HALUAHON DO RANGGIAN NI NAIBATA BANTA

Sibasaon 15 Oktober 2017

Baca Teks : Jesaya 25 : 1 – 9

1. Ambilan on aima hasaksian pasal kuasa habanggalon ni Naibata. Naibata memiliki otoritas bani ganup dunia on. Aha na dob iranggihon Naibata pasti do saud halani gok Bani do sagala kuasa. Gok halongangan do kuasa-Ni janah ganup pambahena-Ni ibagas hasintongan do (ay.1). Halani ai lang adong jolma na boi terluput humbani panonggor ni Naibata janah haganup ningon do mampartanggung-jawabkon horjani bei i lobei-Ni. Ia do Panguhum na sintong janah ganup bangsa na mangenjeng ampa na mangkorjahon hajahaton pasti do hona uhum. Bahkan bani ay.2 ipatugah do bahwa kuasa ampa habanggalon ni bangsa na i dunia on ningon do mareong. Halani ai haganup jolma na gogoh pe maningon do tunduk janah mangkabiari Naibata (ay.3).

2. Ipatugah do homa bahwa Naibata do na mansarihon halak na madoyuk, aima sidea na gabe korban pangodoh-odohon ni parjahat na mangenjengkon kuasa ampa gogohni sandiri. Pori pe parjahat in idahon songon na sangap tapi sasintongni doskon milas nirungkub ni hombun do olob-olob ni sidea ipasip Naibata (ay.5). Maksudni, ketika parjahat in marmalas ni uhur halani hajahatonni, tapi sasintongni domma manuju paruhuman ni Naibata sidea ai, janah olob-olob ni sidea ai igantih gabe hasedaon ampa hamarsikon. Ketika dunia bangga ibagas horja hajahaton, ambilan on menegashon horja haotoon do ai. Domu hubani panandaion na sonin ma Jesaya menegashon bahwa pitah Naibata do na talup sipujion ampa sipasangapon (ay.1). Halak na oto do jolma na biaran hubani jolma dari pada hubani Naibata.

3. Kuasa halongangan ni Naibata ternyata dihut do mansarihon goluh ni ganup bangsa na i tanoh on. Ia lang pitah Siparkuasa janah na sari hubani halak Israel tapi isarihon do ganup bangsa marhitei na mandilo sidea bani pesta banggal na ipasirsir Naibata i atas dolog (ay.6). Pesta banggal aima pesta malas ni uhur na igoki marhitei hidangan na mantin. On martuduh-tuduh hubani kehadiran ni Mesias aima Sipaluah hubani ganup bangsa. Ijon talar ma bahwa hasintongan ampa habujuron do tongon horja ni Naibata (ay.1b). Mase? Halani sintong do ipadalan uhum bani pardosa, tapi parbujur (setia janah parholong) do homa Ia halani uhuman na aturan mangonai bani jolma in domma iambil-alih oleh Tuhan Jesus. Naibata patalarhon kesetiaan ampa holong-Ni melalui terobosan paluahkon ganup bangsa marhitei na iberehon Anak-Ni manggantihkon uhuman na sahira mangonai bani jolma. On ma hadiah atau hidangan na paling sempurna na ipasirsir Naibata hubani ganup bangsa. 

4. Naibata ibagas rancangan holong-Ni sirsir manopot jolma ase Ia na mampargogohi sidea sadokah manggoluh  i dunia on. Ia do homa pasirsirhon pesta malas ni uhur na sempurna aima goluh na sadokah ni dokahni. Nini: ‘boiskonon-Ni do hamateian ronsi sadokah ni dokahni, anjaha apusan ni Tuhan Jahowa do iluh humbani sagala bohi’ (ay.8). Malas ni uhur na sonin lang adong jumpah age humbani ise pe sobali humbani Naibata. Pitah Ia do na markuasa manaluhon hamateian janah manggantihkon ai gabe hagoluhan na gok ibagas hasangapon. Marhitei parpuhoon ni Tuhan Jesus humbani na matei tarbukti domma italuhon sagala kuasa na i dunia on janah domma ondos Bani sagala kuasa i nagori atas ampa i tanoh on (Mat. 28:18). Pangajaran na jumpah ijon aima: malas ni uhur na sintong lang roh humbani dunia on tapi humbani Naibata do. Jolma na sangap janah na bijaksana aima anggo lang tarolat ia manjalo Naibata halani na i dunia on. Jolma na sirsir manjalo janah porsaya hu-Bani mararti domma manjalo jaminan haluahon ampa hagoluhan. Habadoron do ulih ni halak na pitah mamparayak na i dunia on tapi terlupa ia hubani Naibata. Domu hujin, malas ni uhur tang sibanggalan lang be halani kenikmatan dunia tapi halani domma ihaporsayai pansarihonon ampa haluahon na dob ipasirsir Naibata do. On ma mambaen bangsa ni Naibata totap marmalas ni uhur janah setia pasangapkon Naibata. Pori pe idagei hamaholon bahkan hamateian sahali pe, tenger do uhurni tuk janah lobih do kuasa ni Naibata mambere gogoh ampa paluahkon sidea.

5. Isaksihon do homa bahwa bani ari ai hatahonon ni halak ma ‘Tonggor ma, on do Naibatanta, na niarapkonta laho mangurupi hita’ (ay.9). Maksudni, hata ampa ranggian ni Naibata lang teori kemungkinan tapi sada kepastian na maningon saud. Lang adong na boi mangolati ranggian-Ni ai laho paluahkon jolma in. Halani ai sangat dipastikan lang tarbador na martenger ni uhur janah na marpangarapan hu-Bani. Bani panorangni akan nyata janah terbukti bahwa Naibata do Panguhum bani sab tanoh on janah martuah ma jolma na setia janah porsaya bani hata-Ni.

6. Refleksi

a. Hita nuan manggoluh ope i dunia on tapi domma ibagas ranggian ni Naibata goluhta. Ranggian ni Naibata aima hadearon ampa haluahon. Halani ai hatengerhon hita ma Ia bani ganup na masa. On ma homa na pamalas uhurta pori pe idompakkon hita ope buei hamaholon bani goluh i dunia on. 

b. Lang sihabiaranta pori pe aha na masa bahkan hamateian sahali pe halani domma gok bani pansarihonon ni Naibata hita. Domma sirsir ibahen Naibata ‘pesta malas ni uhur’ banta na porsaya.

c. Haleluya No. 134 : 1 – 3