2. Halani ai ipatumpu si Gideon ma humbani bangsa ai 32.000 halak laho marporang manlawan halak Midian (Pang. 7:3). Dob ai iparentahkon Naibata ma bani Gideon ase isuruh mulak sagala na mabiar marporang sehingga tading ma 10.000 halak. Ihatahon Naibata ma use bahwa mabueitu do ai laho manaluhon halak Midian halani tangan ni Naibata do na manaluhon Midian (7:2). Jadi iarahkon ma sidea minum hu bah janah ise na minum marhitei na manirup bah marhitei dilahni (manirup bah humbani tanganni/na jongjong minum) aima na bulih dihut marporang janah bueini 300 halak. Cara minum na sonon pataridahkon kesiapan halani age sanggah minum boi do tiba-tiba roh munsuh sehingga maningon selalu siap manangar aba-aba/komando (na humbani Tuhan) age sanggah minum. Sonin ma Naibata mamilih sidea ibagas tujuan ase ibotoh sidea bahwa hamonangan ai sedo halani keahlian na imiliki sidea, sedo homa halani buei ni tentera tapi pitah halani kuasa ni Naibata do. 

3. Secara logika, lambin buei tentera na marporang maka kemungkinan monang lambin banggal, tapi na jumpah ijon untuk manuju hamonangan justru personil iorui do use. On mambere pangajarion bahwa hamonangan ni bangsa ai sedo marhitei gogoh ni sidea tapi halani kuasa ni Naibata do. Pesan na jumpah ijon aima: dearan do na otik asal ma ibagas pangkasomanion ni Naibata marimbang buei tapi lang hadir Naibata bani horja ai. Pori pe otik atau hita gok ibagas keterbatasan lang pala mabiar asal ma tongtong mangajamhon kuasa ni Naibata. Hamonangan sedo itontuhon gogoh ni tangan tapi tangan na ipasu-pasu Naibata do. Sekaligus mangajaarhon bahwa Naibata lang marosuh anggo ienjenghon jolma in gogohni tapi na ipindo ase totap marpangajaman bani Naibata. Pori pe buei munsuh atau tantangan bahkan gati pangahap banggalan marimbang gogohta, lang sihabiaran asal ma totap marhatengeran bani Naibata. Ase boi jumpah haluahon, Naibata lang manungkun sadiha gogohta tapi na ipindo aima uhur na marhatengeran hu-Bani do. Lang iharosuhkon Naibata jolma na mangenjengkon dirini, jabatanni ampa artani. Jolma na sirsir patoruhkon uhur ampa diri i lobei ni Naibata do na ipindo banta. Ase haganup na adong banta ulang gabe dalan pagijangkon uhurta tapi ipakei ma laho pabanggalhon goran ni Naibata.

4. Isuruh Naibata do borhat si Gideon ampa si 300 halak ai hu parlampo-lampoan ni halak Midian, janah nini Naibata ‘ai domma Huondoskon ai hubagas tanganmu’ (ay.9). Paima borhat pe si 300 halak ai, ternyata domma ibere Naibata jaminan hamonangan bani sidea manaluhon halak Midian. Gideon ampa hasoman ni ai borhat apa adanya tanpa memiliki persiapan perang na memadai tapi ipaborhat do sidea ibagas janji hamonangan na humbani Naibata. Rasa optimisme ni sidea mandompakkon musuh na gogoh sedo halani kehebatan ni sidea tapi halani Naibata do na marsuruh ampa paborhathon sidea. Hunjon boi jumpah hita parlajaran bahwa tujuan ni jolma na marhatengeran hubani Naibata lang ongga kabur tapi domma jelas aima hamonangan. Songon pengalaman ni si 300 halak ai manaluhon halak Midian, sonai ma gati pengalaman ni goluhta. Boi do bani mungkahni songon na lang mungkin nini uhurta, tapi sada panotap bahwa lang ongga ipaturut Naibata tarbador jolma na marhatengeran hu-Bani. Na ipindo hubanta aima: ase iranggi janah ihorjahon hita ganup horjanta ibagas pambobai ni Naibata ; Tentang hamonangan, Naibata do na pasirsirhon ai banta.

5. Refleksi

a. Ragam do na boi mambahen hita mabiar bani goluh on. Boi do ai halani hagalekon atau keterbatasanta sementara tanggungjawabta buei ope. Bani keadaan na sonin ma gati roh sibolis marhusip ase iraguhon hita kuasa ni Naibata ase madabuh hita hu pandoleian atau laho hita mangindo pangurupion hubani kuasa-kuasa ni dunia on. Jaga ma hita, ulang ra hita manangihon husip ni sibolis, tuk do kuasa ni Naibata mangurupi hita.

b. Antara marpangajaman bani gogoh atau na adong banta daripada marpangajaman bani Naibata gati ope pilihan na kabur bani goluhta. Lang otik jolma lebih yakin bani aha na adong bani marimbang porsaya hubani Naibata. Sada kepastian, tarbador do jolma na mangunsagah pitah bani dirini tapi jumpahan gogoh ampa hamonangan do jolma na mangunsagah bani Naibata. Bagei do cara ni Naibata paluahkon ampa pamonangkon hita bahkan lobih humbani aha na boi ipingkiri hita ampa gogohta. Naibata markuasa do mangurupi asal ma totap hita mandalani goluh on ibagas paambobai-Ni.

c. Haporsayaon bani Naibata lang boi terpisah humbani ketaatan bani pambobai ni Naibata. Ulang ma hita pitah manobut dirinta porsaya tapi lang taat bani cara ampa pambobai ni Naibata. Gideon lang pitah porsaya tapi idalankon do homa hata atau parentah ni Naibata gabe jumpah hamonangan.

d. Ase tugasta sasintongni aima mangkorjahon ganup horjanta ibagas pambobai ni Naibata, pasal buah atau hasil ni horjanta Naibata do na pasirsirhon ai banta. Ulang be mabiar mandalani goluh on.

e. Hamonangan na humbani Naibata domma igoki marhitei Tuhan Jesus. Haluahon do rupei ni hita na porsaya. Marhitei Tuhan Jesus domma pasti isarihon Naibata goluhta sonari ronsi sadokah ni dokahni.

f. Haleluya No. 48 : 1 – 3