2. Habayuon ai terjadi halani Naibata sirsir manasap haganup dosa ni jolma janah sorot ni dosa ai domma ipamatei. Artini, halani panaronon ni jolma i tanoh on sasintongni aima akibat ni dosa, sehingga anggo ipamatei Naibata sorod ni dosa ai maka terjadi ma habayuon: boi ma use marsaor jolma in pakon Naibata. Parsaoran aima na mamboan hadameion ampa malas ni uhur halani Naibata do sumber ni hadameion ai. Hadameion ampa malas ni uhur na imaksud ijon sedo mararti tading ma haganup paruntolon na i tanoh on tapi na boi iahapkon jolma sonari aima suasana hati atau uhur do, gabe tubuh ma uhur na marpangarapan bani tanoh na baru ai. Artini, marianan ope hita i tanoh on janah na paima-imahon ope hita bani tanoh na baru ai.

3. Igoki do bagah-bagah ai marhitei Tuhan Jesus na dob manaluhon sorod ni dosa ampa hamateian. Tuhan Jesus do gabe jaminan bani parsaud ni bagah-bagah ai. Artini, bagah-bagah ai pasti do saud halani domma roh Tuhan Jesus hu dunia on pamateihon sorod ni dosa. Marhitei Tuhan Jesus goluhta domma irubah humbani na manuju hamateian gabe manuju hu hagoluhan, humbani na lang mararti gabe mararti, humbani na irajai dosa gabe na irajai Tuhan. 

4. Pangkopkopon ni Tuhan Jesus ai domma terjadi nuan i tanoh on tapi hagogokni lang pitah sonari tapi adong ope siarapkonon bani parroh-Ni padua-halihon. Suasana na ipatugah bani tanoh na baru ai dihut mendorong na porsaya torus sirsir pabayuhon hauhuron ampa goluh. Goluh ni na porsaya lang be marbiak dunia tapi domma marbiak na baru na sadalan bani hata ni Naibata. Habayuon na ibere Naibata dihut merobah cara pandang sehingga ukuran ni na madear lang be iidah humbani kaca mata dunia tapi domma humbani hata ni Tuhan. Ketika jolma mandasarhon goluhni hubani hata ni Tuhan sonari pe taridah do tanda-tanda habayuon ai, aima tanda-tanda harajaon ni Naibata: holong, damei ampa malas ni uhur  i tanoh on. 

5. Haporsayaon bani tanoh na baru ai mambere keyakinan bahwa lang be sisoya-soya goluhni na mangirikkon Tuhan. Porsaya do homa sidea bahwa pori pe buei ope paruntolon i tanoh on tapi ipasirsir Tuhan Jesus do gogoh ampa hamonangan laho mandompakkon haganupan ai. Marhitei na sonai bani ganup keadaan totap do na porsaya in sipambalosi hubani Tuhan. Pangarapan bani tanoh na baru ai dihut mamboan semangat ampa kesadaran na baru bahwa goluh sisonari bukanlah akhir. Halani ai malas ni uhur lang be idasarhon hubani aha na masa i dunia on tapi halani kesadaraan bahwa domma rap pakon Tuhan na porsaya in mandalani goluhni. Pori pe gati idompakkon dalan na golap lang mabiar ia halani ibotoh rap pakon Tuhan in do ia mardalan. Hagolapan na i tanoh on lang mambahen golap uhurni tapi sebalikni uhur ampa haporsayaonni boi mambahen torang  langkahni age mandalani na golap.

6. Refleksi

a. Ungkapan na gati ibogei hita ‘ulang tading i lobei’. Domma ipabotohkon hubanta malas ni uhur siarapkonon ai. Ulang ma pitah ibotoh hita tapi parayak hita ma ai marhitei na sirsir pabayuhon uhur gabe uhur na marpangarapan janah porsaya bani Naibata.

b. Antara dalan pakon tujuan porlu tangkas. Na mardalan do hita i tanoh sisonari on tapi tujuanta huta na baru ai do. Domma sirsir huta na baru na gok malas ni uhur ai, hinsah ma hita ibagas haporsayaonta manuju huta na baru ai.

c. Haleluya No. 392 : 1 – 4.