PARAYAK MA ARTA NA I NAGORI ATAS AI ! (Sibasaon 08 Juli 2018 Mateus 6 : 19 – 24)

PARAYAK MA ARTA NA I NAGORI ATAS AI !

Sibasaon 08 Juli 2018

Mateus 6 : 19 – 24 

1. Ambilan on aima pangajaran ni Tuhan Jesus pasal arta. Adong dua masam arta aima arta na i tanoh on pakon arta na i nagori atas. Arta na i tanoh on bersifat sementara tapi arta na i nagori atas bersifat kekal. Arta na i tanoh on boi do targagat tasik ampa ngitngit  janah tarhurak panangko tapi arta na i nagori atas ai lang targagat tasik ampa ngitngit janah lang tarhurak panangko (ay.19-20). Maksudni: arta na i tanoh on sangat terbatas janah halani ai lang mampu menjamin goluh ampa haluahon ni jolma tapi arta na i nagori atas ai mampu menjamin haluahon ni jolma. Arta na i tanoh on aima habayakon secara materi tapi arta na i nagori atas ai aima na bayak bani hata ni Tuhan ampa horja na madear. 

2. Ambilan on sedo mangkatahon lang porlu arta na i tanoh on, tapi mangajarhon ase ulang halani gap mamparayak arta na i tanoh on gabe lupa bani arta siharganan na i nagori atas ai. Ulang pitah marpala-pala mamingkirhon habayakon na i tanoh on tapi lobih marpala-pala ma mamparayak horja na madear. Jolma na sihol bayak bani arta na i tanoh on aima na mangutamahon arta na i tanoh on tapi jolma na sihol bayak bani arta na i nagori atas ai aima jolma na goluhni lobih hubani goluh na maronjolan bani hata ni Tuhan. Halani ai isobut do use, ‘Ai ija artamu, ijai do uhurmu’ (ay.21). Uhur aima na mambobai sikap atau tindakan ni jolma. Anggo porlunan do uhur ni sasada halak bani arta na i tanoh on, sidea lang peduli bani horja na madear asal ma dapot arta na i tanoh on, tapi halak na uhurni bani arta na i nagori atas ai, maka goluhni pasti do mengutamahon horja na madear.

 3. Halani ai isobut use ‘Palita ni angkula do mata’ (ay.22). Maksudni anggo dear mata, lihar ma angkula. Anggo dear mata ni haporsayaon maka malasan do uhur mangkorjahon hata ni Tuhan marimbang pitah jumpahan arta na i tanoh on, tapi anggo pitah hubani arta na i tanoh on hansa panonggor ni (pitung mata ni haporsayaon) maka malas ni uhurni aima anggo jumpahan arta atau habayakon tanpa peduli hubani hata ni Tuhan. Hata na legan, orientasi hidup sangat bergantung hubani mata. Anggo pitung do mata ni haporsayaon lang porlu bani arta na i nagori atas ai janah gap do uhurni pitah bani na i tanoh on.

4. Halani ai isobut use ‘Seng tarbalosi sada halak dua tuan. Seng tarbalosi nasiam Naibata rap pakon mammon’ (ay.24). On sihol mangajarhon ase jolma in mambahen keputusan apakah ia mar-naibata-hon arta (mammon) atau Naibata. Halak na mar-naibata-hon arta aima sidea na pitah mangutamahon habayakon na i tanoh on (keinginan dunia), tapi na balosan bani Naibata aima na mampu menaluhon hawa nafsu atau keinginan dunia janah mambalosi hata ni Naibata, ai do arta siharganan bani. 

5. Refleksi

a. Realita, buei do jolma bayak janah marhasungkupan bani arta tapi ternyata miskin halani lang memiliki na paling utama na boi menjamin goluhni aima haporsayaon bani Tuhan. Buei do jolma na pentar marhali-halihon duit tapi ternyata bodoh halani hurang memperhitungkon ujung ni goluhni. Umumni halak na sonon selalu sibuk bani arta na i tanoh on tapi hurang mambere gogoh ampa goluhni mambalosi ampa mandalankon hata ni Tuhan.

b. Terbatas do hasadaon ni arta na i dunia on pakon simadasi. Sanggah manggoluh iparayak jolma do arta na i dunia on tapi dob marujung goluhni artani ai ma use manadingkonsi janah sirang ma sidea.

c. Duit pakon arta boi do mamboli obat pakon sipanganon tapi lang boi mamboli hosah apa lagi goluh sisadokah ni dokahni. Haporsayaon bani Jesus do hansa na boi menjamin goluh na manongtong. Halani ai halak na manimpan arta ni i nagori atas aima sidea na lobih mangutamahon mangkorjahon rosuh ni Tuhan Jesus marimbang rosuhni dunia on ampa hisap ni angkula.  Gabe prioritas ma banta mangirikkon ampa mambalosi Tuhan lobih humbani aha pe na dong i dunia on.

d. Pasimpanhon hita ma artanta i nagori atas marhitei na sirsir hita mambere gogoh, pingkiran pakon haganup na adong banta mangkorjahon rosuh atau hata ni Tuhan, sirsir ma mangurupi halak na masombuh, sirsir ma homa menopang pangidangion i kuria ni Tuhan.   

e. Na porsaya maningon do mampu mambedahon na harga pakon na paling harga. Haduasi on porlu do janah anggo boi dapot hita ma haduasi. Tapi bani na mamparayak in maningon do lobih mangutamahon na paling harga aima arta na i nagori atas humbani na harga (arta na i tanoh on).  

f. Haleluya No. 264 : 1 – 2

Read 1404 times

Last modified on Wednesday, 27/06/2018

Leave a comment

Make sure you enter all the required information, indicated by an asterisk (*). HTML code is not allowed.

Go to top