibata ningon sirsir homa hita pabayuhon uhur ampa parlahou. Naibata mangkasiholhon ase lambin bayu janah lambin margoluh hita ibagas hapintoron. Parugamaonta ulang sekedar symbol pakon rutinitas tapi parugamaon na ibarengi oleh habayuon ni uhur ma.
c. Dosa do na padaohkon hita humbani Naibata janah dosa ai do homa na mangagou goluhta. Tapi paridop ni uhur do Naibata marhitei na sirsir Ia manasap sagala dosa panlanggaronta. Markuasa do Ia manasap haganup dosanta halani parholong do homa Ia. Tapi Naibata lang pitah sirsir manasap dosanta tapi Ia sihol do homa mangubah biakta ase lambin margoluh hapansingon. Halani ai lambin padaoh hita ma sagala biak ni dosa ai humbani goluhta.
d. Haleluya 480 : 1 – 4
NA BINAHEN NASIAM BANI NA ETEK-ETEK ON, HU-BANGKU DO IN IBAHEN NASIAM (Ambilan 26 November 2017 Matius 25 : 31 – 46)
‘NA BINAHEN NASIAM BANI NA ETEK-ETEK ON, HU-BANGKU DO IN IBAHEN NASIAM’
Ambilan 26 November 2017
Matius 25 : 31 – 46
1. Ise do na talup masuk hu harajaon ni Naibata? Ambilan on patugahkon aima sidea na sirsir mangkaholongi Tuhan Jesus marhitei na mansarihon halak na musil i tanoh on. Ternyata Tuhan Jesus hadir do i tongah-tongahta marhitei kehadiran ni halak na doyuk, miskin ampa na marsitaronon. Marhitei kehadiran ni sidea iuji ma sonaha do holongta pakon pambalosionta hu-Bani. Halak siparholong do na talup masuk hu harajaon ni Naibata. Lang tarpisahkon holongta hubani Tuhan humbani holongta hubani halak na madoyuk. Soya do parugamaon ni halak na lang peduli hubani halak na masombuh.
2. Panorang goluhta i dunia on aima kesempatan pataridahkon pambalosionta hubani Tuhan. Mambalosi Tuhan lang sungkup pitah mambotoh ampa mangulas hata ni Tuhan tapi ningon do irik hubani na mangkagoluhkon, mampraktekkon. Takkas do bahwa rimpun ni haganup hata ni Tuhan aima mangkaholongi Tuhan pakon hasoman jolma. Parladung do sasada halak na pokkut marugama tapi goluhni daoh ope humbani biak holong. Bani panorang parrohni Tuhan padua-halihon, ijai isirang ma halak parpintor ampa parjahat. Parpintor aima na sirsir margoluh holong, parjahat aima na lang perduli hubani hasoman tapi pitah dirini hansa ipingkiri. Pori pe riap manggoluh ope sidea i dunia on tapi domma legan ianan situjuon ni sidea. Parpintor manuju hu hagoluhan tapi parjahat manuju hu paruhuman na sadokah ni dokahni.
3. Isungkun parpintor ampa parjahat do pasal horja ni sidea. Parpintor manungkun, sadihari iidah hanami Ham loheian, …, ibere hanami mangan? Parjahat manungkun, sadihari iidah hanami Ham loheian, …, lang ibere hanami Ham mangan? Jelas do balos ni Tuhan Jesus ‘Haganup na binahen nasiam bani sada halak angging-Ku na etek-etek on, na hu-Bangku do in ibahen nasiam’ (ay.40), tapi na so binahen nasiam bani sada halak angging-Ku na etek-etek on, hu-Bangku do na so binahen nasiam ijai (ay.45). Sihol patangkashon bahwa horja mangkaholongi aima sada horja na sangat martuah halani doskon na hubani Tuhan do hita ijai marpambahenan. Manulak halak na loheian sarupa do ai manulak Tuhan Jesus.
4. Anggo isobut ijon halak na loheian, na horahan, mampar-ampar, seng marhiou, boritan anjaha tartutup, aima sidea na lang mungkin mambalaskon holong na ibere hita. On sihol mangajarhon bahwa haganup horja na madear ampa horja mangkaholongi sedo bertujuan manuntut balas humbani halak na legan tapi ihorjahon parpintor do in halani porsaya domma ipasirsir Tuhan upah bani sidea aima hagoluhan na sadokah ni dokahni. Halani ai lang ongga merasa rugi pangahapni laho mangkaholongi tapi sebalikni ihorjahon do ai ibagas malas ni uhur. Pori pe lang tarbalaskon halak na legan horjani na madear ai lang halani ai ia marungut-ungut janah berhenti mangkorjahon holong. Sada kebahagiaan janah kepuasan do bani parpintor anggo ibere Tuhan ope kesempatan bani sidea laho mangkaholongi hasomanni.
5. Refleksi
a. Ija do hita boi pajumpah pakon Tuhan Jesus? Sobali i gareja, pajumpah do homa hita pakon-Si bani pargoluhan ari-ari aima anggo iidah hita sidea na musil janah na masombuh na mamorluhon pangurupionta. Halani ai ulang ma rosuhan hita marhasoman pakon halak na boi mangurupi hita tapi malas ma homa uhurta marhasoman pakon halak na mamorluhon pangurupionta.
b. Halak na bayak sedo halak na buei patumpuhon arta untuk dirini sandiri tapi na buei mambere humbani dirini hubani halak na legan tarlobih halak na miskin janah na mampar-ampar do. Ulang ma pitah bayak hita bani panorang, pambotoh, gogoh, arta, pnl., tapi bayak ma homa age bani holong ase ulang sisoya-soya goluh parugamaonta. Halani ai malas ma uhurta lang pitah sanggah manjalo tapi lobih malasan ma uhurta anggo ibere Tuhan kesempatan banta laho mambere. Tongon martuahan do na mambere ampa na manjalo.
c. Ganup arta na ipatumpu hita i dunia on na laho tading do ai tapi ganup pambahenanta na madear ibagas holong lang ongga soya ai, arta na kekal do ai. Halani ai patumpu hita ma banta arta i nagori atas marhitei arta ampa gogohta na i dunia on.
d. Haleluya 476 : 1 – 3
PARAYAK NA MADEAR, TUNDALHON HAJAHATON ! (Ambilan 19 November 2017, Sepanya 1 : 7, 12 – 18)
PARAYAK NA MADEAR, TUNDALHON HAJAHATON !
Ambilan 19 November 2017
Baca : Sepanya 1 : 7, 12 – 18
1. Sepanya aima nabi na idilo Naibata marhorja i Juda (Jerusalem) sanggah panorang ni raja Josia (ay.1). Panorang ai sidea domma madabuh bani hajahaton manombah Baal (ay.4), marsombah do namin bani Jahowa tapi marbija homa bani naibata na legan (sinkritisme, ay.5), lang be marpanungkun ampa mangindahi Jahowa (ay.6). Goluh ni sidea domma daoh humbani Naibata, parugamaon ni sidea domma kehilangan makna halani icemari dosa ampa hajahaton. Na manrajai uhur ni sidea lang be Naibata tapi domma rosuh ni sidea tumang. Domu bani kondisi in ma ipatugah bahwa sasintongni sidea domma manuju paruhuman ni Naibata. Dalan ase boi maluah pitah sada do aima mulak bani Naibata.
2. Domu hujin isobut ‘Sip ma nasiam i lobei ni Jahowa! Ai dohor mando ari ni Jahowa. Domma ipasirsir Jahowa sada galangan sisayaton, anjaha iuras na niontang-Ni’ (ay.7). Ungkapan ‘sip i lobei ni Jahowa’ mararti: sikap na sirsir manangihon janah merenunghon hata ni Naibata sehingga marhitei hata ai boi mengevaluasi pargoluhan na lepak sadokah on. Marhitei sikap na sonin iarapkon tubuh kesadaran bahwa sisoya-soya do goluh na lang marhabiaran bani Naibata. Marhitei na manangihon hata ai do homa gabe ibotoh bahwa Naibata sirsir ope manasap dosa ampa paluahkon anggo ra marhamubahon. Naibata sihol manguras, papansingkon sagala dosa hajahaton ai. On pataridahkon idop ni uhur ni Naibata ase ulang sompat mangonai bani sidea ringis-Ni. ‘Dohor mando ari ni Jahowa’, maksudni: ulang be lansei, ulang itunda-tunda laho paubahkon uhur.
3. Selanjutni ipatugah do konsekwensini anggo lang sirsir marhamubahon aima: Naibata mamareksa marhitei lampu janah marlulu bani hajahaton ni sidea. (ay.12). Mamareksa marhitei lampu maksudni : lang adong na boi terluput atau melarikan diri humbani paruhuman ai. Bani ari ai Naibata roh lang be laho mangidopi tapi manrampas ugas-ugas ni sidea janah parsedahon pohon anggur ni sidea ma (ay.13). Bahkan isobut do ari ai ari na mapaet halani masa ma hasosakan ampa habiaran, hasedaon ampa hasiapon, hagolapan ampa halotiron (ay.14-16). Tarsosak ma ganup halak na lang ra marhamubahon, dadap-dadap songon na pitung (ay.17). Sonin ma janginni na sihol masa anggo totap ibagas hajahaton.
4. Bani ay.8 ipatugah homa bahwa lang adong na boi paluahkon sidea humbani ringis ni Naibata termasuk pirak barang omas na ibanggahon sidea sadokah on. Lang tarpangunsagahkon age aha laho paluahkon diri humbani ringis ai. Sisoya-soya do haganup na adong halani ijai terbukti ma na lang margogoh do hape haganup na adong i dunia on paluahkon sidea. Halani ai pilihan terbaik aima mamakei kesempatan na adong laho paubah uhur, manadingkon dosa janah mulak hubani Naibata.
5. Refleksi
a. Sirsir ipasingat aima sikap bijak atau na bijaksana. Anggo Naibata paingatkon hita marhitei hata-Ni tanda ni holong-Ni do ai, ulang ma hampung uhurta. Ulang ma ihagigihon hita sipaingat ampa na padaskon singat-singat tapi pakei hita ma ai gabe sada kesempatan pabayuhon uhur ampa parlahou. Memang sipata ra do borit pangahap anggo ipaingat tapi sasintongni mampangkorhon hadearon do ai usih songon tambar na mapaet na boi mamboan hamalumon.
b. Nuan ibere ope kesempatan banta manjalo idop ni uhur ni Naibata age pe pardosa hita asal ma ra marhamubahon. Sirsir do Tuhan manguras hita humbani ganup dosanta na ibuktihon marhitei holong ni Tuhan Jesus. Tapi bani ari ni Tuhan ai gabe sipanringis do Ia bani na lang ra paubah uhur. Halani ai ulang be tarlalap, pakkei ma mamakei panorang ase ulang manosal holi ujungni.
c. Memang goluh na mamparayak hasintongan ampa mardalan bani hata ni Naibata ra do sipata gabe habileian i dunia na gok dosa on. Tapi ulang sangsi janah mabiar hita halani janginan ope uhuman sijaloon ni jolma na padaohkon dirini humbani Naibata bani ari ni Tuhan ai. Halani ai malas ni uhur ma banta mulak janah mardalan bani rosuh ni Naibata.
d. Bani na buei sora, hiruk-pikuk ampa kesibukan ni goluh i dunia on porlu totap ipasirsir hita dirinta manangihon sora ni Naibata ase ulang mabuk janah taruyun hita ibahen dunia on. Marhitei hata ni Naibata do boi torang uhurta age mandompakkon ampa mangatasi haganup na masa.
e. Pori pe songon na mardohar parjahat i tanoh on ulang pala etek uhurta atau cemburu hita halani na masa sonari lape ai ujungni. Na laho roh ma ari ni Tuhan manirang parjahat ampa parpintor. Halani ai jolom hita ma totap hata ni Tuhan janah hagoluhkon hita ma ai.
f. Haleluya 142 : 1,2,3
