TONGTONG MAMAKEI KACA MATA ‘HATA NI TUHAN’ (Sibasaon 04 Agustus 2019 1 Tesalonika 4 : 13 – 18)

TONGTONG MAMAKEI KACA MATA ‘HATA NI TUHAN’ 

Sibasaon 04 Agustus 2019

1 Tesalonika 4 : 13 – 18 

 

1. Hamateian merupakan sada misteri halani lang adong jolma na mambotoh panorangni sadihari ia matei janah sonaha do jolma na dob matei. Secara umum ipahami bahwa hamateian aima masa akhir sejarah ni sasada halak. Halani ai hamateian ipahami do homa sebagai panorang parsirangan pakon hasoman, keluarga na tading sehingga tubuh tangis ampa pusok ni uhur.

2. Ambilan on patorangkon bahwa halak na dob matei isobut do ‘na dob modom’ (ay.13), janah isobut use ‘arahkonon ni Naibata do na dob modom in rap pakon-Si’ (ay.14). Anggo hamateian ipausih hubani na modom, mararti do ai na laho puho do use.  Hal on boi terjadi halani domma matei Jesus anjaha puho use mangkopkop na porsaya (ay.14). Parpuhoon ni Tuhan Jesus gabe jaminan bani na porsaya bahwa lang be markuasa hamateian manrahut goluh ni sidea. Hamateian bukanlah akhir tapi adong ope pangarapan i balik ni hamateian ai (Psalmen 16:9-11 ; Joh. 19:25-27). Pasal on takkas isobut bani ay.16 ‘Ai Tuhan in sandiri ma tuad hun nagori atas marhasoman surak-surak, parentah pakon hata ni raja ni malekat, anjaha terbogei ma tarompit ni Naibata. Jadi puho ma parlobei na matei ibagas Kristus’. Halani ai na porsaya ningon memiliki sisi pandang na baru pasal hamateian bahwa hamateian lang be sesuatu sihabiaran be  

3. Domu hujin ambilan on sekaligus marisi pangajaran sonaha do halak na porsaya mamakei panorang ni goluh na ibere Tuhan ope. Hita na manggoluh nuan marianan bani kurun waktu antara ‘na dob masa’ (doma roh) pakon ‘na laho masa’ (laho roh use). Maksudni, domma roh Tuhan Jesus hu dunia on tapi laho roh ope Ia paduahalihon. Artini, nuan pe hita domma manggoluh riap pakon Tuhan Jesus halani domma roh Ia hu dunia on. Pangkorhonni goluhta pe domma margoluh na baru ibagas Tuhan Jesus. Tapi goluhta sonari sekaligus do homa panorang paimahon parroh ni Tuhan Jesus use paduahalihon. Bani 1 Kor.13;12 isobut: ‘anggo sonari, mangkawah do hita songon bani sormin, samak hansa, tapi use padumpar bohi ma’. Maksudni: Sonari pe domma gabe jolma na pinaluah hita tapi kesempurnaan ni haluahon ai jumpah bani parroh ni Tuhan Jesus paduahalihon. Sebagai jolma na dob ipaluah maka goluhta sonari pe ningon do mencerminhon goluh na  madear. Janah sebagai na paimahon parroh ni Tuhan paduahalihon, hita ningon totap waspada, ulang terlena.  Porlu tongtong waspada halani lang ibotoh hita sadihari parroh ni Tuhan ai halani isobut songon panangko borngin do parroh-Ni (1 Tes.5:1-2). Artini, maningon secara aktif do hita bani na paima-imahon parroh ni Tuhan Jesus ai marhitei na berjuang songon atlit manramotkon ampa mamparbuahkon haporsayaonta.

4. Ambilan on dihut homa mangajari hita pasal bagei ni rumang ni hamateian na jumpah age bani panorang ni goluhta sonari. Anggo hamateian ni halak na porsaya domma tangkas banta bahwa na modom do sidea janah na paimahon ari parpuhoon. Tapi bani goluhta sonari on pe boi do terjadi bagei rumang ni hamateian misalni: matei partonduyon atau haporsayaonni, matei uhur holongni, matei rasa sosialni, mati rasa atau kepedulianni, pnl. Bahkan melalui media sosial nuan on pe justru na bertumbuh justru asosial do use halani lambin moru / terganggu do use parsaoran antar sesama baik antar anggota keluarga akibat ni salah mamakei media sosial. Domu hujin goluhta ulang ma gabe agen-agen ni hamateian na sinobut i atas in tapi sebalikni hadir ma mamboan pencerahan marhitei na saling marsipodahan marhitei hata ni Tuhan (ay18). Tugasta do mambere panorangion marhitei hata ni Naibata hubani halak na legan ase sidea pe selalu memiliki sisi pandang na baru aima sisi pandang hata ni Naibata laho mangarusi ampa mandompakkon haganup na masa. Kekuatiran bahkan putus asa na gati terjadi bani jolma umumni aima halani lang memiliki ampa mamakei sisi pandang hata ni Naibata laho mangarusi ragam ni na masa termasuk memahami makna ni sitaronon ampa hamateian. Saling marsipodahan bani hata ni Tuhan menjadi dalan ase haganup hita lambin terbangun ibagas haporsayaon bani na paima-imahon parroh ni Tuhan paduahalihon ai.

 

5. Refleksi

a. Manggoluh do hita nuan i dunia on tapi sedo dunia on rumah na totap banta. Na mardalan do hansa hita i dunia on, bani panorangni tadingkononta do hasiangan on. Anggo ibere Tuhan ope hita manggoluh i dunia on mararti do ai sebagai bukti holong-Ni banta halani ibere ope kesempatan banta lambin bersiap diri paimahon parroh-Ni paduahalihon. Ulang lansei mamakei panorang, lambin jaga ma hita.

b. Marhitei parpuhoon ni Tuhan Jesus humbani na matei lang pala be sihabiaranta age hamateian halani domma dihut hita parsimada bani parpuhoon ampa hamonangan ni Tuhan ai. Lang be hamateian ujung ni goluhta na porsaya. Sihabiaran lang be hamateian ni angkula tapi anggo matei haporsayaon atau partonduyonta do.

c. Lang binotoh sadihari hita manadingkon dunia hasiangan on. Halani ai bani ganup panorang maningon do ijaga hita uhur, pingkiran ampa goluhta ase tongtong maronjolan bani hata ni Tuhan.

d. Lambin marsipodah-podahan ma hita marhitei hata ni Tuhan ase hata ni Tuhan ai na manondangi uhur ampa langkahta. Marhitei na sonai hita lang gabe galek mandompakkon haganup na masa tapi totap poltik manjolom haporsayaonta pori pe aha na masa ase ulang tarbador hita bani ari parroh ni Tuhan ai.

e. Totap ma pakei hita hata ni Tuhan laho mangarusi ampa mandompakkon haganup na masa bani goluhta ase ibotoh hita bahwa na totap do isarihon janah ipaluah Naibata hita.

f. Haleluya 205 : 1 – 3 

Read 576 times

Leave a comment

Make sure you enter all the required information, indicated by an asterisk (*). HTML code is not allowed.

Go to top