Print this page

ULANG PAJUNTUL-JUNTUL DIRI SONGON MATA NI BALANG! (Ambilan 15 September 2019 Lukas 14 : 7 – 11)

ULANG PAJUNTUL-JUNTUL DIRI SONGON MATA NI BALANG!

Ambilan 15 September 2019

Lukas 14 : 7 – 11 

 

1. Sanggah na mangan Tuhan Jesus i rumah ni sada halak sintua ni Parisei bani ari Sabat, ipardiateihon Tuhan Jesus do bahwa na iontang (idilo) hujai marlumba do hundul mamilih ianan sisangapan. Na iontang ai lang sadar bahwa sidea sasintongni idilo sebagai ontangan. Lang isadari sidea bahwa na manontuhon hundulan sedo ontangan tapi  hasuhuton do. Sepatutni namin hasuhuton do na mempersilahkon ontangan hundul domu bani ianan na dob iatur hinan tapi na terjadi justru sidea langsung hundul bani ianan sisangapan. On pataridahkon sifat gijang ni uhur janah sonai ma umumni sifat ni halak Parisei bani panorang ai. 

2. Age bani parugamaon pe halak Parisei merasa bahwa sidea do sisintongan, janah sitalupan i lobei ni Naibata. Lang isadari sidea anggo bani harajaon ni Naibata, Naibata do hasuhuton janah jolma in aima na iontang hubagas harajaon ni Naibata. Naibata do na manontuhon ianan bani sasada halak apakah bani ianan na sangap atau lang. Naibata do na mambotoh ise do jolma in na talup hundul bani ianan na sangap.

3. Halani ai ibahen Tuhan Jesus do sada limbaga mangajari haganup na idilo panorang ai. Ilimbagahon bani halak na iontang bani sada pesta parunjukon na mintor hundul bani ianan na sangap, tapi adong do ontangan sisangapan humbani gabe roh ma suhut mangkatahon, ‘Bani ma ianan in’, gabe maila ma ia (ay.8-9). Domu hujin iajarhon Tuhan Jesus do, anggo hona ontang ham, laho ma ham hundul bani ianan sitoruhan ase anggo roh hasuhuton mangkatahon bamu’Huataskon ma ham hundul’ gabe sangap ma ham idahon ni ganup hasomanmu (ay.10). Limbaga on aima pangajaran ase sirsir martoruh ni uhur i lobei ni hasoman jolma tarlobih i lobei ni Naibata. Dearan do halak na legan mangkatahon hita talup atau terhormat dari pada hita pajuntul-juntulhon dirinta. 

4. Sadalan hujin irimpunhon Tuhan Jesus do pangajarion-Ni on ‘Ai sagala na pagijang dirini, patoruhon do, tapi na patoruh dirini, sipagijangon do (ay.11). Sedo maksudni salah anggo marpangkat na gijang ampa memiliki jabatan na terhormat tapi na ipindo ase bani haganup status ulang gabe tubuh kesombongan atau gijang uhur. Sifat toruh ni uhur aima na selalu memiliki jiwa ‘melayani’ songon sahalak juak-juak sedo ‘ilayani’ songon sahalak tuan. Sifat na sonon do na ipataridahkon Tuhan Jesus bani goluh-Ni gabe sitiruon bani na porsaya. Tuhan Jesus sirsir patoruh diri-Ni gabe jolma pori pe Ia aima Anak ni Naibata demi untuk ‘melayani’ atau paluahkon jolma pardosa. Sifat toruh ni uhur mararti do homa adong panandaion diri bahwa jolma na galek janah pardosa do ia na lang talup i lobei ni Naibata janah iakuhon bahwa haluahonni pitah halani idop ni uhur ni Tuhan Jesus do. 

5. Irimpunhon Tuhan Jesus do pangajarion-Ni on nini: ‘na patoruh dirini, sipagijangon do’. Gabe tangkas ma bahwa jolma na sirsir patoruhkon diri ampa uhurni, sidea do na talup janah na iharosuhkon Naibata janah sidea do na ipagijang use laho hundul bani hasangapon na dob ipasirsir Naibata marhitei Tuhan Jesus. Hatahonon ma, na sangap manurut dunia on lape tontu sangap ia ilobei ni Naibata, janah na hiri manurut dunia on lape tontu hiri sidea i lobei ni Naibata. Kata kunci sangap i lobei ni Naibata aima anggo sirsir patoruh uhurni i lobei ni Naibata ampa hasomanni jolma do na ipataridahkon bani karakter sirsir mangidangi songon sahalak jabolon.

 

6. Refleksi

a. ‘Ulang pajuntul-juntul diri songon mata ni balang’ maksudni, ulang ma songon mata ni balang juntul hape lang boi marpangidah. Ulang ma ipagijang-gijang hita dirinta hape bani pambahenan lang marhataridahan.  Pataridahkon hita ma hagijangonta marhitei na lambin marbanggal hita ibagas toruh ni uhur, holong ampa horja na madear, sedo marbanggal ibagas gijang ni uhur. 

b. Marbeda do hasangapon manurut dunia on pakon manurut Naibata. Na sangap manurut dunia on gati iukur pitah marhitei status sosial, arta, kuasa, jabatan, pnl., tapi na sangap i lobei ni Naibata aima na sirsir patoruh uhurni do. Na sangap manurut dunia on anggo buei na melayanisi hape anggo i lobei ni Naibata na sangap aima anggo buei  na ilayani hita do. Aha pe statusta bei totap ma toruh uhurta marhitei na sirsir mangidangi hasoman halani  marhitei na sonai do hita gabe jolma na sangap i lobei ni Naibata. Sirsir ma homa mangaku bahwa hita pe jolma na galek janah pardosa do na pitah boi maluah halani idop ni uhur ni Naibata tumang do.

c. Piga-piga contoh gijang ni uhur na porlu ipadaoh hita: Jolma na berani marutang demi gengsi, penampilan ; Parsahapni selalu i atas, pamer arta hape anggo adong na mangindo pangurupionni ipadaoh do dirini ; gila-gila hormat ; anggar jabatan ; sirsir menyumbang tapi maningon hatani sibalosan pori pe hatani ai lang sintong bahkan lang segan-segan memfitnah halak na legan na lang sadalan pakonsi ; marepes ni uhur bani halak na masombuh ; sirsir marhasoman pitah pakon na setaraf pakonsi ; maningon halak na legan parlobei manisei ia ; domma ia salah tapi selalu membela diri bahkan melempar hasalahanni hubani halak na legan ; merasa pitah ia do hansa sisintongan, pnl. Padaoh hita ma sifat-sifat na sonon ai haotoon do in.

d. Ase ulang ma ipabanggal-banggal hita dirinta marhitei na adong banta janah ipaetek-etek hita hasomanta ase ulang gabe etek hita i lobei ni Naibata. Pakei hita ma haganup na adong banta untuk mangkaholongi ampa menghormati sesama hita, marsilobei-lobeian marsipasangapan. Ase usihi hita ma Tuhan Jesus na sirsir patoruh dirini sehingga iondoskon Naibata Bani hasangapon aima harajaon ni Bapa na i nagori atas ai.

e. Haleluya No. 384 : 1 – 2  

Read 1983 times

32 comments