MAMBAHEN TUHAN JESUS GABE ARTA SIHARGANAN (Ambilan 17 Maret 2019 Heber 4 : 14 – 16)

MAMBAHEN TUHAN JESUS GABE ARTA SIHARGANAN

Ambilan 17 Maret 2019

Heber 4 : 14 – 16 

 

1. Surat Heber patorangkon hubungan  ni horja ni Naibata na bani Padan Na Basaia (PL) pakon Padan Na Baru (PB). Artini, aha na isuratkon bani PL martuduh-tuduh janah igoki bani PB marhitei Tuhan Jesus. Horja ni Naibata lang terputus antara PL pakon PB. PL mambere gambaran pasal haluahon na ibahen Naibata marhitei Tuhan Jesus. Tuhan Jesus merupakan penggenapan ni haganup holong ni Naibata na isuratkon bani PL. Halani ai bani surat Heber adong do 11 hali isuratkon bahwa Tuhan Jesus lobihan, dearan, sangapan’ marimbang na legan, misalni: Ia lobihan humbani malekat (1:4), sidearan na mamboan haluahon (6:9), sisangapan (7:7) ; 7:19 ; 7:22 ;  8:6 ; 9:23 ; 10:34 ; 11:16 ; 11:35 ; 11:40.

2. Bani ambilan on isobut do bahwa Tuhan Jesus aima Sintua ni Malim na Bolon. Bani PL, malim aima sada jabatan na marugas i Rumah Panumbahan. Tugasni aima padaskon tonggo mangindo hasasapan ni dosa ni bangsa ai humbani Naibata. Jadi malim aima perantara antara bangsa ai pakon Naibata. Adong 3 bagian ruangan i Rumah Panumbahan (Bait Suci) aima: pelataran (ianan ni bangsa na roh beribadah), ianan na pansing (ianan ni malim-malim marugas) pakon ianan na tang pansing aima ianan ni malim bolon. Pitah malim bolon do na boi masuk hu ianan na tang pansing ai janah panorangni pe iatur pitah sahali satahun do. Haganup malim na marugas pitah melintasi na tolu area on do tapi Tuhan Jesus sebagai Sintua ni Malim na Bolon aima Malim na wilayah kuasa-Ni melingkupi nagori atas (ay.14), rumah/ianan na so pinauli ni tangan (9:24). On sihol mangajarhon bahwa lobihan do Tuhan Jesus marimbang malim-malim na marugas i rumah panumbahan. Ia aima Anak ni Naibata na roh hun nagori atas. Domu bani status na sonin banggalni, iojur do kuria ase poltik manjolm hata haporsayaon, ulang ragu be manjalo pakon mangkaporsayai Tuhan Jesus.

 

3. Sebagai Anak ni Naibata, Tuhan Jesus sirsir roh hu dunia on marrupa jolma janah dihut mangahapkon ahap ni jolma bahkan tarlajou i dunia on das hubani na manaron ampa matei tarsilang. Mararti do ai bahwa haganup na masa bani jolma domma homa iahapkon Tuhan Jesus (ay.15). Anggo Tuhan Jesus monang mandompakkon haganupan ai, maka na porsaya bani Tuhan Jesus pe pasti do  ipamonang mandompakkon haganup na masa bani goluh on. Tangkas do ibotoh Tuhan Jesus keterbatasan ampa hagalekon ni jolma, tapi ise na porsaya hu-Bani pasti do ipamonang. On ma jaminan bani na porsaya bahwa marhitei Tuhan Jesus sebagai Sintua ni Malim na Bolon domma riap mardalan pakon Tuhan Jesus age sanggah i dunia on.

 

4. Bani haganupan parlajoan ampa sitaronon na idompakkon Tuhan Jesus, ternyata Ia seng mardosa (15). On ma buktini bahwa sintong do Ia Sintua ni Malim na Bolon. Anggo malim-malim bani PL jolma na biasa janah sipardosa do tapi Tuhan Jesus lobih do humbani sidea halani Ia lang ongga mardosa. Artini, sebagai Sintua ni Malim na Bolon, Ia domma mamberehon diri-Ni gabe galangan na pansing i lobei ni Naibata bahen haluahon ampa hasasapan ni dosa ni jolma. Pitah Tuhan Jesus do na talup i lobei ni Naibata gabe galangan pardameian  halani pitah Ia do na lang ongga madabuh hubagas dosa. Dosa na manirang jolma pakon Naibata na pansing, domma italuhon Tuhan Jesus sehingga boi ma use jolma in talup roh hubani Naibata. On ma idop ni uhur ai, aima: Tuhan Jesus domma manaluhon haganup dosa ni jolma. Ibagas Tuhan Jesus jolma in domma imerdekahon humbani kuasa ni dosa sehingga boi jumpahan haluahon.

 

5. Domu hujin iojur do jolma/kuria ase marhinsah ni uhur marayak paratas idop ni uhur ai (16). Marhinsah ni uhur mararti: menjadi prioritas utama, ulang iparlanseihon, mambere uhur, pingkiran ampa gogoh mangirikkon Tuhan Jesus. Ulih ni na marhinsah ni uhur marayak paratas idop ni uhur ai aima; age bani pardalanan ni goluh i dunia on, monang do sidea manaluhon haganup parlajoan halani domma rap pakon Tuhan Jesus sidea mardalan. Gogohan do Tuhan Jesus marimbang haganup parlajoan ampa sitaronon ni jolma in. Lang pitah ai, marhitei Tuhan Jesus maka haluahon ni kuria lang be pitah sanggah i dunia on tapi domma homa parrupei sidea bani haluahon na kekal na dob ipasirsir Tuhan Jesus i nagori atas. Kesadaran na sonin ma mangojur kuria in ase totap marhinsah ni uhur mangirikkon Tuhan Jesus halani domma ibotoh lang soya be goluh ni sidea. Sidea lang ra sirang pakon Tuhan Jesus pori pe aha na masa. Porlunan do bani sidea manangihon ampa mangihutkon hata ni Tuhan Jesus dari pada sora ni dunia on. 

 

6. Refleksi

a. Ra do hiranan hita bani pangurupion ni hasomanta. Bahkan boi do hasomanta use manunsahi hita. Ambilan on paingatkon bahwa bani ganup keadaan adong do Tuhan Jesus na mambotoh ganup na masa banta. Ia aima Tuhan na ‘immanuel’ na pamonangkon hita bani ganup na masa age parlajouan ni goluh.

b. Bahen hita ma Tuhan Jesus sebagai na utama, siharganan, siporlunan bani goluhta halani pitah Ia do Tuhan na markuasa i tanoh on age i nagori atas janah pitah marhitei holong-Ni do hansa ase boi hita maluah humbani haganup parmaraan. I tongah-tongah ni buei tawaran kemudahan bani zaman on porlu hita pangkei ase ulang halani ai itndalhon hita Tuhan Jesus. Botohoan do Tuhan Jesus mangidah na porlu banta ronsi paluahkon hita marimbang ganup tawaran na adong i dunia on.

c. Lambin bertumbuh haporsayaonta hubani Tuhan Jesus pasti do lambin margogoh hita bani goluh on janah lambin martambah malas ni uhurta halani domma ihaporsayai hita lang tarbador na mangunsagah hu-Bani.

d. Haleluya No.   339 : 1 – 5

Read 1151 times

Leave a comment

Make sure you enter all the required information, indicated by an asterisk (*). HTML code is not allowed.

Go to top