Ibadah

UMUM:
1. Jam 7.30 (Bahasa Indonesia)
2. Jam 10.00 (Bahasa Simalungun)
3. Jam 18.00 (Bahasa Indonesia/Eng)

SEKOLAH MINGGU:
1. Remaja : 8.00-10.00
2. Kelas Kecil & Tanggung : 10.00 - 12.00

Jl. Terompet No 64 Pasar I, Padang Bulan, Medan.

SAKSIHON MA HATA NI TUHAN BANI NA LAHOU MAGOU IN !

Sibasaon 10 September 2017, Mateus 18 : 15 – 20

Baca Teks : Mateus 18 : 15 – 20

1. Ambilan on marisi pangajaran sonaha do kuria bersikap dompak halak na madabuh hubagas dosa.

a. ‘Parayak ma ia padua-dua’ (ay.15). Lang sipabadoron ia marhitei na patugah-tugahkon dosani hubani halak na legan tapi sipaingaton do ia ibagas holong marhitei hata ni Tuhan. Padua-dua mararti empat mata, tujuanni ase ulang maila ia tapi ase isadari dosani janah ra paubah uhur.  

b. ‘Anggo seng itangihon ho, arahkon ma hasomanmu sada barang dua halak ase sinaksihon ni dua atap tolu halak ma parsahapan ai’ (ay.16). Ijon ipatugah kekuatan ni kebersamaan ni na sauhur ibagas holong laho paingatkon dosa ni hasoman. Tujuan tetap do sarupa ase pardosa ai menyadari dosani ampa paubah uhurni marhitei hata ni Tuhan na ipadas hubani.

c. ‘Anggo seng itangihon, patugah ma ai bani kuria’ (ay.17). Ijon kuria ipahami sebagai hasadaon ni halak na porsaya laho paingatkon parjahat ai.

d. ‘Anjaha anggo seng homa itangihon kuria ai, hiraon ma ia parbegu barang sijalo sohei’ (ay.17). Tingkatan terakhir aima kuria. Mase? Halani anggo kuria (humpulan ni halak na porsaya) na gabe haondosan ni Ambilan Na Madear ai pe lang itangihon, lang mungkin be adong jolma i luar ni kuria na boi paingatkonsi bani hata ni Naibata. Artini, pitah marhitei hata ni Naibata do hansa imungkinhon parjahat boi paubahkon uhurni; Halani Hata ai pitah adong bani kuria, maka anggo kuria pe lang itangihon, tontu lang mungkin be ia marubah, halani ai hiraon ma ia gabe parbegu.

e. Sekaligus patugahkon bahwa kuria aima humpulan atau parsaoran ni halak na mapansing do. Lang talup halak na butak atau parjahat riap marsaor ijai.

 2. Bani kuria in iondoskon Naibata do horja laho paingatkon halak pardosa marhitei Ambilan Na Madear. Halani ai isobut: ‘Sagala na sinangkutnima i atas tanoh on, tarsangkut do homa ai i nagori atas, anjaha sagala na pinaluah nima i tanoh on, maluah do ai homa i nagori atas’ (ay.18). Sihol menegaskon sonaha Tuhan mamakei kuria-Ni bani tugas na banggal aima manaksihon haluahon aima Ambilan Na Madear. Halani ai isobut do sidea sijolom anak kunsi nagori atas. Maksudni: Pitah marhitei Ambilan Na Madear do hansa boi terbuka labah ni nagori atas bani dunia on. Halani ai tugas ampa tanggungjawab ni kuria do mambaritahon haluahon ai hubani ganup jolma. Jolma na ra paubah uhurni marhitei na manjalo Ambilan Na Madear, buka ma bani labah nagori atas.

3. Bani tugas padaskon Ambilan Na Madear ai, ipatugah do na ihasomani Tuhan in do tongtong kuria-Ni. Bahkan nini ‘Anggo adong dua hun bannima i tanoh on, na mardos ni uhur manonggohon atap aha pe, sai na bereon ni Bapang-Ku na i nagori atas ai do ai bani sidea. Ai atap ija pe martumpu dua atap tolu halak marhitei goran-Ku, i tongah-tongah ni sidea do Ahu’ (ay.19-20). Maksudni, kuasa ni Tuhan selalu hadir mambere gogoh janah manramotkon kuria in bani tugas ai. Ijin kuria manaksihon Ambilan Na Madear, ijai do homa Tuhan hadir. Ijin kuria in marsada ni uhur ibagas tonggo  ampa haporsayaon mangindo gogoh, ijai do homa Tuhan sirsir mambere gogoh ampa mambalosi tonggo ni sidea. Sonin ma kuria in ipakei Tuhan laho patalarhon holong-Ni bani dunia on, padaskon Ambilan haluahon ai bani dunia on. Sekaligus paingatkon bahwa parsaoran ni jolma na sada ibagas kuria ningon ma sauhur ibagas Tuhan ase boi das tonggo ni sidea hubani Naibata.

4. Refleksi

a. Panorang ni goluhta i dunia on aima panorang paubah uhur marhitei Ambilan Na Madear. Ulang ma pitah pahara-pahara parduniaon on hansa ipadear-dear hita tapi terlupa padearhon hauhuron ampa parlahou.

b. Sanggah i dunia on rap manggoluh ope parjahat pakon na porsaya, tapi anggo i nagori atas pitah na porsaya do na boi masuk. Halani ai jalo janah haporsayai hita ma hata ni Tuhan sanggah adong ope panorang halani pitah na porsaya na ra paubah uhur do na talup masuk hujai.

c. Iutus do hita manaksihon Ambilan Na Madear bani dunia on ase andohar tarjalo dunia on janah ra sidea paubah uhurni. Paingat hita ma sidea marhitei ambilan na madear. Anggo adong dosa atau hahurangan ni na legan, ulang ipadaoh hita use dirinta humbani sidea, tapi gabe sada kesempatan ma ai banta padaskon hata ni Tuhan. Lang homa pala sisahap-sahapkonon ai bani na legan, ai lang untuk na sonai hita isuruh Tuhan, tapi laho paingatkon sidea ase marhamubahon do.

d. Kuria aima parsaoran ni halak na mapansing. Pataridahkon hita ma totap jati diri ni kuria marhitei na lambin marbanggal holong ampa pangabak na madear bani parsaoranta.

e. Haleluya No.  373 : 1 – 2 

HOLONG DO UHURHU BAMU !

Sibasaon 17 September 2017    (Bahan Ambilan tukar mimbar partonggoan se Resort Polonia)

1 Musa 50 : 15 – 21 

Baca Teks : Kejadian 50 : 15 - 21

1. Adong do 12 anak ni si Jakob (Ruben, Simeon, Levi, Juda, Dan, Naftali, Gad, Asser, Isasar, Zebulon, Josep, Benjamin) janah sada boruni aima si Dina. Si Josep tubuh sanggah panorang hatuaon ni si Jakob. Ongga do sogam uhur ni abang-abangni si Josep hubani sehingga ijual sidea do ia hubani sada kafilah ni halak Ismael janah selanjutni ijual use hubani si Potipar, pegawai istana ni Parao (1 Musa 37:28,36). Tapi tanpa ibagas botoh ni abangni ai, ternyata ihasomani Naibata do si Josep bahkan boi gabe raja paidua ia i tanoh Masir. Sanggah goluh ni si Jakob, sebenarni domma ipataridahkon si Josep holongni hubani bapani sonai age hubani saninani ai marhitei na mansarihon goluh ni sidea i tanoh Masir sanggah masa lohei i tanoh ni sidea. Tapi dob matei si Jakob, mabiar ma sanina ni ai, ninuhur ni sidea,  jangan-jangan dob matei si Jakob, ibalaskon si Josep ma use hajahaton ni sidea ai hinan (ay.15).

2. Halani ai ipadas sidea do tonah hubani si Josep: Nini bapanta sanggah lape matei ia: sonon ma hatahon hanima hubani si Josep, ‘Marpangulaki ma uhurmu mardingat hajahaton ni saninamu pakon dousa ni sidea, ai na sambor do na binahen ni sidea bam. On pe, sasap ma hajahaton ni jabolon ni Naibata ni bapanta ai!’ (ay.17). Lang pitah ai isobut sidea do homa ‘Tonggor ma jabolonmu ma hanami’ (ay.18).

3. Tangis do si Josep dob ipadas sidea tonah ai janah nini: ‘Ulang ma nasiam mabiar, ai lang tunduk bani Naibata do age ahu? Na sambor do tongon tahi ni uhur nasiam hu bangku, tapi na madear do hadobanni ibahen Naibata, laho pasaudkon songon na nididah nasiam sadari on, aima pagoluhkon sada bangsa na bolon. On pe ulang ma mabiar nasiam. Ahu pe na marmudu-muduhon nasiam pakon anak nasiam” (ay.19-21). Humbani balos on taridah do sonaha pribadi na imiliki si Josep aima :

a. Ia aima sahalak na marhabiaran hubani Naibata. Isadari do bahwa hasangapon na ijalohonni i tanoh Masir sedo halani gogohni tapi halani idop ni uhur ni Naibata do. Halani Naibata do na mangidopi, ia pe maningon do maniru Naibata marhitei na sirsir homa maridop ni uhur hubani sanina ni ai.

b. Isadari do bahwa hadearon ni goluhni lang bergantung hubani sikap ni sanina ni na jahat ai tapi bergantung hubani Naibata do. Naibata markuasa do mangondoskon hadearon pori pe isurahon sanina ni ai hinan na jahat hubani. Halani ai sikapni pe hubani sanina ni ai lang idasarhon hubani hajahaton ni sidea tapi bergantung hubani hata pakon harosuh ni Naibata do.

c. Lobih hunjai, ihaporsayai si Josep do homa bahwa haganup na masa ai ternyata ipakei Naibata do gabe dalan-Ni laho pasaudkon bagah-bagah na ongga ipadas hubani ompung ni sidea si Abraham bahwa sidea gabe sada bangsa na bolon. Anggo Naibata markuasa merancang habanggalon walau pun marhitei proses na lang mengenakkon na ongga ialamini, halani ai Josep lang ra manolsoli mase terjadi proses ai. Halani ai otik pe lang adong uhurni laho mambalaskon hajahaton ni sanina ni ai.

d. Josep mambahen keputusan sedo mardasarhon pingkiranni sandiri tapi mardasarhon kuasa ampa holong ni Naibata do sehingga ia mampu memaafkan bahkan sirsir mansarihon goluh ni saninani ai.

4. Refleksi

a. Ibahen abangni ai do na jahat hubani si Josep. Tapi kemudian, si Josep do use na mangkaholongi sidea. Pangkei ma hita, jangan-jangan anggo magigi anjaha ibahen hita na jahat hubani hasomanta, justru bani sada panorang sidea do use na sirsir mangurupi hita, atau sidea do use parsuhutanta. Halani ai jaga hita ma dirinta ase ulang tubuh uhurta mambahen na jahat age hubani ise pe.

b. Hadearon ni goluhta ampa keluarganta pe ternyata lang bergantung hubani sonaha sikap ni halak na legan hubanta, tapi bergantung hubani Naibata do. Halani ai, pori pe sipata ialami hita sikap na lang dear humbani halak na legan ulang ma halani ai gabe maseda uhur ampa haporsayaonta. Lang homa porlu hita mambalaskon hajahaton ni hasoman halani Naibata pe lang ra mambalaskon hajahatonta. Pori pe sipata isurahon halak na jahat banta, ulang mabiar hita halani Naibata totap do mansurahon na madear banta age marhitei situasi atau proses naa borat na ialami hita ai asal ma totap hita dohor janah sipambalosi hubani Naibata.

c. Saling memaafkan, ai do na iharosuhkon Naibata. Prinsip na sonon do na imiliki si Josep sehingga Naibata mamasu-masu sidea gabe sada bangsa na banggal atau bolon. Ternyata, anggo sihol hita jumpahan pasu-pasu, salah sada carani aima sirsir ma marsimaaf-maafan ampa marsipadear-dearan. Anggo lalap hita marsipahata-hataan, mardomdom, tarolat do homa pasu-pasu ni Naibata hubanta.

d. Naibata do sumber ni sagala hadearon na adong banta. Halani ai pakei hita ma haganupan ai sebagai sarana untuk saling marsiurupan ampa marsihaholongan.

e. Haleluya 250 : 1,2,4 

Ambilan 03 September 2017, Rom 12 : 9 – 21 

HOLONG DO TUTUR SIDOHORAN

Baca Teks : Rom 12 : 9 – 21

1. Sada ciri hidup na maningon imiliki halak na porsaya aima marholong atau mangkaholongi. Dasar marholong aima halani domma parlobei hita manjalo holong na humbani Tuhan. Jadi marholong aima bukti kesetiaanta hubani Tuhan, sedo halani dunia on atau idasari sikap ni halak na legan hubanta. Holong ni Tuhan ai do na merobahkan pola hidupta gabe jolma siparholong. Domu hujin ambilan on menegashon sonaha do mandalankon holong aima: 

a. Holong ai lang boi marsipakulah-kulah tapi ‘marsilobei-lobeian ma marsipasangapan’ (ay.9-10). Marsipakulah-kulah mararti berpura-pura, lang humbani bulus atap borsih ni uhur, memiliki muatan atau tujuan tertentu, ada udang di balik batu. Lang sonai holong ni na porsaya tapi marsilobei-lobeian do marsipasangapan. Maksudni: mangkorjahon na madear tanpa menuntut balas. Malas ni uhur sedo anggo pitah maruntung hita marhitei horjanta tapi anggo dihut halak na legan marmalas ni uhur halani horjanta do homa.

b. Sirsir marholong halani ketaatan hubani Tuhan, atau halani tubuh relasi na intim pakon Tuhan marhitei pangarapan ampa tonggo (ay.11-12). Semakin terbangun relasi na intim pakon Tuhan, lambin taronjar do uhur mangkorjahon na madear. Tubuh pangarusionni bahwa Tuhan do na mambere gogoh ampa kesempatan bani laho mangkorjahon na madear. Martarimakasih do ia anggo ibere Tuhan ope kesempatan mangkaholongi na legan. Halani ai pori pe sanggah adong pergumulanni tubuh do tong keyakinan ampa pangarapanni bani pansarihonon ni Tuhan ; lang sundat mandalankon na madear bani ganup keadaan. Lang boi maralasan atap halani aha pe gabe lang mandalankon na madear anggo domma isobut halak na porsaya.

c. Mangkorjahon holong dihut do ai sebagai cara mambangun hasadaon ibagas kuria. ‘Sarihon nasiam ma na porlu bani halak na mapansing, porluhon partamueion’ (ay.13), mararti do ai bahwa hasadaon ni halak na porsaya lang cukup marhitei ibadah tapi ningon nyata age ibagas aksi marsiurupan. Perbedaan potensi bahkan ide / pendapat  ningon igunahon ai untuk merekat hasadaon ulang gabe parsalisihan. Carani aima: manggunahon haganupan ai ibagas holong. 

d. Holong aima sada aksi laho marsaksi, menyadarhon halak parjahat ase itanda sidea Tuhan in marhitei goluh ni na porsaya (ay.14, 17-21). Marhitei parlahou do na porsaya manaksihon Tuhan hubani dunia on. Halani ai mangkorjahon na madear ibagas holong merupakan tugas na lang boi iparlanseihon. Alamat ni holong pe ningon menjangkau haganup jolma tanpa membeda-bedahon hasoman atau musuh. Sekaligus paingatkon kuria bahwa lang ongga ibere Tuhan hak bani sidea laho mambalas tapi mangkaholongi do. Tuhan do na berhak mambalas. Halani ai ulang iparontihon mangkorjahon na madear pori pe lang mintor irespon halak secara baik horjanta na madear ai. Bani ay. 20 isobut ‘doskon na pajongjong narnar do ai bani uluni’, maksudni: cara mangajar parjahat sedo marhitei na mambalas hajahatonni ai tapi marhitei horjanta na madear do.

e. Hataridahan ni holong aima anggo sirsir marmalas ni uhur rap pakon na marmalas ni uhur, tangis pakon na tangis janah sirsir martoruh ni uhur (ay.15-16). Munsuh ni haporsayaon do sifat egois na pitah mamingkiri dirini sandiri. Ulang ma anggo adong halobihanta gabe tubuh gijang ni uhur tapi sifat na peduli ma. Anggo lambin tambah pasu-pasu, ulang penampilanta (style) hansa na marubah tapi horja holong do homa. Sikap peduli janah na lang ra mengorbankan halak na legan demi kepentingan pribadi tapi sirsir sapangahapan pakon hasoman tarlobih na ibagas sitaronon merupakan warna hidup ni na porsaya.    

2. Refleksi

a. Mangkorjahon na jahat hubani na legan aima biak ni sibolis, mangkorjahon na madear pitah hubani hasomanni tumang aima biak ni dunia, tapi mangkorjahon na madear hubani haganup termasuk munsuhni aima biak ni Kuria.

b. Marmalas ni uhur ketika halak na legan tangis, janah tangis ketika halak na legan marmalas ni uhur aima aima sada bukti ni jolma na lape sintong porsaya halani uhur subil ampa cemburu ope na manrajai goluhni. 

c. Anggo ipatambah Tuhan banta panorang ni goluh, gogoh ampa pasu-pasu sedo na kebetulan ai tapi halani isurahon Tuhan do mamakei hita gabe tangan-Ni laho mangurupi atau mangkaholongi halak na legan na mamorluhon pangurupionta. Ulang ma gijang uhurta halani ai.

d. Marhitei goluhta do ibotoh janah itanda dunia on ise do Tuhan na ihaporsayai hita. Anggo hita peduli janah parholong, gabe ibotoh dunia on ma Parholong do Tuhanta ai. Ulang ma ipahiri hita goran ni Tuhan marhitei goluh ampa parlahounta na lang suman.

e. Hasadaon i tongah-tongah ni kuria ulang ma pitah sanggah riap hundul i gereja tapi nyata ma homa anggo riap hundul hita bani sitaronon ampa na masa bani hasomanta.

f. Haleluya 250 : 1, 4, 5  

Sibasaon 03 September 2017, Psalmen 26 : 1 – 8

NAIBATA DO PANGUHUM NA SINTONG

Baca Teks : Psalm 26 : 1 - 8

1. Ambilan on patugahkon sikap ni parpsalmen (Daud) bani na mandalani goluhni. Ia memiliki jati diri na jelas sebagai na marhabiaran hubani Naibata. Jati dirini lang abu-abu. On boi terjadi halani na mengendalihon goluhni lang be pingkiranni sandiri atau rosuh ni dunia on tapi domma Naibata. Tapi bani keadaan na sonin ternyata irisai halak parjahat do ia janah ituduh homa ia sebagai halak na lang sintong. 

2. Halani ai roh do ia hu rumah ni Jahowa mamboan parkarani. Isadari parpsalmen bahwa talar do haganup goluhni i lobei ni Naibata, iidah Naibata do das hubagas tang parbagas ni uhurni. Halani ai, nini: ‘uji Ham ma ahu, ale Jahowa, anjaha suba ma, pareksa Ham ma piah-piahku pakon pusu-pusungku’ (ay.2). Bahkan bani ay.3 isobut ‘tongtong do ilobeihu idop ni uhur-Mu, anjaha romban hubani hasintongan-Mu do au marparlahou’. Idop ni uhur na imaksud ijon aima hata ni Naibata. Artini, aha na isaksihon parpsalmen bahwa sintong do ia marparlahou domu hubani hata ni Naibata lang sekedar pembelaan diri halani isadari do lang adong na ponop parlahouni i lobei ni Naibata. Na menggerakkon uhurni laho bertindak aima hata ni Naibata. Balosan do ia bani Naibata dari pada rosuhni sandiri janah sirsir do ia mamparnalang dirini ase Naibata na berotoritas janah na manontuhon haganup langkahni. Sadar do homa parpsalmen bahwa pansing janah sangap do Naibata halani ai prinsip bani parpsalmen: maningon do marsangap Naibata marhitei goluh age parlahouni.   

3. Bahkan bani ay.4-5, ipatugah do homa bahwa age pe marianan ia itongah-tongah ni halak parjahat na lang marhabiaran bani Naibata, ia lang ra terkontaminasi bani horja hajahaton. Bahkan ipatugah do sikapni na mangkagigihon humpulan ni halak parjahat. Ia seng molei-olei (urah goyah) tapi toguh do manontuhon sikap untuk selalu mambalosi Naibata. Jati dirini lang bergantung bani situasi ampa kondisi lingkungan tapi selalu konsisten bani pandu hatani Naibata. Pori pe ihasogamhon parjahat ia halani lang ra ia sahundulan pakon sidea, lang mangosei ia humbani hata ni Naibata. Ia lang ra mangirikkon tahi atau dalan ni parjahat pori pe aha na masa. Lang homa ia marsipakulah-kulah, idahon songon na bujur hape legan ibagas uhur.

Ambilan 27 Agustus 2017

“TANGIHON HANIMA MA AHU !”

Baca Teks : Jesaya 51 : 1 – 8

1. Sanggah marsitaronon halak Israel i Babel, ipatoguh do uhur ni sidea bani holong ni Naibata. Ipatalar Naibata do diri-Ni sebagai Siparkuasa janah Parholong marhitei na isuruh sidea mangkawah atau mardingat hubani Naibata na mandilo ompung ni sidea si Abraham pakon Sarah. Pitah ia do idilo Naibata bani mungkahni tapi halani pasu-pasu-Ni gabe bangsa na banggal do use (ay.2). Artini, ketika panorang ai lang adong be pangarapan masa depan bani bangsa ai halani hadoyukon, ibere kepastian bahwa anggo Naibata na marhorja mardohar do use sidea. Jerusalem na dob maseda janah domma ipausih hubani halimisan akan dipulihkan kembali songon pohon Eden janah tarbogei do use ijai sora malas ni uhur ampa puji-pujian (ay.4).

2. Halani ai sikap na ipangindo bani bangsa ai aima sirsir mangkawah bani Naibata sibere titah (ay.4). Mangkawah mararti mandompakkon goluh hubani Naibata janah sirsir manangihon sora atau hata ni Naibata. Anggo itangihon janah porsaya bani hata ai, maka iarusi sidea ma bahwa perkara haluahon sedo hal na mahol bani Naibata. Artini, sidea sihol iubah lang pitah secara keadaan jasmani tapi dihut secara rohani, ase marhatengeran use bani hata ni Naibata. Ulang halani sitaronon gabe tutup pinggol ampa uhur manangihon sora ni Naibata. Marhitei na manangihon sora ni Naibata do ibotoh sidea na domma dohor janah bingkat haluahon ai manopot sidea. Lang adong homa na boi mangolati haluahon ai halani marianan i toruh kuasa ni Naibata do haganup bangsa-bangsa (ay.5). Gogohan do Naibata marimbang musuh na mangodoh-odoh sidea. Ibotoh Naibata do homa keterbatasan ni sidea na lang mampu paluahkon dirini sehingga Naibata do na roh bertindak paluahkon. Bahkan ipertegas bahwa langit, tanoh pakon isini lambin buruk janah bois do tapi haluahon na humbani Naibata totap do ai (ay.6). Maksudni, ulang ma biaran sidea bani na i tanoh on termasuk bangsa na mangodoh-odoh sidea dari pada hubani Naibata (ay.7). Mase? Halani na lang do haganupan siparkuasa ampa na sangap-sangap na i tanoh on halani na laho salpu do haganupan ai songon hiou panganon ni ngitngit, songon hiou wol gagaton ni gilok-gilok (ay.8). Hatahonon, lang totap hadoharon ni bangsa-bangsa tapi kuasa ni Naibata marsundut-sundut do. 

3. Ipadas do tolu hali dilo-dilo ni Naibata ‘Tangihon hanima ma Ahu’ (ay.1,4,7). Manangihon mararti sirsir mangisi hauhuron bani hata ni Naibata atau sikap berdiam diri ase iarbahi hata ni Naibata uhur ni sidea na dob kering atau galek ai. Marhitei na sonin ma terbangun use semangat na baru janah tubuh pangarusion na baru bahwa selalu ada solusi haluahon humbani Naibata. Marhitei na manangihon hata ai iarusi sidea ma bahwa kehadiran ni Naibata sedo laho mangagou songon bangsa-bangsa tapi paluahkon do. Ase na parlobei ipatorsa sanggah manaron aima hauhuron atap tenger ni uhur hubani Naibata do. Naibata sihol mangubah uhur ni sidea humbani na lang porsaya gabe porsaya, humbani na marhatengeran bani dunia on gabe marhatengeran hu-Bani, humbani goluh na ibobai dunia on gabe na sirsir ibobai hata ni Naibata. Na utama bani Naibata aima respon ni bangsa ai sirsir paubah uhur. Pahara haluahon sedo tugas ni sidea halani Naibata sandiri do na mangkorjahon ai. Naibata lang marosuh pitah mangubah sidea secara keadaan tapi dihut do mangubah hauhuron.

4. Refleksi

a. Porlu hita pakkei bani zaman on na buei jolma cenderung marnaibatahon dunia on bahkan tanginan bani sora ni dunia on daripada manangihon sora ni Naibata. Bahkan adong kecenderungan untuk marayak sura-sura ampa mencari solusi cukup dengan ilmu ampa pingkiranni sandiri tanpa campur tangan ni Naibata. Bahkan tanpa isadari hita, niombahta pe gati lobih ipersiapkon hita secara ilmu janah hurang ibekali bani hata ni Tuhan. Hasedaon do ulih ni na padaohkon dirini humbani Naibata. Ulang ma uhurta sihol maluah hape ipadaoh hita uhur ampa goluhta humbani Sipaluah ai.

b. Sibolis selalu memakai kesempatan tarlobih sanggah adong sitarononta laho menggoda hita meragukan holong ampa kuasa ni Naibata, bahkan menggoda hita mencari solusi na lang sadalan bani hata ni Naibata. Haporsayaon na toguh janah tangi bani sora ni Naibata merupakan senjata manaluhon husip ni sibolis. Pitah marondos hubani Naibata do ase jumpah hita haluahon.

c. Anggo sihol hita maluah, ulang ipadaoh hita uhur ampa goluhta humbani Sipaluah aima Naibata. Ulang ma homa hita pitah sihol iubah secara keadaan tapi lang sirsir paubah uhur. Ulang ma homa biaran hita hubani na masa daripada hubani Naibata halani gogohan do kuasa ni Naibata paluahkon hita humbani haganup na masa age sitarononta. Tangi ma tongtong bani sora ni Naibata halani marhitei hata ai do ibotoh hita na ihasomani janah ipargogohi do tongtong hita manuju hu hadearon.

d. Haleluya No. 300 : 1 – 2 

Sibasaon 27 Agustus 2107

PORSAYA JANAH SAKSIHON MA TUHAN JESUS !

Baca teks Matius 16 : 13 - 20

1. Dob piga-piga dokah Tuhan Jesus rap pakon susian-Ni janah ipatalar horja-Ni marhitei pangajaran na gok kuasa ampa bagei ni tanda halongangan, isungkun Tuhan Jesus do susian pasal panandaion ni simbuei pakon panandaion ni sidea pasal Ia. Susian patugahkon balos ni simbuei bahwa Ia aima sahalak humbani nabi. Ketika Tuhan Jesus manungkun ise Ia manurut sidea, ibalosi si Simon: ‘Ham do Kristus, Anak ni Naibata na manggoluh in!’ (ay.16). Ternyata balos on sedo halani hasil berfikir atau analisa ni Petrus tapi halani Naibata do na patalarhon bani (ay.17). Halani Naibata do patalarhon, sintong do pangakuan ai bahwa Jesus aima Kristus / Sipaluah na iutus Naibata hu dunia on. Simon na sehari-hari dohor janah aktif mangirikkon Tuhan Jesus mengalami pertumbuhan rohani. Ia lang pitah bertumbuh secara ilmu dan pengalaman tapi bertumbuh homa bani haporsayaon. Naibata hadir ibagas uhurni sehingga boi mananda Tuhan Jesus ibagas na sintong. Pengakuanni ai lang homa ikut-ikutan bani simbuei ; Lang homa jawaban na mardasarhon habotohonni tapi jawaban marhitei haporsayaonni do.

2. Selanjutni ihatahon Tuhan Jesus “Ahu pe Huhatahon ma bam, ‘Si Petrus (batu gingging) do ho, anjaha i atas ni batu ginging ai do pajongjongon-Ku kuriang-Ku’” (ay.18). Pengakuan ni si Simon selanjutni iarahkon hubani tugas laho patalarhon harajaon ni Naibata i dunia on aima pajongjongkon kuria-Ni. Tuhan Jesus patugahkon aha na sihol sihorjahonon-Ni marhitei susian aima pajongjongkon kuria-Ni. Ia sihol mamakei susian na dob mananda janah porsaya hu-Bani gabe fundasi laho pajongjongkon kuria-Ni. Maksudni, marhitei horja ampa hasaksian ni susian do terbangun kuria ni Tuhan i tanoh on. Bahkan isobut do goranni si Petrus (batu ginging, batu na toguh). Maksudni, Tuhan Jesus dihut mangondoskon gogoh hubani si Simon laho menunaikan horja ai marhitei haporsayaon na toguh, lang urah goyah. Sekaligus mangajarhon bahwa lang be markuasa horbangan nagori toruh / hamateian manaluhon kuria-Ni in (ay.18). Artini, kuasa ni Jesus sebagai Kristus atau Sipaluah sekaligus menaklukkan kuasa ni nagori toruh ampa hamateian. Lang markuasa be hamateian bani halak na porsaya atau bani kuria-Ni in.

3. Sonin ma Tuhan Jesus mangondoskon tugas sebagai sijolom anakkunsi Harajaon nagori atas bani susian (ay.19). Anakkunsi mararti haondosan atau na ihaporsayahon mambaritahon haluahon ai bani dunia on. Sebagai anakkunsi, aha na sinangkutni susian i dunia on, tarsangkut ma age ai i nagori atas, anjaha aha na tinanggalan ni sidea i tanoh on, tanggal ma ai i nagori atas. Maksudni: kuasa ni Jesus sebagai Kristus memiliki otoritas i dunia on pakon i nagori atas. Artini, pitah Ia do hansa dalan bani jolma ase boi parsimada bani Harajaon nagori atas ai. Na manjalo janah porsaya bani Ambilan Na Madear na ipadas susian domma memiliki kepastian atau domma buka dalan bani hu Harajaon nagori atas, sebalikni na manulak, itulak do homa ia i Harajaon nagori atas ai. Sonin ma banggal janah tunggungni tohonan pakon tugas na ipaondos Tuhan Jesus bani susian na sangat menontuhon bani haluahon ni dunia on. 

4. Selanjutni ipandang (ilarang) do susian patugah-tugahkon bani halak paboa Ia do Kristus (ay.20). Mase? Halani lape idobkon Tuhan Jesus horja-Ni sebagai Kristus marhitei parmatei ampa parpuhoon-Ni. Sebagai Kristus atau Sipaluah, takkas do ibotoh aha na sihol terjadi bani diri-Ni aima ningon matei tarsilang  laho manobus dosa ni dunia on ase jumpah haluahon ai. Hata na legan, susian sedang iproses atau ipersiapkon ope sekaligus pabotohkon bani sidea pasal aha na sihol sibolusan ni Tuhan Jesus sebagai Kristus. Dob puho pe Ia humbani na matei ase adong pengutusan bani susian sebagai anakkunsi.

5. Refleksi

a. Panandaion ampa pangkaporsayaionta bani Tuhan Jesus sebagai Kristus manontuhon kesetiaannta mambalosi ampa manaksihon Ambilan Na Madear. Na gabe sungkun-sungkun, anggo si Simon isobut sebagai batu gingging na totap toguh janah setia ibagas haporsayaon, sonaha atau songon batu na sonaha do nuan kwalitas ni haporsayaonta? Lang gendo songon batu ranggisgis na urah bolah janah rapuh ? Ase ulang ma hita pitah mangaku ibagas hata tapi dihut ma mangaku ibagas haporsayaon. 

b. Hubanta pe iondoskon/ihaporsayahon do tugas sijolom anakkunsi ni Harajaon nagori atas ai. Tugas ni kuria do mangambilankon Kristus ase ibotoh dunia on pitah Ia do Sipaluah. Masalahni, lang mungkin tararahkon hita na legan manjalo haluahon anggo hita pe ragu ope pasal haluahon ai. Lang mungkin tararahkon hita na legan porsaya anggo hita pe lape porsaya. Lang mungkin tararahkon hita na legan marondos bani Tuhan anggo hita pe lape sintong marondos. Lang mungkin tarjalo hasoman hasaksianta bahwa Jesus aima Sipaluah anggo hita pe gatinan do bulinsah bani goluh on.

c. Naibata do na pajongjong harajaon-Ni i tanoh on aima kuria-Ni in. Domu hujin ciri ni kuria ningon tongtong pasangapkon goran ni Naibata marhitei na marhasadaon sebagai sesama pagori ni Tuhan, pataridahkon goluh na totap marsiurupan janah na sirsir homa marsaksi i dunia on.

d. Lang mungkin das hita hu nagori atas anggo sangkut do lalap uhur /goluhta bani biak ni dunia on. Sirsir manjalo Ambilan Na Madear janah mananggalhon biak ni dunia / dosa gabe ciri ni na porsaya.

e. Haleluya 201 : 1 – 3   

HARGA DO BANI TUHAN JESUS NA PORSAYA IN

Ambilan 20 Agustus 2017

Baca Matius 15 : 21 - 28

1. Sanggah i nagori Tirus pakon Sidon Tuhan Jesus, roh do sahalak boru Kanaan (non-Jahudi) mardilo-dilo hu-Bani ‘Idop ma uhur-Mu bangku, Tuhan, Anak ni si Daud! Parah do iahap borungku, iarsik-arsik setan’ (ay.21-22). Pori pe ia sada boru Kanaan tapi ia domma mangaku bahwa Jesus aima Tuhan, Anak ni si Daud. Ternyata barita pasal Tuhan Jesus na itangar sebelumni patubuhkon haporsayaon bani naboru ai. Haporsayaonni ai patubuhkon keyakinan markuasa do Tuhan Jesus mangusir/manaluhon setan ampa sibolis. Domma ihaporsayai bahwa gogohan do Jesus marimbang naibata-naibata na isombahni sadokah on sehingga berani ia beralih humbani naibata na legan gabe porsaya bani Jesus sebagai Tuhan. Humbani piga-piga catatan on boi isimpulhon hita bahwa ia roh hubani Tuhan Jesus lang pitah mamboan sitarononni (boruni parah iarsik-arsik setan), tapi roh do ia ibagas haporsayaon bahkan goluh ampa uhurni pe iondoskon do hubani Tuhan Jesus. 

2. Ternyata lang ibalosi Tuhan Jesus ia, sangkababah hata pe lang, bahkan ipindo susian-Ni do ase ipalao ia (ay.23). Lang pitah ai isobut Tuhan Jesus do use ‘seng patut buaton ruti humbani dakdanak, laho mamberehon ai bani baliang’ (ay.26). Ijon ia pakon boruni justru ipausih hubani pinahan na najis manurut adat panorang ai, aima baliang. Ibalosi naboru ai do ‘Tongon Tuhan, tapi ipangan baliang do rimah-rimah na matektek humbani meja ni tuanni’ (ay.27). Iparhatongon naboru ai do hata ai bahwa tongon lang talup ia sebagai sahalak pardosa anjaha na butak roh hubani Tuhan Jesus. Halani ai ketika ipatugah keadaanni na sasintongni sebagai jolma na butak janah lang talup i lobei ni Tuhan, ia lang marah janah mangelak halani sonai do tongon keberadaanni. Ia memiliki pribadi na siap ikritik janah sirsir mangakuhon hahuranganni ilobei ni Tuhan. Naboru ai roh hubani Tuhan Jesus lang mangajamhon habujuronni tapi mangajamhon idop ni uhur-Ni do. Ihaporsayai do age marhitei rimah-rimah tumang (sepertinya tidak berarti dan bernilai), tapi anggo ai roh humbani Jesus banggal do pangkorhonni. 

3. Selanjutni ipatugah do na ipuji Tuhan Jesus do haporsayaon ni naboru ai nini: ‘Inang banggal do haporsayaonmu, saud ma songon na pinindomu ai! jadi jorgit ma boru ni ai humbani panorang ai nari’ (ay.28).  Ternyata panandaion diri bani dosa ampa hagalekon merupakan sifat na iharosuhkon Tuhan Jesus bani jolma na roh hu-Bani. Lang tarbador na mangajamhon ampa na porsaya bani Tuhan Jesus. Haporsayaon merupakan pintu utama membangun relasi hubani Tuhan Jesus, janah marhitei pintu ai do homa mengalir kuasa ampa holong ni Jesus bani jolma in. Holong-Ni ai pe lang homa ibatasi oleh suku bangsa tapi parholong do Ia bani ganup jolma. Sekaligus mambuktihon bahwa takluk do setan bani Tuhan Jesus. Markuasa do Ia manaluhon sagala na boi parsedahon goluhni jolma in. Kuasa-Ni pe lang homa ibatasi ianan tapi hadir do Ia bani ganup ianan. Sekaligus pataridahkon haporsayaon ni sahalak inang (orangtua) na sangat berdampak hubani niombah. Tanda na holong uhur hubani niombah, ipataridahkon ma haporsayaonni, iondoskon ma goluhni ampa niombahni hubani Tuhan Jesus.

4. Refleksi

a. Tiap ari do hita roh hubani Tuhan Jesus baik marhitei tonggo mangindo pangurupion pasal ganup pargoluhonta on. Dear do in halani pitah Ia do na boi mangurupi hita. Tapi porlu do ievaluasi hita, domma sintong ibagas haporsayaon hita roh hu-Bani? Tontu lang wajar anggo roh hita hu-Bani hape lape sintong itandai hita Ia janah lape sintong ihaporsayai hita Ia. Tonggo ni halak na porsaya, do na banggal kuasa ampa pangkorhonni. Martonggo lang pitah padaskon pangindoan tapi dihut do mangondoskon uhur ampa goluhta hubani Tuhan in.

b. Pori pe lang mintor siluk ibalosi Tuhan Jesus pangindoanta sedo mararti na lang holong uhur-Ni hu banta. Mungkin ra do homa songon na suhar bani mungkahni pangahapta balos ni pangindoan ampa tonggonta ai. Bani pahara na sonon ulang mintor galek haporsayaonta tapi lambin toguh ma. Tenger ma uhurta lang sisoya-soya tonggo ni na porsaya i lobei ni Tuhan in. 

c. Roh ma hita hubani Tuhan Jesus ibagas toruh ni uhur, gok panolsolion bani dosa ampa hagalekonta janah pitah mangarapkon idop ni uhur-Ni. Mase? Halani anggo marhitei ukuran ni gogoh ampa habujuronta seng adong na talup hita roh hu lobei-Ni. Ajamhon hita ma totap idop ni uhur-Ni.

d. Na porsaya aima na berani mengambil sikap atau keputusan, sirsir manadingkon sagala nabiata-naibata na i dunia on janah sirsir pitah mangajamhon kuasa ampa holong ni Naibata. Ulang ma idilo hita Naibata hape uhurta lalap longkot ope bani naibata-naibata na i dunia on. Soya do parugamaon na sonin bahkan gabe mamuhoi ringis ni Naibata do use ai.

Haleluya No. 346 : 1 – 2 

PUJILAH ALLAH PENCIPTA DAN PEMELIHARA SELURUH CIPTAAN !

Sibasaon 20 Agustus 2017

Baca : Psalmen 67 : 1 – 7

1. Ambilan on aima hasaksian ampa pangakuan ni par-psalmen pasal kuasa ni Naibata na meliputi sagala bangsa. Ia do na markuasa bani sab tanoh on. Kuasa panramotion-Ni meliputi haganup na adong i tanoh on. Lang adong na boi mamparnalang kuasa-Ni halani haganup bangsa marianan do i toruh ni kuasa-Ni. Jolma na oto ampa na lang manandai diri do na lang sirsir marsombah hubani Naibata halani lang isadari bahwa Naibata do na mambere hosah ampa tanoh on gabe iananni manggoluh.

2. Pamilihon ni Naibata bani Israel sebagai bangsa-Ni bertujuan do ase haganup bangsa mananda bahwa pitah Naibata na isombah halak Israel do na markuasa bani sab tanoh on. Tarbukti do ai bani pamilihon ronsi sejarah ni bangsa ai selalu melibatkan buei bangsa, tujuanni ase haganup bangsa boi mangidah janah mananda habanggalon ni Naibata (ay.2-3). Sekaligus do ai patandahon bani dunia on bahwa Naibata na isombah halak Israel, Ia do hansa Naibata na sintong, Naibata Parholong ampa Paridop ni uhur. Ase pamilihon ni Naibata bani bangsa Israel sedo na mararti Ia manlupahon bangsa-bangsa na legan, tapi pamilihon ai aima sada cara ni Naibata laho patandahon diri-Ni hubani ganup dunia on do. Bani Bibelta pe (1 Musa) ipatugah do bahwa holong ni Naibata bani dunia on lang ipungkah humbani pamilihon ni Israel (partikular) tapi humbani mungkahni pe Ia do na manramotkon ganup dunia on (universal). Hal on ipertegas bani tujuan pandiloon ni Naibata bani Abraham (ompung ni halak Israel) ase marhiteihonsi boi jumpahan pasu-pasu ganup bangsa na i tanoh on. Halani ai par-psalmen mangakuhon bahwa Naibata lang siidah-idah bohi tapi holong do uhur-Ni bani ganup na tinompa-Ni.

3. Domu hujin par-psalmen manaurhon ase marmalas ni uhur anjaha marolob-olob ma sagala bangsa mamuji Naibata halani Ia do na manogu-nogu sagala bangsa na i atas tanoh on (ay.4-6). Ia do homa manguhum bangsa-bangsa ibagas hapintoron (ay.5). Maksudni, haganupan bangsa-bangsa marianan ibagas jangkawan kuasa ni Naibata halani Ia do na manompa sidea haganup. Halani ai sagala na marhatengeran hu-Bani jumpahan malas ni uhur tapi tarbador do na mamparnalang kuasa-Ni.

4. Ipatangkas use pasal holong ampa kuasa ni Naibata, nini: ‘Domma ibere tanoh gogohni, ipasu-pasu Jahowa, Naibatanta do hita. Ipasu-pasu Jahowa do hita’ (ay.7). Artini, Naibata lang pitah markuasa manompa tapi sekaligus do markuasa manramotkon ganup tinompa-Ni marhitei na pasirsirhon bohal ari-ari janah mamasu-masu sidea. Marhitei na sonin ma iojur haganup bangsa na i tanoh on ase roh marhabiaran janah marsombah pitah hubani Naibata.

5. Refleksi

a. Menikmati sibere-bere ampa pasu-pasu ni Naibata pasti do haganup hita sirsir. Na gabe sungkun-sungkun, ise do hita na sirsir homa martarimakasih janah mamuji Naibata halani pasu-pasu-Ni na setiap hari inikmati hita? Sihol ma hita lang pitah sirsir ipasu-pasu tapi sirsir ma homa martarima kasih ampa pasangapkon Naibata bani goluh on.

b. Pitah Naibata do Siparkuasa i tanoh on. Ia lang pitah Naibata Panompa tapi Naibata Pemelihara do homa. Halani ai bani ganup na masa, hu-Bani ma hita roh marsuhutan. Na pasti, lang tuk gogohta mangatasi gilumbang ni goluh on. Tapi sirsir do Naibata mangurupi janah pamonangkon hita asal ma porsaya hita hu-Bani ai saguru hubani kuasa-Ni do haganup na masa i tanoh on.

c. Halani ai ulang iparnaibata hita dirinta, gogohta ampa tinompa na legan ase ulang tarbador hita. Ulang ma homa gabe lingot uhur ampa panonggorta hu-Bani halani pasu-pasu ampa tinompa-Ni in.

d. Halani ihaholongi Naibata do haganup jolma, kehadiranta pe sihol ma gabe na mangkaholongi halak na legan. Mangkaholongi mararti sirsir marsiurupan atau berbagi bani holong ni Tuhan na ijalo hita bei, sirsir marsipadear-dearan bani na lobih-hurang antara na sada hubani na legan, janah marsiojuran laho mamuji pakon pasangapkon goran ni Naibata. Tugasta do patorangkon hubani hasomanta na lape sintong mananda Tuhan in ase sidea pe lambin boi menyadari holong ni Tuhan, ase sidea pe sirsir mamuji Tuhan. Ulang ma kehadiranta gabe partolsuan atau padaohkon halak na legan use humbani Tuhan in.

e. Porlu homa isadari hita bahwa holong ni Tuhan lang pitah pasirsirhon bohalta bani goluh na i dunia on tapi dihut do pasirsirhon goluh na sadokah ni dokahni janah in domma ipatalar marhitei Tuhan Jesus na dob mangkopkop hita. Marhitei na sonin ma hita totap marmalas ni uhur ampa marolob-olob mamuji Tuhan in. Gabe biak ma banta goluh na mamuji ampa pasangapkon Tuhan.

Haleluya No.  407: 1 – 2 

Ambilan 13 Agustus 2017, 1 Raja-raja 19 : 1 – 18

LOJA TUMANG DO AU, AHA MA SIBAHENONKU TUHAN ?

1. Sanggah panorang ni raja Ahab, gok hajahaton do bangsa Israel janah domma manombah naibata baal. Ahab terkenal do sebagai raja na mangkorjahon sogam ni uhur ni Jahowa (16:30). Akibatni masa do logou ni ari 3 tahun dokahni i Israel. Bani panorang aima ipatalar Naibata kuasa-Ni marhitei nabi Elias na mambuktihon seng marhagogohon naibata baal parohkon udan hu nagori ai. Mambuktihon ai, isuruh nabi Elias do nabi-nabi ni baal padaskon galangan hubani naibata ni sidea laho mangindo udan janah si Elias pe manggalang do homa hubani Naibata. Ternyata Naibata na isombah si Elias do na markuasa parohkon udan. Halani ai ibunuh nabi Elias ma nabi-nabi ni baal ai (bindu 18). Manangar ai, roh ma si Isebel, parinangon ni si Ahab sihol mamunuh nabi Elias (ay.2). Manangar barita ai mabiar do ia janah misir hu halimisan laho marponop (ay.3-4). Ijai ipadas do holsoh ampa pangindoanni bani Naibata janah ipangindo do ase ibuat ma namin hosahni. 

2. Sanggah tarpodom si Elias i toruh ni sada hayu tatada i halimisan ai, isuruh Naibata ma malekat-Ni mamuhoisi janah marsurhsi mangan halani domma ipasirsir Naibata ijai sipanganon. Dob mangan tarpodom do ia use janah ipuhoi malekat ai use janah isuruh use mangan. Dob mangan, margogoh ma ia ompatpuluh ari opat puluh borngin mardalan pinargogohan ni sipanganon ai lanjar masuk ma ia hubagas sada liang i Horeb (ay.7-9). Ijai ibogei do sora ni Jahowa ‘Aha do horjamu ijon, Elias?’ (ay.9-13). Sungkun-sungkun on sekaligus pataridahkon keheranan ni Naibata hubani Elias halani sasintongni  padaskon hata ni Naibata do ia isuruh hape marponop do ia janah melarikan diri humbani tugas ai. Ijon ma ipatugah nabi Elias holsohni mangkopkop horja ni Jahowa halani domma ibunuh haganup nabi-nabi ni Jahowa, sahalaksi mando tading anjaha ipindahi do homa hosahni (ay.10,14). Bani situasi ai ipatugah Jahowa do aha na sihol sibahenonni aima mangangkat Hasael gabe raja i Aram, si Jehu i Israel janah mamminaki Elisa gabe nabi (ay.15-16). Ipatugah do homa panramotion-Ni age marhitei sidea (ay.17) janah ipatugah na adong ope 7000 halak nari i Israel na so manombah baal. Sonin ma Naibata membere penguatan ampa panotap ase ulang mabiar janah melarikan diri Elias humbani horja ai.   

3. Marhitei parjumpahanni Elias pakon Naibata, ternyata Elias dirobahkan humbani pandapot sebelumni bahwa dearan ma ibuat hosahni (matei) gabe sirsir use manoruskon horja hanabionni ; Ketika merasa lang adong be jalan keluar ternyata bani Naibata selalu ada solusi ; Ketika merasa lang margogoh gabe memiliki kekuatan na baru ; Ketika sebelumni mabiar janah melarikan diri gabe memiliki semangat na baru ; Ketika menyerah gabe isadari na lang ongga itadingkon Naibata ia. Halani ai isuruh Naibata do ia kaluar humbani kondisi na galau ampa humbani ianan parponopanni ai laho manoruskon horja hanabion. Parjumpahanni pakon Naibata mampu merobah prinsip janah padaohkon biarni. 

 

4. Refleksi

a. Mase gati maruntol bahkan ternacam goluh ni halak na porsaya i dunia on ? Halani horja ni sidea lang melegitimasi horja hajahaton tapi sebalikni mengkritisi hajahaton ai do. Halani halak parpintor ianggab mengusik kenyamanan ni parjahat. Halani ai ulang ma hita pitah sirsir ijalo dunia on tapi siap homa ketika itulak bahkan ihagigihon dunia on.  

b. Bani situasi aha pe na porsaya lang boi mundur bani tugas menyuarakan hasintongan bani dunia on. Goluh  ni na porsaya ningon gabe pengaliran ni hata ni Naibata. Hata ni Naibata lang boi itutup oleh uhur biar atau ancaman. Hata ni Naibata maningon ipadas bani panorang na dear ampa na lang dear.

c. Semangat ampa haporsayaonni Elias bertumbuh dob marjumpah pakon Naibata. Anggo  bertumbuh haporsayaon lambin magou do uhur biar janah lambin sirsir do mandalankon horja ni Tuhan.  

d. Ulang mambahen haputusan pitah marhitei pingkiranta sandiri tapi padas hita ma haganupan na masa age pingkiranta hubani Naibata, patugahkon holsohta hubani Naibata. Tapi lang pitah ai, ningon sirsir homa manangihon sora ampa petunjuk arahan na humbani Naibata. Anggo sirsir manangihon ampa mandalankon hata ni Naibata pasti selalu adong jalan keluar. Ulang ma sihol mandapot solusi hape uhur ampa goluhta lambin daoh humbani hata ni Naibata.

e. Na dear manurut hita belum tentu dear bani Naibata. Halani ai ningon totap parlobei mangondoskon ganup na masa hubani Naibata ase Ia patorangkon uhur ampa manontuhon langkah sidalananta. Maningon tenger uhurta bani pangkasomanion-Ni laho mandalankon tugas pandiloonta i dunia on. Pori pe adong ancaman tuk do kuasa-Ni mangurupi ampa paluahkon hita. 

f. Haleluya 442 ; 1 – 2 

SAKSIHON HITA MA HAPORSAYAONTA IN !

 Sibasaon 13 Agustus 2017, Rom 10 : 5 – 15

 

1. Haluahon aima sentral pangajaran bani bibelta. Ise do na boi maluah janah sonaha do ase boi maluah, gati tubuh perdebatan. Hal on pe terjadi do age bani kuria Roma. Adong marpandapot bahwa haluahon jumpah marhitei na mangkorjahon titah. Maksudni, haluahon terjadi halani gogoh atau kemampuan ni jolma. Tapi Paulus patorangkon haluahon sadalan hubani Ambilan Na Madear, bahwa haluahon ai jumpah pitah marhitei idop ni uhur ni Kristus do. Alasanni isobut bani ay. 6-7, bahasa Kristus roh hu dunia on sedo halani na ialop atau halani prakarsa ni jolma ; Janah puho pe Ia humbani na matei seng adong ijai peran ni jolma, tapi hal ai terjadi halani prakarsa atau horja ni Naibata do. On mambuktihon bahwa haluahon ai (na jumpah marhitei horja, parmatei ampa parpuhoon ni Tuhan Jesus) sedo halani usaha ni jolma tapi pitah halani idop ni uhur ni Naibata do.

2. Anggo sonai haganup do jolma ipaluah? Tongon haganup do jolma gabe alamat ni haluahon ai tapi maningon ijalo ibagas haporsayaon (‘Ai maluah ma ham, anggo isaksihon ham marhitei pamanganmu Tuhan Jesus anjaha ihaporsayai ham ibagas uhurmu, na dob ipuhoi Naibata Ia humbani na matei’/ay.9). Adong dua hata menjadi kata kunci ijon aima porsaya ampa marsaksi. Porsaya tubuh humbani uhur na sirsir manangar hata ni Naibata janah marsaksi aima buah ni haporsayaon ai. Artini, Haporsayaon lang boi ipisahkon humbani horja manaksihon haporsayaonni. Haporsayaon terbukti anggo goluhni gabe goluh na marsaksi pasal holong ni Kristus. 

3. Domu hujin ma isobut bani ay 13-15 tugas ni halak na porsaya: Sidea aima na iutus Naibata manaksihon haluahon na dob ijalo ampa ihaporsayai sidea ase halak na legan pe boi dihut manangar janah dihut porsaya halani marhitei na manangar Ambilan do tubuh haporsayaon. Marhitei na sonin sidea pe boi ma dihut mandilo goran ni Tuhan halani sagala na mandilo goran ni Tuhan in ipaluah do. 

4. Halani ai marsaksi lang sarupa hubani na padaskon aha na ibotoh (songon pakar ilmu) tapi patugahkon aha na dob iahapkon do. Halani ai do ase horja marsaksi aima horja malas ni uhur halani domma parlobei ia mangahapkon malas ni uhur ai aima haluahon na humbani Tuhan in. halani ai do homa ase horja marsaksi lang ongga menuntut upah humbani dunia on halani domma parlobei iahapkon sidea upah haluahon na humbani Tuhan aima haluahon ai. Sonang do ia loja bani horja manaksihon goran ni Tuhan janah loja do ia anggo lang manaksihon goran ni Tuhan in.

5. Bani pahara on isobut bani ay.12 bahwa lang adong ubahni halak Jahudi age halak Gorik. Halak Jahudi na gati bangga janah merasa talupan i lobei ni Naibata, ternyata sidea pe lang boi maluah anggo humbani status ampa horja ni sidea. Na ipangindo aima sikap martoruh ni uhur irik memiliki uhur na martarimakasih bani Naibata. Domu hujin biak ni naporsaya lang be marusaha pabanggal-banggal dirini marhitei status, jabatan, arta, pnl., halani isadari do na lang boi ia maluah anggo humbani horja atap na adong bani. 

6. Refleksi

a. Tang sihamalaskonon ni uhurta aima banggalan do idop ni uhur ni Tuhan marimbang haganup dosanta. Lang adong dosanta na mabanggaltu sehingga lang sirsir Tuhan Jesus mamorsan janah manasap ai. On ma na mendorong ampa mambuka uhurta marmalas ni uhur manjalo janah mangkaporsayai Tuhan in. Malas ni uhur na sonin ma homa mendorong hita ase sirsir ipakei Tuhan manaksihon haporsayaonta ai hubani halak na legan. Pori pe sipata marsitaronon janah berkorban do bani horja ai tapi tenger ma uhurta ihasomani Tuhan in do hita tongtong halani domma gabe anak na pinaluah-Ni hita.    

b. Sagala na adong i dunia on memang harga do ai tapi ningon isadari hita bahwa haganupan ai memiliki keterbatasan baik secara waktu age gogoh. Anggo marujung hita tading ma haganup na i tanoh on janah ilupahon jolma in ma homa hita. Lang markuasa homa na i dunia on padiparhon goluhta hu haluahon. Halani ai ulang ma gok bani na i dunia on tumang pingkiranta tapi totap ma jolom hita haporsayaonta. Aha pe na adong banta bahen hita ma ai gabe bernuansa sorgawi maksudni: mamakeihon haganupan na adong laho pasangapkon goran ni Tuhan in, gabe alat atau sarana banta laho manaksihon holong ni Tuhan bani dunia on.  

c. Mase porlu tumang hita marsaksi? Halani terbatas do waktu janah lang adong dalan haluahon sobali marhitei Kristus. Halani ai pakei hita ma panorang ni goluhta sadear-dearni laho marsaksi. Ulang itunda-tunda manaksihon haporsayaonta halani lang binotoh atap na lang adong be kesempatan banta ari patar laho marsaksi. Marsaksi ma marhitei hata ampa pambahenanta.

d. Haleluya 129 : 1 – 2 

Kegiatan & Pemakaian Gereja

Kalender

Untuk menampilkan jadwal/kalender ini, silakan klik +GoogleKalender diatas,dan login ke email gmail.com anda. Kami approve 1 x 24 jam.<Full View>

Komentar

Go to top