Bahan Ambilan Minggu, 05 Nop 2017 (XXI Dob Trinitatis, Mika 3:5-12)

Bahan Sibasaon Minggu, 05 Nop  2017 (XXI Dob Trinitatis)

Teks : Mika 3:5-12 Doding:Haleluya 142 : 1,2,4

1. Teks ni ambilan banta bani minggu on patugahkon sonaha Naibata marhitei nabi Mika, manlawan horja hajahaton ni dunia on. Bani panorang pangidangion ni Mika, sumber ni hajahaton justru roh humbani pejabat, na marpangkat; baik ai humbani pejabat Negara atap pemerintahan sonai pakon pejabat agama. Ipakei sidea do jabatan ai laho mambuat hauntungan pribadi. Iodoh –odoh do hasoman jolma na legan laho mambuat untung. Sintong do hata namanobut paboa  buei do jolma lang boi gabe jolma dompak hasoman ni jolma. Jongjong do jolma gabe “lawan” bani hasomanni sesame jolma. Anggo domma sonon masa, lang na botoh be, na ija na sintong janah na ija na salah. Halani hapentaran ni jolma in, boi do na sintong ipabalik gabe lang sintong. 

2. Hata ni nabi Mika bani teks ni ambilan on sasintongni itujuhon hubani nabi-nabi ampa pambobai ni Israel. Anggo mangihutkon horjani, sidea on ma na laho padaskon hata “damei” dompak bangsa ai. Tapi hata “damei” na imaksudkon ai justru pitah laho parohkon hauntungan bani diri ni sandiiiri. Anggo lang dapotan nabi ai, justru na legan do na itingtingkon, gariada barita panjahaion na ipadas ni mambahen buei jolma gabe mabiar atap marpusok ni uhur. Ipakei sipambobai parugamaon ni Israel do hajongjonganni laho parohkon hauntungan bani diri ni sandiri. Panjahaion ni sidea pitah laho mamingkiri hauntungon tumang. Marhitei horja na sonin do ase ipadas Mika hubani sidea uhum na sihol pamasaon bani sidea. Gabe lang be marpanonggoran sidea, manggoluh ibagas hagolapan janah lang mampu be laho manjahai. Anggo mangihutkon hajongjonganni, on do sasintongni na gabe tugas utama ni sahalak nabi. Tapi uhum ni Tuhan hubani sidea mambahen gabe lang talup sidea mangkorjahon horjani. Sonai homa pasal pambahenan ni Naibata hubani sidea. Gabe parohkon habadoron  do haganup na ihorjahon nabi-nabi palsu ai. Nini bani ay.7 “Mela ma halak na marpanonggoran, anjaha bador ma halak sipanjahai…” Itadingkon Naibata do sidea. Halak na dob itadingkon Naibata, gabe habadoron do na masa bani goluhni.

3. Mika jongjong sedo pitah laho mengkritik aha na dob binahenni nabi-nabi ni Israel bani panorang ai. Dihut do age pambobai ni Jerusalem gabe tujuan kritik ni Mika. Sasintongni sedo ise na gabe pambobai ni sidea on, ai ginompar ni Jakob do sidea. Tapi agepe sonai, sedo gabe jaminan ai bani sidea laho mambobai bangsa ai ibagas na hinarosuhkon ni Naibata. Ipatugah Mika do pambahenan ni sidea na masambor ai. Ibagas hajahaton do sidea mandalankon tugas ni selaku pambobai ni bangsa ai. Ihagigihon sidea do uhum, ipapeol do sagala na pintor; haganupan on pitah laho pasaudkon harosuhni sidea. Ijalo sisip, upah na lang tiba dalanni. Lobih ni ai, pag ope sidea manobut paboa na itongah-tongah ni sidea do Naibata agepe sasintongni haganup na binahen ni sidea ai gabe hagigi bani Naibata. Lang adong be na boi parohkon hasintongan humbani sidea. Pitah hajahaton do na irencanahon  sidea dompak hasomanni na adong ijai. Sonai ma parahni pambahenanni sipambobai sonai age nabi ampa malim na adong bani bangsa ai. Haganupan on tontu mamuhoi ringis ni Naibata. Ijon do ase ipadas Mika panjahaion ni pasal sidea. Mampangkorhon pusok ni uhur do aha na dob ihorjahon sidea. Halani ulah ni sidea na jahat ai, gabe tinggalaon do Sion songon juma. Sonai homa Jerusalem gabe gugunan batu ampa rumah panumbahan na gabe harangan. Gambaran pasal parsed ni huta ai binahen ni nabi, malim sonai age sipambobai na lang ra manangihon harosuh ni Tuhan. Ipatangkas Mika do hajongjongan ni na laho patugahkon uhum dompak bangsa ai. Agepe anggo bani panorang ai, sada huta na sangap janah buei do jolma marianan I Jerusalem, tapi halani ulah ni nabi, malim ampa sipambobaini bangsa ai gabe maseda do huta ai.

4. Sondahan on, buei do jolma mangaku laho pajongjongkon hasintongan, hadameion ampa uhum. Buei do na mangaku ra berkorban ase na sintong na humbani Naibata idalankon ibagas goluh on. Gariada adong do padan na ipadas ni sidea na laho memperjuangkan hasomanni na ibagas pangodoh-odohon, tapi bani kenyataanni pitah laho mandapotkon hasonangan ni sandiri. Ra do buei halak tartipu anggo mangidah penampilan sonai age gaya  parsahapni sidea. Anggo mangihutkon na hinatahonni nabi Mika, haganupan on pitah halani na lang adong be kuasa ni Tonduy ni Jahowa na laho mambobai hita mangkorjahon harosuhNi. Sedo gabe ukuran pasal ise hita (pemuka agama, sipambobai bani pamarentah, wakil rakyat, pnl), ai boi do haganupan on gabe manadingkon harosuh ni Tuhan, anggo lang marianan be Tonduy ni Jahowabani goluhta. Kritik sosial na ipadas nabi Mika ijon, dihut do gabe kritik hubanta halak na porsaya bani panorang on. Ijalo hita do parentah ampa suruhan humbani Tuhan ase pajongjongkon  hasintongan. Maningon isadari hita do paboa hita do na gabe parhiteian ni Naibata laho mangkorjahon hasintongan sonai age harosuh ni Tuhanta.

5. Bani minggu pesta Bapa, gabe panorang na dear ma on banta sekaligus laho paingatkon haganup bapa ni GKPS ase gabe sipambobai, malim sonai age nabi na ra mandalankon harosuh ni Naibata. Humbanta ma lobei roh ni na madear, ase marhiteihon na sonai ai gabe sitiruon ma hita bani horja na madear, itongah tongah ni keluarga, kuria sonai age masyarakat.

 

Read 104 times

Last modified on Thursday, 02/11/2017

Leave a comment

Make sure you enter all the required information, indicated by an asterisk (*). HTML code is not allowed.

Go to top
Template by JoomlaShine