2. Laho patoguhkon uhur ni Josua, Naibata sandiri mangkatahon ‘Pir ma tonduymu anjaha totap ma uhurmu’. Pala do tolu hali isobut hata on (ay.6,7,9). Tangkas do ibotoh Naibata hagobiron ni Josua mandalankon horja na borat ai. Tongon anggo humbani kemampuanni tumang lang margogoh ia mandalankon horja ai. Tapi Naibata mambere jaminan marhitei na patoguhkon uhur ni Josua bahwa keberhasilan ni sedo iukur humbani kemampuanni tapi oleh kuasa ni Naibata do. Halani ai na porlu ipersiapkon Josua humbani dirini, sedo mangetong sadiha gogohni tapi sonaha ia sirsir martenger ni uhur bani Naibata do. Anggo ibere Naibata tugas, Naibata do homa pasirsirhon gogoh. Irimpunhon do ai bani ay.9 ‘Ai Jahowa Naibatamu do hasomanmu, barang huja pe ho lao’. Tenger ni uhur bani Naibata do modal utama na boi patubuhkon semangat na baru ampa padaohkon sagala biar.
3. Ibohali Naibata do homa Josua marhitei na ibere ruhut-ruhut bani na mandalankon horja ai. Isuruh do ia manramotkon anjaha mangkorjahon ganup titah na dob tinonahkon ni si Musa. Lang boi ia manlembang hunjai, lang boi mosor buku ni titah ai humbani janah maningon ipingkir-pingkiri do ai arian pakon borngin (ay.7-8). Josua maningon tampil sebagai pemimpin na sirsir ipimpin Naibata. Ia lang boi pasaudkon rosuhni tumang bani horja ai tapi ningon sirsir ia mambere dirini pakon goluhni pasaudkon rosuh ni Naibata marhitei na setia mardalan ia bani titah-Ni. Bani hata ni Naibata (titah-Ni) do jumpah solusi ketika terjadi keadaan/jalan buntu, ijai do homa gabe boi tarsaloseihon horja na borat. Kuasa ni Naibata hadir janah menjadi nyata bani jolma na sirsir porsaya janah mardalan bani hata/titah-Ni. Hata ni Naibata lang pitah ibotoh tapi maningon ihagoluhkon bahkan sirsir totap mamingkir-mingkiri titah ai arian pakon borngin. Tujuanni ase ulang soppat kering uhur ni Josua bani titah atau hata ni Naibata. Hauhuron ni Josua maningon selalu isegarhon oleh hata ni Naibata. Titah atau hata ai maningon gabe satu-satunya sumber pemandu bani Josua bani ganup langkah ampa horjani. Sebagai pemimpin, ia maningon totap marhabiaran janah sipambalosi bani Naibata. Ijanjihon Naibata do keberhasilan na pasti bani Josua asal ma totap ia marsijoloman bani hata ni Naibata. Ase na ipangindo sipersiapkonon ni Josua bani horja mambobahon bangsa ai aima tekad atau komitmen untuk totap setia manramotkon titah ni Naibata do. On ma kunci keberhasilan bani horja na borat ai.
4. Refleksi
a. Sitonggohononta do ase ganup sipambobai (bani keluarga, kuria, masyarakat pakon Negara) ase totap marhabiaran janah mardalan bani hata ni Naibata. Anggo sipambobai aima halak na marhabiaran bani Naibata, damei janah malas ni uhur do homa rupei ni na ibobai. Sebalikni, anggo lang marhabiaran sipambobai bani Naibata, hageoron do homa jumpah age bani na ibobai.
b. Tontu haganup do homa hita sipambobai domu bani statusta bei. Haganup do hita ipindo ase marsijoloman janah mardalan bani hata ni Naibata ase kehadiranta boi mamboan hadearon age bani na legan. Sipambobai na sirsir ibobai Naibata ma hita.
c. Bani bagei ni tugas ampa tanggungjawabta bani keluarga, kuria age horjanta ari-ari, ambilan on mambere panotap banta bahwa sirsir do Naibata mangkasomani ampa mangurupi hita asal ma totap hita porsaya janah mardalan domu bani hata ni Naibata. Hasirsiron mambohali diri janah mardalan bani hata ni Naibata do gabe modal utama banta ase margogoh janah monang hita bani ganup horja ampa tanggungjawabta bei.
d. Ase anggo adong jolma tarlobih bani hamajuan ni zaman on beranggapan bahwa halak na oto do jolma na setia mardalan bani hata ni Naibata, ambilan on patoguhkon uhurta bahwa hata ni Naibata do sumber ni hamonangan janah lang ongga ketinggalan zaman hata ni Naibata laho patorsa goluhta.
e. Haleluya No. 18 : 1 – 2