2. Domu hujin iperbandingkon Tuhan Jesus do diri-Ni sebagai ruti hagoluhan pakon ruti na ibere si Musa. Tongon ruti atau manna na ibere si Musa bani bangsa ai sanggah i pardalanan, ai pe marharohan humbani Naibata do. Tapi jolma na mangankon manna ai mangulaki loheian do use janah matei (ay.49), tapi na manjalo Tuhan Jesus sebagai ruti hagoluhan manggoluh do ronsi sadokahni dokahni (ay.51). Hunjon gabe tangkas ma bahwa ruti na imaksudkon Tuhan Jesus ijon sedo sekedar ruti jasmani tapi Ia sandiri do ruti ai na sirsir mamberehon diri-Ni gabe galangan pardameian antara jolma pardosa pakon Naibata ase jumpahan hagoluhan jolma in.
3. Jesus sebagai ruti hagoluhan mararti Ia mambere daging-Ni ampa manduruskon daroh-Ni gabe partobus bani jolma pardosa sehingga jolma in lang be matei halani dosani halani upah ni dosa aima hamateian. Halani ai na mangankon daging-Ni janah na manginum daroh-Ni gabe manjalo goluh na sadokah ni dokahni. Makna parmatei ni Tuhan Jesus aima laho mangkopkop jolma pardosa marhitei na sirsir Ia matei manggantihkon uhuman na aturan bani jolma. Selanjutni parpuhoon-Ni merupakan bukti bahwa domma italuhon hamateian ai. Marhitei na sonin ma jumpah hagoluhan bani na manjalo janah porsaya hu-Bani. Sintong bahwa sibere-bere ni Naibata do ruti atau sipanganon parangkulaon tapi holong-Ni lang pitah sebatas ruti na i dunia on tapi dihut menuntashon kuasa ni hamateian aima dosa. Halani ai na manjalo janah na porsaya hu-Bani domma jumpahan hagoluhan janah pori pe matei ibagas parangkulaon papuhoon-Ni do use bani ari parpudi (ay.54).
4. Ipertegas Tuhan Jesus use bahwa Ia sebagai ruti hagoluhan lang homa sarupa pakon Musa halani Ia aima na roh humbani Bapa (ay.46). Musa sebagai juak-juak ni Naibata jolma sipardosa do homa tapi Tuhan Jesus sebagai Anak ni Naibata, pori pe marrupa jolma Ia tapi lang ongga mardosa. Halani ai banggalan do Ia marimbang si Musa. Na manjalo janah porsaya hubani Tuhan Jesus, ai do na boi das hubani Bapa halani Ia do hansa na talup gabe galangan pardameian ni jolma i lobei ni Naibata. Halani pitah Tuhan Jesus do hansa jolma na roh humbani Bapa, maka pitah Ia do na mambotoh dalan ase boi jolma in roh manjalo hagoluhan na hubani Naibata.
5. Cara manjalo Tuhan Jesus sebagai ruti hagoluhan isobut ‘Ise pe lang na boi roh hu Bangku, anggo seng Bapa in, na marsuruh Ahu, manogusi’ (ay.44), ‘haganup na manangihon Bapa in anjaha marguru hu-Bani, in do na roh hu Bangku’ (ay.45). Maksudni, pitah marhitei na sirsir iajari janah ibobai hata ni Naibata do ase boi mananda janah porsaya bani Tuhan Jesus. Maksudni ibutuhkon indra na legan laho mananda ampa manjalo Tuhan Jesus sebagai ruti hagoluhan aima indra haporsayaon gabe ihaporsayai bahwa Tuhan Jesus aima Naibata na gabe daging/ruti ase boi itanda jolma in Ia. Ase humbani na manangar hata ni Naibata do roh ni haporsayaon janah marhitei haporsayaon do iarusi jolma in bahwa Jesus do tongon ruti hagoluhan na roh humbani Bapa. Halani Naibata do na mambere pangarusion maka haluahon ampa hagoluhan na sadokah ni dokahni ai murni sebagai sibere-bere ni Naibata, jolma in pitah ipindo sirsir manjalo janah porsaya.
6. Refleksi
a. Ternyata adong dua arti ni hamateian. Na parlobei matei halani marujung goluh, na paduahon matei ibagas dosa halani lang ijalo ruti hagoluhan aima Tuhan Jesus. Anggo hamateian na parlobei ai idagei haganup jolma do tapi anggo hamateian na paduahon ai lang be markuasa bani na porsaya halani domma igalar Tuhan Jesus utang dosa ni sidea. Halani ai hargahon hita ma haporsayaonta sebagai arta siharganan.
b. Realita, buei do jolma bayak bani ruti na i dunia on tapi miskin janah bodoh halani lang memiliki arta na boi menjamin goluhni aima haporsayaon hubani Tuhan sebagai ruti hagoluhan. Buei do jolma pentar marhali-halihon duit tapi ternyata bodoh halani hurang memperhitungkon ujung ni goluhni. Umumni sidea selalu sibuk bani “ruti” janah hurang mambere panorang manjalo hata ni Tuhan. Halani ai ulang ma hita pitah marusaha ase bosur bani ‘boltok’ tapi bosur ma homa ibagas haporsayaon ampa hata ni Tuhan. Duit boi mamboli tambar pakon sipanganon tapi lang boi mamboli hosah apalagi hagoluhan sisadokah ni dokahni. Pitah Tuhan Jesus ruti hagoluhan na boi menjamin goluh na manongtong banta.
c. Tuhan Jesus do galangan pardameanta pakon Bapa. Lang adong dalan na legan roh hubani Bapa. Anggo lang sirsir manjalo Tuhan Jesus sarupa ma ai hubani jolma na loheian pakon horahan tapi lang sirsir mangan ujungni matei. Dosa mambahen jolma in bani kondisi loheian pakon horahan. Tapi Jesus domma mamberehon diri-Ni gabe sipanganon ampa siinumon ase ulang matei jolma halani dosani. On do na ijalohon hita age bani HBN. Ase halak na mangaku porsaya maningon do totap ringgas manjalo HBN, janah ijalohon do ai ibagas malas ni uhur ampa martarimakasih hubani holong ni Tuhan.
d. Haleluya No. 116 : 1 – 3
