GABE HALAK KRISTEN NA PORSAYA MA ! (Ambilan 11 Agustus 2019 Mateus 8 : 23 – 27)

GABE HALAK KRISTEN NA PORSAYA MA !

Ambilan 11 Agustus 2019

Mateus 8 : 23 – 27 

1. Isiar Tuhan Jesus pakon susian-Ni do buei huta laho patandahon diri-Ni sebagai Mesias Anak ni Naibata marhitei pangajarion age buei tanda halongangan. Sobali mardalan nahei, alat transportasi na somal panorang ai aima kapal/parau. Bani ambilan on ipatugah do na masa sanggah na marparau Tuhan Jesus rap pakon susian hun Kapernaum manuju hu tanoh ni halak Gadara. Tudu sanggah modom Tuhan Jesus, roh ma haba-haba na doras pala ipuhoi sidea Tuhan Jesus janah nini sidea ‘Tuhan, urupi, harom ma hita!’ (ay.25). Marhitei na ipuhoi sidea Tuhan Jesus tangkas ma banta bahwa susian ai domma mabiar tumang janah lang mampu be mengendalihon kapal ai. Pori pe susian ai umumni berlatarbelakang panjala dekke hinan na dob somal menghadapi gilumbang ni tao tapi bani panorang ai sidea lang berdaya halani banggalni gilumbang. Sihol mangajarhon bahwa lang hape tarpangajamhon gogoh, pambotoh, pengalamanta jolma mengatasi ganup persoalan ni goluh on. Peristiwa ai sekaligus pataridahkon bahwa panandaion ni susian pasal Jesus sebagai Tuhan lape seutuhni halani sidea pitah mananda Ia sebagai jolma biasa hansa na ra tarpodom sehingga porlu ipuhoi. Lape iarusi sidea bahwa kuasa ni Tuhan Jesus sebagai Anak ni Naibata lang ongga tarpodom laho manramotkon susian.  

2. Dob puho Tuhan Jesus, nini ma hubani susian: ‘Mase mabiar hanima? Otik ni in haporsayaonnima!’ (ay.26). Na ipinsang Tuhan Jesus dob puho sedo haba-haba tapi haporsayaon ni susian do. Ketidak-percayaan ai do na parohkon biar. Halani ai na parlobei ibereshon aima hauhuron ni susian na lape porsaya ai do. Menyatu do hata mabiar ampa porsaya. Anggo domma porsaya bani Tuhan Jesus pasti do lang mabiar mandompakkon age sonaha banggal ni gilumbang. Sungkun-sungkun ni Jesus ‘mase mabiar hanima?’ sangat beralasan halani riap pakon Tuhan Jesus do sidea i parau ai tarlobih halani domma homa buei iidah sidea tanda-tanda halongangan na ibahen Tuhan Jesus. Ternyata boi do hape domma  riap pakon Tuhan Jesus, atau domma gabe halak Kristen bahkan parhorja ni kuria homa na domma gati manobut goran ni Tuhan Jesus tapi lape bertumbuh panandaion ampa haporsayaon ni sidea mambahen gati bulinsah janah mabiar mandompakkon gilumbang ni goluh on.  Jadi masalah na utama sasintongni sedo haba-haba tapi haporsayaon na lape bertumbuh do. 

3. Pori pe lape toguh haporsayaon ni susian ai tapi ipaminop Tuhan Jesus do tao ai (ay.26). Pori pe ibagas hagalekon ope susian tapi sirsir do Tuhan Jesus mangajari ampa mangkaholongi sidea. Peristiwa ai ipakei Tuhan Jesus sebagai sarana mangajar susian bahwa markuasa do Ia mengatasi gilumbang. Gilumbang ai roh sedo bertujuan ase magou susian tapi ase lambin takkas do iidah sidea banggalan do kuasa ni Tuhan Jesus marimbang gilumbang na doras ai. Sekaligus mangajarhon ase ulang mangunsagah susian bani kemampuan ni sidea tapi hubani Tuhan Jesus ma. Anggo domma riap janah porsaya bani Tuhan Jesus lang talup be mabiar mandompakkon age aha na masa. Hatahonon, status sebagai susian lang boi ipisahkon humbani haporsayaon. Lang talup goranon susian anggo lape porsaya bani kuasa ni Tuhan Jesus. Sahalak susian ningon do homa sahalak na porsaya. Lang boi pitah riap sakapal dalam arti manobut dirini sebagai siirikkon Tuhan Jesus hape lape porsaya bani Tuhan Jesus. Halak na sonon sipinsangon ope ai.

4. Refleksi

a. Manusiawi do tubuh uhur biar tapi bani na lang porsaya uhur biar boi patubuhkon hasedaon ampa pandoleian.

b. Haporsayaon na bertumbuh janah lambin matoras, ai do ipindo marhitei ambilan on. Ulang ma lalap danak haporsayaonta tarlobih bani pesta olob-olob kuria na domma 116 tahun pardas ni  Injil i tanoh Simalungun.

c. Sai na adong do tong gilumbang ni goluh. Tapi sada malas ni uhurta bahwa adong do Tuhan Jesus hasomanta na pamonangkon hita. Anggo ipaturut Naibata masa gilumbang ni goluh, sitaronon, pergumulan sedo maksudni ase munop hita ijai tapi ase lambin tarjolma do hita laho mananda  ampa mangidah kuasa pangkasomanion ni Tuhan. Lang ongga tarpodom Tuhan Jesus mangkasomani ampa paluahkon hita. Ningon isadari hita bahwa aha pe lang tarhorjahon hita anggo lang marhasomankon Tuhan (Joh 15:5). Haporsayai hita ma bahwa banggalan do kuasa-Ni marimbang haganup gilumbang ni goluh na idompakkon hita. Marhitei na sonin ma lambin daoh hita humbani uhur biar tapi lambin marbanggal ibagas olob-olob.

d. Ase masalah na utama na tang sihabiaran domu bani ambilan on sedo aha na masa bani goluhta tapi anggo lang bertumbuh haporsayaonta do. Anggo sehat do haporsayaonta lambin etek do iidah hita pergumulan atau gilumbang ni goluh on. Sebalikni, lambin otik haporsayaonta maka lambin banggal ma homa iidah hita pergumulan ni goluhta. Ase kata kuncini aima haporsayaon.

e. Membangun haporsayaon aima marhitei na setia manangar hata ni Tuhan halani humbani na manangar ambilan do roh ni haporsayaon. Anggo lambin ibere hita uhur ampa panorangta marsaor pakon hata ni Tuhan, ijai do homa lambin torang uhurta janah boi iidah hita bahwa ganup na masa aima sebagai kesempatan mengalami idop ni uhur ni Tuhan.

f. Ase ulang ma pitah isobut hita dirinta sebagai halak Kristen tapi gabe halak Kristen na porsaya ma.

g. Haluahon na humbani Tuhan Jesus dihut mamboan hagoluhan na sadokah ni dokahni marhitei na domma italuhon Tuhan Jesus haganup musuh na pamateihon hita aima dosa-dosanta. Lang matei be hitaa halani dosanta halani domma ipamatei Tuhan Jesus sorot ni dosa ai.

h. Haleluya No. 458 : 1 – 2     

Read 1227 times

Leave a comment

Make sure you enter all the required information, indicated by an asterisk (*). HTML code is not allowed.

Go to top