NAIBATA DO BATAR-BATARTA (Sibasaon 28 April 2019 Psalmen 116 : 5 – 9)

NAIBATA DO BATAR-BATARTA

Sibasaon 28 April 2019

Psalmen 116 : 5 – 9 

 

1. Ambilan on aima ungkapan haporsayaon (pengalaman rohani) ni parpsalmen pasal holong pakon kuasa ni Naibata sanggah mandompakkon sitaronon na borat. Ongga do ialami sitaronon na borat na lobih humbani gogohni. Lang pala ipatugah aha do sitarononni ai tapi isobut bani ay.3 ‘Ililiti rantei ni hamateian do ahu, anjaha biar nagori toruh do mandorab ahu; mandagei hasunsahan ampa sitaronon do ahu’. Sitaronon ai dihut mambahen tergoncang age tonduyni, artini: lang jumpahsi be ketenangan jiwa. Secara medis, hal on menjadi awal gabe stress ampa depresi, pakon satorusni. On patugahkon lang adong be solusi anggo secara pingkiran ni jolma. Bani keadaan na sonai idilo do goran ni Jahowa: Ham Jahowa paluah Ham ma tonduyhu (ay.4).

2. Selanjutni iasaksihon do bahwa paridop ni uhur, parpintor anjaha parholong do Naibata (ay.5). On lang teori tapi na secara langsung ialami oleh parpsalmen. Itangihon Naibata do dilo-diloni gabe margogoh janah maluah ia humbani parmaraan na borat ai. Bahkan isimpulhon ‘Jahowa do siramotkon halak paruhur sisaluju’ (ay.6). Paruhur sisaluju mararti: tulus, sederhana, lang mangunsagah bani gogohni. Bahkan iakuhon ‘galek hinan do ahu, tapi ipaluah do (ay6b), artini: haluahon ai sedo halani gogohni tapi halani ipaluah Naibata do. Haluahon ai mambahen lambin tangkas panandaionni bani holong ni Naibata janah ipasangap Naibata, lang gabe gijang ni uhur. Haporsayaonni bertumbuh dob manjalo holong ni Naibata, pengalaman pahit ni parpsalmen gabe kesempatan mananda ampa marondos bani Naibata.

3. Sadalan hujin lambin toguh do uhurni parpsalmen, nini:  ‘Mulak ma ho sonang ale tonduyhu, ai domma ibahen Jahowa na madear bam’ (ay.7). Kuasa ampa holong ni Naibata domma ialami janah iakuhon secara pribadi, lang be pitah marhitei barita. Ia domma memiliki hubungan na intim pakon Naibata, lang be halani na iojur-ojur tapi halani na dob porsaya do. Terlepas sonaha halak na legan, tapi ia domma menyimpulhon: parholong do Naibata. Pengakuan on tubuh halani ibilang-bilangi holong ni Naibata na paluahkonsi humbani hamateian, mangapus iluhni pakon mambobai naheini humbani partolsuan (ay.8). 

4. Panandaion ampa haporsayaon na sonin ma patubuhkon semangat na baru bani parpsalmen ‘Boi ma ahu mardalan i lobei ni Jahowa, bani tanoh ni halak na manggoluh’ (ay.9). Ia memiliki sikap optimis manoruskon ari-ari ni goluh. Parpsalmen sadar pori pe idompakkon badai kehidupan tapi domma ihaporsayai bani ganup keadaan totap do ia i lobei ni Jahowa, artini: totap ibagas panjagaion ni Naibata. Halani ai yakin do ia lang sontou langkahni mandalani goluhni. Bahkan boi ma ia mardalan bani tanoh ni halak na manggoluh, maksudni: lang anjai tompas, lang tarbador tapi margogoh do ia mardalan age bani dalan na landit halani domma marhasoman Naibata.

 

5. Refleksi

a. Anggo lang tenang menghadapi masalah boi do berdampak: masalah ai lambin borat atau lambin bolagni, hasomanta pe gabe dihut mangarou halani masalahta janah na pasti semangat hidup lambin moru, naborit pe urah-urah ma roh. Ambilan on paingatkon ase songon sikap ni parpsalmen: ‘sonang ma ho ale tonduyhu’. Artini, tenger uhurta bani Naibata. Anggo tenger uhurta bani kuasa-Ni, ijai do iajari hita manontuhon aha na sihol sibahenon janah boi ma homa hita sinok modom.

b. Ase dear do ipingkiri hita pergumulan/badai hidup tapi ningon isadari hita lang haganup masalah boi isaloseihon hita anggo humbani gogohta, ilmu pengetahuan ampa iptek pe lang mampu mambere solusi bani haganup masalah na adong, hasomanta pe terbatas do laho mangurupi hita. Halani ai sikap na terbaik aima mandilo goranni Naibata ibagas haporsayaon ase ipatorang uhurta mencari solusi bani ganup na masa. Ulang ma homa namin mandilo goran ni Naibata tapi lape porsaya Bani.

c. Ase ulang ma terlindas haporsayaonta ibahen masalah tapi sebalikni dompakkon hita ma ganup masalah marhitei haporsayaon. Anggo porsaya do hita bani Tuhan boi do hita bertahan halani kuasa ni Naibata pasti do melebihi aha na boi ibayangkon janah ipingkiri hita.

d. Usih hubani na berlayar janah iterjang logou na doras, mungkin kapal ai boi do hancur tapi justru ijai ma talar halongangan halani boi hita das hu daratan pori pe kapal domma hancur. Sonai ma goluhta on mungkin buei na maseda, tarjual, pnl. halani bueini masalah ; tapi martarimakasih ma tongtong bani Tuhan anggo boi ope hita mandalani goluh on.

e. Dob pesta parpuhoon ni Tuhan Jesus ipaingat do hita bani kuasa hamonangan-Ni na ipaondos banta bahwa lang be markuasa age aha na masa ronsi hamateian manirang hita humbani holong ni Naibata. Halani ai tenger ma uhurta i lobei ni Naibata do hita tongtong mandalaani goluh on, ibagas kuasa panramotion-Ni do hita tongtong.

f. Haleluya No. 138 : 1 – 3 

 

Read 495 times

Leave a comment

Make sure you enter all the required information, indicated by an asterisk (*). HTML code is not allowed.

Go to top