2. Idop ni uhur ai boi ijalo jolma anggo marianan Tonduy Napansing ibagas dirini. Mase? Halani Tonduy ai do na pabotohkon bani jolma bahasa marujung hubani hamateian do goluh ni jolma in halani dosa, halani upah ni dosa aima hamateian. Tonduy ai do homa pabotohkon pasal idop ni uhur ni Naibata bani jolma pardosa ibagas Kristus marhitei na dob italuhon sorod ni dosa ai. Tonduy ai do homa na mambobahon uhurni jolma in ase porsaya bani pangkopkopon ni Tuhan Jesus. Halani ai mutlak do maningon marianan Tonduy ibagas hadirion ni jolma ase boi jumpahan haluahon. Domu hujin isobut ‘Tapi anggo seng Tonduy ni Kristus bani jolma, seng Kristus simadasi’ (ay.9). Artini: anggo lang marianan Tonduy ai maka seng Kristus simada hita, artini: lang sipardihut bani haluahon atau idop ni uhur ni Kristus ai. Mase? Halani pitah marhitei pangajarion ni Tonduy ai do hansa ase boi hita porsaya bani holong ni Tuhan. Marhitei na sonai takkas ma banta bahwa haluahon ai domma sirsir tapi na boi parsimada bani haluahon ai pitah halak na porsaya do, janah ase boi porsaya maningon Tonduy ai mambobai uhur ni jolma. Hatahonon ma, anggo lang Tonduy ai marianan ibagas hadirion ni jolma maka tutup ma bani sidea haluahon ai halani pitah Tonduy ai do hansa na boi pabotohkon dalan haluahon ai bani jolma.
3. Tonduy ni Naibata dihut mambere pangarapan bani jolma na porsaya bahwa pori pe idagei hamateian tapi lang hamateian be ujungni goluhni. Nini bani ay.11 ‘Tapi anggo marianan ibagas nasiam Tonduy ni na mamuhoi Jesus humbani na matei, pagoluhon ni Sipuhoi Jesus humbani na matei in do age badan nasiam na ra matei in’. Ase orientasi ni goluh ni naporsaya lang be pitah na i dunia on tapi domma hagoluhan na manongtong ai. Lang be homa ihabiari sidea hamateian ni angkula halani domma ibotoh sedo hamateian ujung ni goluh bani na porsaya.
4. Tonduy na marianan ibagas hadirion ni na porsaya dihut do homa mambobai goluhni sidea laho manundalhon haganupan hisap ni daging. Na manrajai uhur ni sidea lang be rosuh pardagingon tapi domma rosuh ni Simada Tonduy ai aima Naibata. I tongah-tongah ni buei pilihan ampa harosuh i dunia on tapi halak na porsaya totap do mamilih harosuh ni Naibata. Bahkan lang mabiar sidea pori pe ihagigihon dunia on bahkan agouan hosah halani mamilih mardalan bani pambobai ni Tonduy halani domma ihaporsayai bahasa bani ganup keadaan do hadir Naibata paluahkon. Anggo sanggah galek sidea ijalohon do panotap humbani Tonduy ai bahwa lang ipaturut Naibata sidea tarbador, sanggah buei paruntolon ijalo do homa panotap humbani Tonduy ai bahwa tuk do kuasa ni Naibata mangurupi sidea, sanggah jut pingkiran ni sidea ibere Tonduy ai do tenger ni uhur bahasa bani Naibata selalu adong jalan keluar. Marhitei na sonin ma goluh ni na porsaya totap margogoh mandalani goluh on bani ganup keadaan.
5. Refleksi
a. Haluahonta domma sirsir marhitei parmatei ampa parpohoon ni Tuhan Jesus manaluhon kuasani dosa ampa hamateian. Tapi iondoskon Tuhan do use Tonduy Na Pansing banta ase boi ijalo janah ihaporsayai hita haluahon ai. Ulang ma pitah mambotoh haluahon ai tapi na sirsir manjalo haluahon ai ma homa.
b. Goluhta do rumah ni Naibata marhitei Tonduy-Ni. Hajengesonta lang be itontuhon rupa tapi domma itontuhon goluh na totap sirsir iajari janah ibobai Tonduy. Ase lambin jenges ma rupanta marhitei na ipataridahkon hita sikap hidup na ibobai Tonduy.
c. Anggo Tonduy ai manrajai ampa mambobai hita boi do torang pangidahta age bani buei hagolapan atau hamaholon na adong i tanoh on.
d. Haleluya No. 80 : 1, 2, 3.