GABE SAKSI NI KRISTUS NA PORSAYA MA! (Ambilan Minggu : 01 Juli 2018 , Nats Markus 16 : 14 – 20)

GABE SAKSI NI KRISTUS NA PORSAYA MA!

Ambilan Minggu : 01 Juli 2018  

Nats : Markus 16 : 14 – 20

 

1. Dob puho Tuhan Jesus humbani na matei talar ma hamonangan-Ni manaluhon kuasa ni hamateian ampa dosa. Lang be hamateian ulih ni jolma pardosa halani domma italuhon Tuhan Jesus sorot ni dosa aima hamateian. Na manjalo janah porsaya Bani domma dihut ipamonang. Hamonangan-Ni aima gabe barita haluahon atau Ambilan Na Madear na maningon isaksihon susian-Ni hu sab tanoh on halani haganup jolma do gabe alamat ni haluahon ai. 

2. Domu hubani tugas in, paima naik Tuhan Jesus hu Nagori Atas, ipersiapkon do susian-Ni pasal aha na sihol ihorjahon sidea. Bahkan ipinsang Tuhan Jesus do susian halani bani mungkahni hurang porsaya ope sidea bani parpuhoon ampa hamonangan-Ni ai (ay.14). Mase ipinsang susian? Halani susian hadir lang pitah patugahkon aha na dob iidah janah ibotoh pasal Tuhan Jesus tapi sekaligus do manaksihon haporsayaon ni sidea bani horja parambilanon ai. Haporsayaon merupakan hal na mutlak imiliki susian halani marhitei haporsayaon do sidea margogoh bani horja ai. Marhitei haporsayaon do homa hadir kuasa ni Tuhan Jesus bani horja hasaksian ai. Haporsayaon ai patubuhkon hasabaron, hapongkuton atau kesungguhan na lang ra mundur bani horja marsaksi pori pe buei hambatan humbani dunia on. Ase paima iutus Tuhan Jesus susian, parlobei do ipatorsa haporsayaon ni sidea. Hatahonon ma, melekat do bani diri ni susian haporsayaon ai ; Atau anggo domma isobut susian, halak na porsaya ma ai. Anggo lape sonai sasintongni susian sipakulah-kulah ope ai. Susian na lape porsaya taridah do humbani goluh ampa horjani na gati gabe partolsuan bani na legan.

3. Dob torsa haporsayaon ni susian, selanjutni iondoskon Tuhan Jesus do bani sidea horja mangambilankon Ambilan Na Madear bani sagala na tinompa (ay.15). Isi ni Ambilan Na Madear aima barita malas ni uhur pasal haluahon na dob ihorjahon Tuhan Jesus. Ambilan Na Madear ai do sisaksihonon sedo pingkiran ni sidea. Ambilan Na Madear ningon murni iambilankon na lang boi ikaburhon dengan alasan apa pun. Ipatugah do homa kemungkinan adong na porsaya bani Ambilan Na Madear ai, tapi boi do homa adong na lang porsaya. Sihol mangkatahon bahwa jolma in bebas do mambere sikap tapi ipatugah konsekwensini bahwa ‘na porsaya anjaha tardidi dapotan haluahon, tapi na so porsaya hona uhum do!’ (ay.16). Ijon susian sekaligus ipersiapkon secara iman dan mental ase ulang surut bani horja ai pori pe adong na manulak Ambilan Na Madear na ipadas sidea.

4. Ipatugah Tuhan Jesus do homa bahwa ipasirsir Tuhan Jesus do kuasa-Ni bani susian bani horja parambilanon aima: mangusir sibolis, marsahap na baru, jomputon ni sidea do ulog, anjaha age pe iinum sidea rasun hamateian seng pala mahua sidea, tappeihonon ni sidea do tanganni bani na boritan gabe malum ma sidea’ (ay.17-18). Kuasa ni Tuhan Jesus selalu dialami dan dirasakan ketika ihaporsayai ampa isaksihon. Hadir do kuasa ni Tuhan bani horja parambilanon. Pori pe adong hambatan humbani sibolis ampa siparakal-akal na i dunia on, susian ningon totap marsaksi. Haporsayaon merupakan sinjata ampuh laho mangusir ampa manaluhon sagala kuasa-kuasa ni sibolis ampa hagolapan ni dunia on. Tujuanni ase ulang mabiar manaksihon Ambilan Na Madear pori pe buei ancaman na roh hun dunia on. Ambahni ai ipatugah do homa bahwa melalui tangan ni susian ampa na porsaya hadir do kuasa ni Tuhan Jesus mambere hamalumon. Hamalumon na imaksud ijon lang sekedar fisik tapi dihut do partonduyon. Sonin ma susian ipersiapkon age marhitei tanda-tanda na sihol terjadi sebagai bukti markuasa do Tuhan Jesus manaluhon sibolis ampa mambere hamalumon ronsi malas ni uhur bani na porsaya. Marsahap na baru dihut do gabe salah sada hataridahan bani halak na porsaya. Marsahap na baru maksudni memiliki karunia berkata-kata na marisi pangajaran, hasaksian untuk patoguhkon uhur ni na porsaya.

5. Dob haganup ipatugah Tuhan Jesus pasal horja na sihol idalankon susian, iidah atau isaksihon sidea ma Tuhan Jesus naik hu nagori atas. Marhitei peristiwa ai domma adong tolu fase pengalaman ni susian pasal Tuhan Jesus aima: sanggah rup sidea pakon Tuhan Jesus das hubani parmatei-Ni, peristiwa dob puho Tuhan Jesus humbani na matei pakon peristiwa parnaik ni Tuhan Jesus. Haganupan ai langsung ialami sidea na bertujuan ase ulang ragu be manaksihon Tuhan Jesus. Tuhan Jesus na mangajari sidea hinan, Ia do homa na iparsilangkon bani silang, Ia do homa na puho humbani na matei, Ia do homa na dob naik hu surga. Tujuanni ase bersiap sidea memasuki fase na paopathon aima manaksihon Tuhan Jesus bani sab tanoh on. Halani jolma na sarupa (susian si sapuluh sada halak) ai do gabe saksi hidup pasal Tuhan Jesus mamungkah humbani horja-Ni i dunia on das hubani parnaik-Ni, tontu talup ma homa jolma na manangar ambilan ni sidea porsaya bani hasaksian ai. 

6. Refleksi

a. Hita idilo lang pitah gabe halak Kristen secara parugamaon tapi gabe jolma na porsaya do homa. Porlu totap ievaluasi hita dirinta bei apakah hita domma gabe halak Kristen na porsaya. Ambilan Na Madear lang laho menghias nama tapi laho pabayuhon paruhuran ampa pajengeshon pangabakta do.

b. Bukti ni haporsayaon aima goluh na sirsir marsaksi, manaksihon Ambilan Na Madear. Tuhan Jesus do sisaksihononta sedo dirinta. Halani ai ciri ni na porsaya lang pabanggal-banggal dirinta tapi anggo lambin marbanggal janah lambin taarbarita goran ni Tuhan Jesus marhitei hata pakon goluhta do.

c. Halani hadir do kuasa ni Tuhan Jesus bani halak na porsaya bani horja marsaksi, ulang ma mabiar hita marsaksi pori pe buei akal-akal ni sibolis laho mangolati horja ai. Janah anggo sihol hita mengalami kuasa ni Tuhan Jesus bani goluhta, carani aima: porsaya janah marsaksi ma.

d. Haleluya No. 138 : 1 – 3

Read 421 times

Leave a comment

Make sure you enter all the required information, indicated by an asterisk (*). HTML code is not allowed.

Go to top