DEARAN DO UHUR NA BORSIH DARI PADA RUPA NA JENGES (Ambilan 08 September 2019 Podah 8 : 12 – 21)

DEARAN DO UHUR NA BORSIH DARI PADA RUPA NA JENGES

Ambilan 08 September 2019

Podah 8 : 12 – 21 

 

1. Buku Podah marisi hikmat aima hapentaran na marsumber humbani Naibata. Hapentaran mararti do homa hauhuron na humbani Naibata. Hapentaran ai martujuan mambobai jolma  mambotoh aha do harosuh ni Naibata. Artini, jolma na marhapentaran aima na sirsir iparuhuri atau ibobai Naibata. Ambilan on menegashon bahwa marhitei hapentaran ai do Naibata marianan, marhorja ampa mambobai ampa manramotkon goluhni jolma. Na sirsir ibobai hapentaran ai gabe margogoh do bani haganup langkah ampa dalanni. 

2. Halani ai bani ambilan on ipersonifikasihon do hapentaran ai sebagai guru sipangajari janah marianan do ia i lambungni hapandeian. Artini, jumpahan habotohon ampa hapandeian do jolma na sirsir manjalo hapentaran ai (ay.12). Hapentaran ampa habotohon/hapandeian anggo ipadu akan menghasilhon kuasa na banggal. Artini, hapentaran (hikmat) ai marguna memandu hapandeian sehingga lang lepak manggunahon hapandeian ai. Marhitei na sonai ma hapandeian boi bersinergi mamboan hadearon. Sebalikni hapandeian tanpa ikendalihon oleh hapentaron gabe patubuhkon hasedaon halani hunjai do tubuh tipu ampa hajahaton marhitei hata na margoling-goling na lang boi tarhaporsayai hatani (ay.13). Na berhikmat aima na sirsir mambere haganup na adong bani (gogoh, hapandeian, pakon talenta na legan) ikendalihon hapentaran ai. Ase marhitei hapentaran ai do Naibata mambere panuturion (petunjuk hidup) ase ulang mardalan jolma in manuju hasedaon (ay.14). Marhitei na sonai ma homa goluhni jolma boi marbuah janah marguna lang pitah bani dirini tapi dihut bani halak na legan songon sahalak sipanggomgomi/raja na mamboan hapintoron, hadameion ampa malas ni uhur bani rakyatni (ay.15).

3. Selanjutni ipatugah do bahwa holong do uhur ni hapentaran ai bani sagala jolma na mangkaholongisi anjaha na mamindahisi (ay.17). Mangkaholongi anjaha mamindahi maksudni sirsir mamakei hauhuron na humbani Naibata sebagai ukuran manontuhon aha do na sintong. Sidea lang ra tergoda hubani kenikmatan sesaat tapi totap adong uhur na marpanimbangion ; Lang ra mambaen haputusan pitah mardasarhon rosuhni sandiri tapi selalu ibuka uhurni bani pangajarion ni Naibata. Marhitei na sonin sidea lang ra tarbador tapi sebalikni jumpahan do sidea bani habayakon, hamuliaon, arta na manotap pakon hapintoron  na harganan humbani omas pakon pirak pilihan (ay.18-19). Anggo isobut harganan humbani omas pakon pirak pilihan, artini: hajagaron ni na mamakei hapentaran ai lobih do humbani haganup hajagaron na adong i tanoh on (ay.21). 

4. Ase kata kunci bani jolma boi berhasil bergantung do hubani pilihan ni jolma in apakah sirsir manjalo ampa ibobai hapentaran ai atau lang. Tontu on lang sekedar ungkapan kata tapi ningon nyata marhitei na sirsir mardalan bani dalan hapintoron ampa habonaron na humbani Naibata (ay.20). 

 

5. Refleksi

a. Dearan do jolma na jenges paruhuronni marimbang pitah jenges bani rupa. Paruhuron na jenges mambahen jenges pangabak sehingga kehadiranni mamboan hadearon, malas ni uhur ampa pasu-pasu. Ase boi jenges paruhuron ampa abak maningon sirsir mambere uhur ibentuk oleh hapentaran na humbani Naibata. Gabe pergumulan banta aima, buei ma jolma pitah mamakei pingkiranni tumang lang be irajai hauhuron na humbani Naibata sehingga kehadiranni lang be mamboan hadameion tapi parsoalan, partinggilan ampa parbolah-bolahan, pnl. do use. Bahkan gati kehadiran ni kuria age parhorja lang be gabe siboan pasu-pasu tapi domma siboan parsoalan, borit ni uhur ampa hasedaon hubani halak na legan.

b. Haganup do jolma sihol berhasil tapi lape haganup sirsir mardalan bani panduan keberhasilan aima hapentaran na humbani Naibata. Bahkan lang jarang jolma memperalat goran ni Naibata tapi sasintongni pitah rosuh ni sandiri do na ihorjahon bahkan mandilo goran ni Naibata hanya untuk melegalitas sura-sura pakon pingkiranni sandiri, sedo ase sura-sura ni Naibata saud bani dirini. Cara berfikir na sonon ma porlu iubah hita ase dihut hita bani barisan keberhasilan na humbani Naibata. Jolma na sihol berhasil janah ipasu-pasu Naibata ipadaoh do dirini humbani sagala hajahaton ampa hasamboron.

c. Gabe urah do age horja na borat anggo sirsir hita mamakei hauhuron na humbani Naibata halani ibagas hauhuron ai do jumpah hita gogoh pakon cara mangatasi haganup masalah. Hauhuron na humbani Naibata do homa na patubuhkon semangat halani ihaporsayai hita bahwa Naibata selalu memiliki rencana na dear bani sagala jolma na marhabiaran hu-Bani.

d. Kenderaan selalu do menyatu pakon pengemudini. Anggo pengemudini raus, pori pe jenges kenderaan lang boi terjamin das kenderaan ai hu tujuan. Sonin ma hapentaran na humbani Naibata porlu mengemudihon goluhta. Pori aha pe na adong banta anggo lang sirsir hita ibobai (ikemudihon) hauhuron na humbani Naibata lang gabe pasu-pasu ai banta tapi justru sebalikni mambahen hasedaon do use.

e. Songon raja Salomo gabe halak na tarmurmur janah gabe sipambobai na berhasil, sonai ma hita ipindo mamilih pangajarion na humbani Naibata laho mandompakkon ampa mangatasi haganup masalah ni goluhta ase marhamonangan hita tongtong.

f. Domma ipaondos banta hata ni Naibata gabe sipambobai bani goluhta. Domma homa gabe daging hata ai marhitei Tuhan Jesus. Tuhan Jesus do hikmat atau hapentaran ai. Ise na roh janah porsaya hu-Bani seng anjai tarbador tapi ibobai do goluhni sadokah i tanoh on janah domma ipasirsir homa hasangapon aima hagoluhan na sadokah ni dokahni ai. Ase sirsir ma hita tongtong ibobai janah irajai Tuhan Jesus.

g. Haleluya No. 117 : 1, 2, 4.     

Read 946 times

Leave a comment

Make sure you enter all the required information, indicated by an asterisk (*). HTML code is not allowed.

Go to top