GOLUH NA MARPANIMBANGION (BIJAKSANA) (Ambilan 10 Maret 2019 Podah 4 : 18 – 27)

GOLUH  NA  MARPANIMBANGION  (BIJAKSANA)

Ambilan 10 Maret 2019

Podah 4 : 18 – 27

 

1. Buku Podah aima podah na isuratkon raja Salomo na idasarhon hubani habotohon na humbani Naibata. Sanggah isukkun Naibata aha na sihol bereon-Ni, Salomo lang mangindo arta tapi hapentaron do. Bani ambilan on ipatugah adong dua na selalu kontras dalan na ipilih jolma bani goluhni aima rosuh atau pingkiranni sandiri ampa rosuh atau pingkiran ni Naibata (Psalmen 1). Dampak ni goluh ni sidea pe pasti do berbeda ; Halani aha na sosok manurut pingkiran lape tontu mamboan hadearon bahkan boi do gabe hasedaon, tapi na sadalan bani rosuh ni Naibata pasti do marbuahkon pasu-pasu ampa hadearon.

2. Halani ai isobut: Dalan ni parpintor songon sinalsal sogod-sogod do, lambin torang marsinondang paima tongah ari (18). Sinalsal aima gambaran malas ni uhur (Psalmen 17:15). Sonin ma goluh ni halak parpintor lambin torang marsinondang songon milas ni ari na lambin torang paima tongah ari. Goluh ni sidea torus do manuju hubani hadearon. Sebalikni dalan ni halak parjahat lotir do (19). Lotir mararti golap, seng ibotoh dalan partolsuan halani ukuran na sintong pitah rosuh ni dagingni. Sidea lang marpanimbangion manontuhon langkah age horjani sehingga tanpa isadari domma manuju hu hasedaon.

3. Domu hujin ipatugah ase jolma in porlu marhapentaron bani goluhni dengan cara:

a. Sirsir manangar ampa mamparimbagaskon podah na madear janah manimpan ai ibagas uhur (20-21). Hauhuron ningon torus iisi bani hata ni Tuhan. Hata ai lang pitah itangar tapi iparuhurhon. Lambin ibuka panangar bani hata ni Tuhan, maka hauhuron pe lambin torang do mandompakkon ragam ni na masa. Uhur aima pusat ni goluh ni jolma. Anggo domma torang uhur, torang ma homa langkah. Halani ai isobut do homa ai sebagai tambar bani haganup angkula (22). Ipahami bahwa anggo torang uhur, tubuh do semangat hidup na mamboan kesegaran age bani angkula. Sebalikni anggo kosong do hata ni Tuhan ibagas hauhuron, on ma mambaen urah mandolei, mabiar bani goluh janah mambobai jolma mardalan bani dalan hajahaton na manuju hasedaon. Halani ai hauhuron porlu ijaga atau irawat dengan cara mangisi ai bani hata ni Tuhan ase ulang pondok hauhuron. 

b. Manjaga dilah atau sahap, mangambukkon ladung ampa hata na marputor-potor (24). Dilah (hata) boi do songon api na manutung tapi boi homa songon bah na mangintopi api. Sahap boi do paroh paringoran, tapi sahap do homa na boi paroh hadameion ampa malas ni uhur. Sahap ni parpintor ningon selalu marisi hasintongan, ulang legan uhur legan sahap. Parlobei idilat bibir ase marsahap halani hata na dob tarluar lang be bagianta ai janah lang tarulaki. Sahap ni parpintor maningon mamboan hadameion ampa malas ni uhur. 

c. Memiliki tekad na kuat dengan cara torus manlangkah hu lobei (25-27). Lang urah tergoda bani husip-husip na lang dear, lang urah terpancing emosi sehingga sontou mardalan. Bani buei rintangan ampa godaan-godaan na lang madear, parpintor selalu konsisten mardalan bani hasintongan. Ia lang ra tergoda halani tawaran kenikmatan dunia gabe itadingkon dalan hasintongan. Bani ganup keadaan ia selalu konsisten mardalan bani dalan hasintongan.

4. Refleksi

a. Ase boi das hubani sada ianan/tujuan porlu do mambotoh dalan laho hujai janah sirsir homa mardalan bani dalan ai. Anggo sihol hita jumpahan malas ni uhur ampa hadearon, domma ipasirsir Tuhan dalan hujai aima hata-Ni. Dalan ai lang boi pitah ibotoh tapi ningon idalani. Pori pe sipata dalan ai agak daoh bahkan mahol, ulang gabe soh hita janah ulang idalani hita use dalan na legan ase das hita hubani tujuan.

b. Bohali hita ma totap dirinta ampa keluarganta bani hata ni Tuhan. Tantangan bani zaman on buei tumang tawaran-tawaran na menarik mambahen lang tertarik use bani hata ni Tuhan. On ma ancaman na paling banggal terutama bani niombahta.

c. Porlu tongtong torang uhurta mandompakkon ganup na masa ase ulang tubuh biar ampa pandoleian mandompakkon ragam ni na masa. Carani aima porsaya bahwa manuju hubani hadearon do goluhni halak parpintor ai Naibata do na manjaga hita. Naibata lang ongga mansurahon na lang dear banta. Haotoon ni jolma in do na parseda goluhni. Hasedaon terjadi sedo halani na hurang gogoh tapi halani na salah mamakei gogohni do, sedo halani na lang ibere pingkiran tapi halani salah mamakei pingkiran do, sedo halani na lang ibere kesempatan tapi halani salah mamakei kesempatan na ibere Naibata do. 

d. Ulang ma pondok atau sompit paruhuron tapi totap ma marpanimbangion aha akibat ni horja ampa parsahapta. Ulang raus marsahap janah gumarapus manlangkah. 

e. Haleluya No. 387 : 1 – 2 

Read 570 times

Leave a comment

Make sure you enter all the required information, indicated by an asterisk (*). HTML code is not allowed.

Ambilan & Sibasaon

Go to top