2. Bani teksni ambilan on, mardingat haganupan na sinobut in sonai homa situasi na ialami Daud,iporluhon do martonggo hubani Naibata songon na hinatahonni bani ayat 11 : “sai ajarhon ham ma dalan-Mu hubangku,Ham Jahowa,ase mardalan ahu ibagas hasintongan-Mu;sai pabulat Ham ma uhurhu laho mangkabiari goran-Mu”.Hasintongan na sejati atap na sesungguhni,pitah jumpah bani dalan-Ni Naibata. Halani ai ningon bani ganup panorang do hita mardalan bani dalan-Ni,dalan hasintongan-Ni. Ijin hita mardalan bani hasintongan-Ni,ijai ma goluhta gabe galangan na manggoluh janah na misbou. Bani Johannes 8:31-32 : “anggo totap nasiam ibagas hatang-Ku,sintong ma nasiam susian-Ku,tandaon nasiam ma hasintongan in,anjaha paluahon ni hasintongan in ma nasiam”. Halak na so totap ibagas hata-Ni Naibata,na so marianan  ibagas Kristus,lang merdeka tapi totap gabe jabolon ni dousa. Janah upahni dousa aima hamateian.

3. Marulak-ulak do jumpah hita bani ganup psalmen tonggoni parpsalmen mangkatahon, “sai ajarhon Ham ma dalan-Mu hu bangku,Ham Jahowa”.  Tonggo sisonon sangat iharosuhkon Naibata,asal ma botul-botul tubuh humbagas uhur na bulat,lang pitah bani pamangan,tapi taridah bani pandalankonon na sintong-sintong tunduk hubani pangajaran-Ni. Pangajaran-Ni Naibata sibanggalan jumpah do ibagas hata-Ni na dong bani Bibel. Halani ai ningon do hita pongkut mambasa Bibel ibagas uhur na botul marhasoman tonggo na bulus ase iajari Naibata hita janah ibere pangarusion hubanta. Lambin pongkut mambasa  hata-Ni janah lambin marbanggal ibagas hata-Ni, ijai do lambin ialami hita kemenangan humbani sagala musuh-musuh ni partonduyon ampa haporsayaonta i dunia on. Igambarhon parpsalmen do musuh-musuh ai bani ayat 14: “roh do na jungkat maruhur mangimbang ahu,hulanan ni parjahat sihol mamunuh ahu,seng parduli sidea Bamu”. 

4. Lambin mananda hasintongan-Ni,ijai do lambin mardeka hita humbani sagala hakahouon. Ijai do goluhta marubah humbani na duniawi gabe rohani. Halani ai do ase bani tonggoni ihatahon do homa: “pabulat ham ma uhur hu laho mangkabiari goran-Mu” (ay.11b). Itonggohon do ase uhurni lang terbagi, pitah ibagas uhur na bulat. Anggo ibahen hita Naibata na terutama anjaha bulat do uhurta marhaporsayaon hubani Naibata, ijai di Naibata turun tangan paluahkon hita humbani musuh-musuhta. 

5. Adong do prinsip bani parpsalmen bahwa bani ganup na masa ningon do totap mardalan ia ibagas hata atap hasintongan ni Naibata. Ihaporsayai do bahasa marhitei hata ni Naibata do ia gabe tahan mandompakkon sitarononni. Isadari bahasa hasedaon bani goluhni sedo halani sitaronon atau ancaman tapi anggo daoh ia humbani dalan ampa hasintongan ni Naibata. Halani ai sitarononni ai justru gabe kesempatan do bani laho mambangun haporsayaon. Ase poripe ibagas situasi na sosak, ipataridahkon parpsalmen do tong tong sihol ni uhurni mamuji ampa pasangapkon Naibata. Bani ayat 12-13 isobut: “Sihol do pujionku Ham humbani gok ni uhurhu,anjaha pasangaponku goran-Mu sadokah ni dokahni. Ai banggal do idop ni uhurMu bangku,ipaluah Ham do ahu humbani nagori toruh”.

6. Bani bahagian na parpudi, Parpsalmen patugahkon bahasa Naibata aima Naibata paridop ni uhur ampa parholong, lambat manringis , parontou ni uhur banggal janah parsintong (ay.15). Halani ai hubani Naibata do ia roh. Parpsalmen porsaya bahwa Tuhan lang manguhumsi marhitei na paturutkonsi madabuh hubagas cengkeraman ni musuhni. Halani ai do ase mangindo ia: “Dompakkon Ham ma au anjaha maidop ma uhurmu bangku, bere Ham ma gogohMu bangku , anjaha paluah Ham ma anak ni jabolonmu naboru on. Bahen Ham ma bangku tanda hadearon…. (ay.16-17). Marhitei idop ni uhur , gogoh sonai tanda hadearon na humbani Tuhan gabe haganupan na mambahen goluhni tarsosak/musuh-musuhni mambotoh ampa menyadari bahwa Tuhan do penyelamat ni halak na doyuk ampa na masombuh. Tuhan do dekking na bekking bani sagala na porsaya Bani. Ase anggo Naibata hasomanta, ise ma imbangta?Porlu dingaton ni sagala imbang ni na porsaya, hubani Tuhan do sidea berhadapan anjaha marmunsuh. 

7. Refleksi

? Ihasilhon Naibata do ase goluhta gabe hasaksian na manggoluh pasal pambahenan-Ni na banggal na dob paluahkon hita. Halani ai maningon do hita totap martonggo songon tonggo ni parpsalmen on (ay.11-13).

? Totap mardalan bani dalan pakon hasintongan-Ni Naibata,ijai ma goluhta boi lambin ari lambin gokan dear janah gabe melodi na indah. Sagala na fals,na so harmonis, na so sadalan, na mabajan lambin terkikis ma. Goluhta boi  gabe hasangapon pakon puji-pujian bani Naibata. Halak na legan pe boi gabe mangidah janah manaksihon ise hita anjaha sidea pe gabe terberkati marhitei  hita.

? Marhasoman Naibata do goluhta boi sintong-sintong mardeka janah marhamonangan. Halani ai pabulat hita ma uhurta ase lambin marhatengeran bani Tuhan Jahowa ibagas na mandompakkon bagei bagei ni hasosakan ni goluh. Amen