2. Ipausih do horja marsibere-bere hubani sipartidah, na mantidahkon otik, otik do sabionni; na mantidahkon buei, buei do sabionni (ay.6). Anggo igambarhon hubani sipartidah (manabur bonih), mararti do ai sedo horja sisoya-soya goluh na ringgas marsibere-bere. Gambaran sipartidah ijon aima pataridahkon haporsayaon bahwa unjah do Naibata mamasu-masu halak na sirsir mambere pangurupion. Artini, horja marsibere-bere aima horja haporsayaon. Halani ai gambaran martidah lang imaksudhon bahwa motivasi marsibere-bere usih songon na martiga-tiga tapi pataridahkon keyakinan bahwa isarihon Naibata do bahkan ibere do marlobih-lobih pasu-pasu hubani halak na unjah marsibere-bere. Bahkan pasu-pasu ai lang sekedar secara pardagingon tapi dihut partonduyon sehingga ungkap uhur ni kuria bani haluahon na manongtong dob ipasirsir Tuhan Jesus. Artini, lang porlu ipingkirhon sonaha hasil sijaloonni use tapi yakin janah porsaya bahwa isarihon Tuhan in do tongtong goluh ni sidea. Halani ai uhur holong do na mendasari horja marsibere-bere. Halani ai lang ihorjahon ai laho pagijang-gijang diri atau humbani na tarpaksa atau borat ni uhur tapi humbani malas ni uhur do (ay.7). Jadi malas ni uhur sedo anggo pitah jumpahan pasu-pasu tapi malas homa uhurni anggo boi gabe pasu-pasu goluhni hubani na legan. 

3. Horja marsibere-bere dihut berisi pengakuan bahwa haganup na adong bani pitah sibere-bere ni Naibata do. Atau, horja marsibere-bere sekaligus menyatahon pengakuan bani holong ni Naibata na dob ijalohon do. Hatahonon ma, na lang sirsir mangidopi halak na na masombuh sarupa do ai hubani sikap penyangkalan bani Naibata, na menganggap bahwa aha na adong bani pitah halani gogohni sandiri. Halani ai pasu-pasu na ijalohon ningon do mendorong ase marlobih-lobih homa bani sagala horja na madear (ay.8). Halani horja na madear do ai gabe tubuh ma pemahaman bahwa sedo sisoya-soya horja mangkaholongi (ay.9). On ma mendorong ase hampung uhurni berbagi atau marsibere-bere tarlobih hubani halak na masombuh. 

4. Selanjutni makna marholong atau mangurupi hasoman aima homa dalan pasangapkon goran ni Naibata ampa martarimakasih hubani Naibata (ay.11-12). Mase? Halani Naibata aima na sangat peduli janah na sari bani halak na miskin (ay.9, Pslm112:9). Halani ai horja mangurupi aima kesempatan mangkorjahon harosuh ni Naibata. Ase lape sintong parugamaon anggo tartutup ope uhurni mangurupi hasomanni tarlobih na marhahurangan. Halani bagian ni na martarimakasih hubani Naibata do horja mangurupi atau mangidopi hasoman, maka semakin ijalohon pasu-pasu humbani Naibata, na marubah bani dirini sedo sekedar gaya hidup tapi na utama gabe lambin unjah do homa marsibere-bere. Lang boi ipisahkon relasi vertikal (relasi hubani Naibata) humbani relasi horizontal (relasi antar sesama). Hubungan na dear hubani Naibata menyatu hubani sikap kepedulian terhadap sesama.

5. Horja panumpakion sekaligus do ai dalan mendorong halak na legan lambin mananda Naibata, ase halak na legan pe dihut homa mamuji Naibata (ay.13). Ase horja pangidopion sekaligus do ai horja marsaksi, manaksihon Tuhan na isombah ampa ipuji kuria in. Humbani sikap kepedulian ni kuria gabe marsangap homa goran ni Naibata bani halak na legan. Bahkan surung do homa pasu-pasu ijalohon jolma na unjah marsibere-bere halani itonggohon halak na legan homa ia (ay.14). Ase marhitei horja pangidopion, na mangidopi ampa na manjalo pangidopion gabe riap mamuji pakon pasangapkon goran ni Naibata.

6. Refleksi

a. Malas ni uhur ma banta anggo ibere Naibata ope panorang banta gabe pasu-pasu bani na legan halani ijai do hita domma dihut manaksihon goran ni Naibata bani dunia on. Lang adong ukuran ni na sungkup sobali sirsir hita mantarimakasihkon aha pe na adong banta. Marhitei na sonai ma hita  lambin unjah mangurupi hasomanta.

b. Halani sedo na soya horja mangurupi, lambin haringgaskon hita ma horja ai sanggah ibere ope panorang banta. Horjahon hita ma ai ibagas pongkut ampa malas ni uhur.

c. Marsibere-bere lang pitah secara materi, tapi aha pe pasu-pasu ni Tuhan na ijalo hita sihol ma ai ipakeihon hita bahen hadearonta ampa hasomanta. Marhitei na sonin ma sintong parugamaonta janah domma dihut hita bani horja ni Tuhan i dunia on.

d. Haleluya No. 348 : 1 – 3