TONGTONG DO ISARIHON NAIBATA HITA (Ambilan 21 Mei 2017)

Ambilan 21 Mei 2017, Psalmen 66 : 8 – 20

TONGTONG DO ISARIHON NAIBATA HITA

Psalmen on marisi hasaksian pasal holong ni Naibata bani bangsa-Ni. Ialami sidea do bagei ni paruntolon. Sitaronon ai isobut bani ay.11: Itogu hubagas jaring. Jaring manggambarhon tawanan na patugahkon borat ni sitaronon ni sidea sanggah itaban halak Babel. Pangkorhonni, jolma margareta i atas ulu ni sidea, maksudni: sidea domma tunduk hubani halak Babel na manjajah sidea. Bahkan masuk hubagas apuy pakon bah, artini: sidea sedang menghadapi ancaman na banggal na secara ukuran hajolmaon domma manuju hu hamateian.

Bani situasi na sonai isaksihon do holong ni Naibata na paluahkon sidea. Bani ay.9 isobut: Ia na mambahen hosah nami manggoluh, anjaha seng ilopas nahei nami tartolsu. Ungkapan ‘mambahen hosah nami manggoluh’ maksudni: sidea sasintongni domma usih songon na matei halani borat ni sitaronon humbani bangsa na banggal na manjajah sidea. Haluahon ai pitah halani holong ni Naibata do. On gabe hasaksian bahwa gogohan do Naibata marimbang musuh na mangodoh-odoh sidea, gogohan do Naibata marimbang haganup kuasa na adong i tanoh on.

Domu hujin isaksihon do bahwa sitaronon na ialami sidea sasintongni sedo bertujuan laho mangagou sidea tapi hal ai terjadi ibagas rancangan ni Naibata laho manguji ampa papitahkon haporsayaon ni sidea do. Nini bani ay. 10 ‘Tongon, domma iuji Ham hanami, alo Naibata, domma ilobur Ham hanami songon na manlobur pirak’. Hatahonon, sitaronon na ialami ai sihol menyadarhon sidea bahwa tanpa kehadiran ni Naibata lang margogoh sidea, sekaligus ase lambin ihatengerhon sidea kuasa ni Naibata. Ulang halani sitaronon gabe roh daohni humbani Tuhan janah ulang ma mencari solusi humbani kuasa na legan. Sitaronon ai isobut do sebagai ujian halani bertujuan do ai laho mendewasahon haporsayaon ni sidea.

Domu hujin ipatugah par-psalmen do homa sonaha sikap na dear na iharosuhkon Naibata ketika jolma in roh mandilo goran-Ni mangindo pangurupion, nini bani ay.17-18 ‘Hu-bani do dilo-dilo ahu marhitei pamanganku’, ‘Ambit adong hajahaton hukawahkon ibagas uhurhu, tontu seng tangihonon ni Tuhan ahu’. Hatahonon, mandilo goran ni Naibata lang cukup pitah hata tapi ningon do sadalan hubani hauhuron. Tonggo lang cukup pitah jenges bani hata tapi hauhuron pe homa ningon do jenges. Tarolat do tonggo anggo lang sadalan hata pakon hauhuron na marhatengeran hubani Naibata.

Selanjutni ipatugah par-psalmen do sikap iman halani haluahon na domma ibere Naibata. Bani ay.13-15 isobut do na roh ia hu lobei ni Naibata mamuji ampa martarimakasih marhitei na mamboan galangan. Sikap on gabe sada pengajaran ase ulang pitah sirsir mandilo goran ni Naibata sanggah adong sitaronon ampa pergumulan, tapi sirsir ma homa mamuji ampa martarimakasih hubani Naibata age dob manjalo haluahon. Ulang ma ketika mangindo roh marhasoman elek-elek tapi dob manjalo lupa martarimakasih hubani Naibata, bahkan gabe manundalhon Naibata use. Marhitei na padaskon galangan hatarima-kasihon, ijai do homa taridah pengakuan / hasaksian bahasa Naibata aima na sangap janah markuasa.

Refleksi

Bagei do cara ni Naibata laho mangajari hita, bahkan boi do age marhitei sitaonon ampa masalah na idompakkon hita. Anggo ialami hita sitaronon bani goluhta, sedo na mararti na itadingkon Naibata hita. Anggo adong na mambahen na lang suman banta, mararti do ai Naibata sedang mangajari hita marhasabaron ampa memaafkan. Halani ai suka – duka na ialami hita ningon ipakei ai gabe kesempatan membangun haporsayaon. Iman dan peenyerahan kepada Tuhan harus bertumbuh age sanggah adong paruntolon. Anggo sonon cara berfikirta, pasti do lambin iahapkon hita holong ampa pangurupion ni Naibata.
Anggo martonggo hita hubani Naibata (goran ni minggu rogate = martonggo), sihol ma humbani uhur na bulus, ulang pitah hata ni tonggonta jenges. Goluh ampa pangabakta pe ningon do jenges.
Ulang ma homa pokkut martonggo pitah sanggah adong sitaronon, tapi pataridahkon hita ma homa goluh na pasangapkon Naibata dob manjalo pasu-pasu na humbani Naibata marhitei galangan ampa goluh na totap pasangapkon Naibata. Uhur na martarimakasih taridah do homa humbani sikap na memiliki komitmen sirsir pasangapkon Naibata. Pasangapkon Naibata mararti do ai marusaha pamalaskon uhur ni Naibata marhitei hata age langkahta pe. Artini, hampung langkah mardalan bani rosuh ni Naibata.
Hagogokni holong-Ni tarbukti do marhitei Tuhan Jesus na sirsir roh hu dunia on paluahkon hita humbani dosanta ase boi parsimada hita bani harajaon ni Naibata.[]

Published in: Ambilan & Sibasaon

Read 1510 times

Last modified on Thursday, 13/07/2017