MANGKAHOLONGI TUHAN MARHITEI PAMBAHENAN (Sibasaon 02 Juni 2019 Johanes 14 : 15 – 26)

MANGKAHOLONGI TUHAN MARHITEI PAMBAHENAN

Sibasaon 02 Juni 2019

Johanes 14 : 15 – 26 

 

1. Ambilan on aima bahagian hata partadingan ni Tuhan Jesus bani susian. Isobut hata partadingan halani sihol ma Tuhan Jesus mandompakkon silang janah mulak hubani Bapa-Ni. Adong 2 hal na ipatangkas ijon aima:

a. Pori pe misir Tuhan Jesus tapi hadir do tongtong Ia rap pakon susian-Ni marhitei Tonduy Sipangapiti aima Tonduy Napansing.

b. Paingatkon susian ase hata atap pangajaran ni Tuhan Jesus na domma ijalo sidea sadokah on poltik ijolom janah ihagoluhkon.

Na dua hal on lang boi tarsirang halani Tonduy ai do mangajari ampa mangkasomani sidea ase margogoh manramotkon pakon mandalankon hata ai. Bani panorangni iondoskon Tuhan Jesus Tonduy ai hubani susian gabe ibotoh sidea ma na sada do Bapa pakon Anak (Tuhan Jesus) sehingga na marholong ni uhur bani Tuhan Jesus domma sada homa hubani Bapa na i nagori atas ai (ay.20). Artini, lang hape na soya habujuron ni sidea mangirikkon Tuhan Jesus. On ma na mendorong susian lambin pokkut mandalankon titah ni Kristus. Ibotoh sidea ma banggal do upahni na mambalosi hata ni Tuhan.

2. Isobut do Tonduy ai Tonduy Sipangapiti (pembela). Hunjon tergambar ma aha na sihol idompakkon susian aima penghakiman atau tuduhan jahat humbani dunia on. Mase? Halani goluh ni sidea lang be saguru bani rosuh ni dunia on tapi domma saguru bani Kristus. Akibatni sidea pasti ihagigihon dunia on. Artini, halani lang itanda dunia on Tonduy Sipangapiti ai (ay.17) gabe marbeda do guru ni dunia on pakon guru ni susian sehingga ipastihon adong pertentangan na mambahen susian ihagigihon bahkan iarsik dunia on. Domu hujin ipaingat Tuhan Jesus ase pori pe idompakkon susian parmunsuhon humbani dunia on maningon totap sidea manjolom ampa mandalankon titah-Ni. Sidea lang boi mabiar halani domma ipabotohkon Tonduy ai do gogoh ni sidea. Tonduy ai mambere daya tahan ampa daya juang. Ase lang boi maralasan gabe lang mangkorjahon titah ni Kristus halani keterbatasan atau halani borat ni sidompakkonon halani domma ipasirsir Tuhan Jesus Pangapiti ampa gogoh aima Tonduy. Ketahanan bertahan janah setia mangirikkon Tuhan Jesus bani situasi na lang bersahabat sangat bergantung hubani hasirsiron mambere diri iajari/ibobai Tonduy do. 

3. Bahkan isobut Tuhan Jesus ‘seng tadingkonon-Ku hanima tading maetek’ (ay.18). Tading maetek patugahkon situasi na lang berdaya janah lang adong orangtuani na mansarihon. Seng itadingkon tading maetek mararti ibere Tuhan Jesus jaminan panramotion ase ulang mabiar. Lobihan do gogoh na iondoskon Tuhan Jesus marimbang munsuh na idompakkon sidea. Halani ai bani ganup keadaan maningon sirsir mangkorjahon hata ni Tuhan Jesus.

4. Iparomban do hata mangkaholongi Tuhan Jesus pakon sikap mandalankon titah-Ni bahkan marulak-ulak do on isobut Tuhan Jesus (ay.15, 21, 22, 24). On sihol menegashon keharusan mandalankon titah-Ni anggo domma ra manobut dirini sebagai susian. Hal on porlu halani marhitei horja ni susian do homa Tuhan Jesus sihol patalarhon holong pakon kuasa-Ni bani dunia on, marhitei horja ai do susian manaksihon hata ni Tuhan Jesus bani dunia on. Ase mangirikkon Tuhan Jesus lang sukkup pitah hata tapi ningon ibuktihon melalui aksi atau sikap sirsir mandalankon hata-Ni. Bani proses mandalankon hata ni Tuhan ai membutuhkon komitmen halani horja ai boi mambahen susian loja, berkorban materi bahkan harga diri bahkan ianggap dunia on halak na oto ampa bagei resiko na legan. Ase kesetiaan iman terbukti sedo pitah sanggah marsahap tapi ketika mangkorjahon hata ni Tuhan do. Boi do terjadi buei jolma bahkan sipartohonan mangaku halak Kristen tapi sasintongni seng siparholong hubani Tuhan Jesus.

5. Refleksi

a. Gabe halak Kristen na sintong lang bergantung hubani goran, gelar, jabatan atap lembaga tapi na sirsir mambere uhurni ibobai Tonduy do. Uhur na ibobai Tonduy mambahen hita boi marmalas ni uhur mangkorjahon hata ni Tuhan.

b. Memang lang saguru hita pakon dunia on. Halani ai boi do terjadi ihagigihon dunia on hita bani na mangkorjahon hata ni Tuhan bahkan ituduh dunia on use hita sebagai pengkhianat. Tapi ise hita sedo itontuhon aha nini dunia on tapi aha nini Tuhan Jesus do.

c. Ase bani buei keinginan, sura-sura pakon rosuh totap ma pilih hita sura-sura na sadalan pakon hata ni Tuhan Jesus. Pori pe sipata borat do pilihan ai secara parangkulaon tapi anggo manggoluh do partonduyonta, pasti do gabe na utama banta mandalankon hata ni Tuhan.

d. Haleluya No. 248 : 1, 2, 6 

 

Read 336 times

Leave a comment

Make sure you enter all the required information, indicated by an asterisk (*). HTML code is not allowed.

Ambilan & Sibasaon

Go to top