Print this page

SEDO ISE HITA, TAPI ISE TUHAN DO! (Sibasaon 07 Oktober 2018 2 Musa 4 : 10 – 17 )

SEDO ISE HITA, TAPI ISE TUHAN DO!

Sibasaon 07 Oktober 2018

2 Musa 4 : 10 – 17  

1. Musa aima na terluput humbani pamunuhon ni raja Parao sanggah iparentahkon Parao mamunuh haganup anak dalahi na tubuh humbani halak Israel. Suruhan on idasari humbani niat ni Parao laho mamboiskon haganup keturunan ni halak Israel. Bahkan Parao mambahen halak Israel gabe jabolon ni halak Masir.   Halani kuasa ni Naibata justru Musa mandapot kesempatan marbanggal i istana ni Parao marhitei na iangkat boru ni Parao si Musa gabe anakni. Pori pe Musa marianan i istana, ternyata rasa kepedulianni bani bangsa Israel lang moru. Sanggah iidah halak Masir bersikap tidak adil hubani hasomanni sabangsa gabe ibunuh do halak Masir ai. Akibatni melarikan diri do ia hun istana halani mabiar bani Parao dob ibunuhni halak Masir ai. Sanggah berstatus sebagai pelarian / buronan, sanggah sonai ma Naibata marsuruh si Musa untuk mulak use ia hu Masir tapi dengan sebuah misi mangarahkon halak Israel luar hun parjabolonan Masir ampa mangindo hubani Parao ase ipalopas halak Israel borhat hun Masir. Suruhan on gabe sada bukti bahwa Naaibata totap do mardingat padan-Ni hubani Abraham, ompung ni halak Israel, bahwa ginomparni gabe sada bangsa na banggal janah pataridahkon sifat ni Naibata na sangat peduli hubani halak na hona odoh-odoh. Ambilan on aima parsahapan ni Naibata pakon Musa bani na sihol iutus ia paluahkon halak Israel hun Masir.

2. Sadar do si Musa bahwa tugas na ibere Naibata hubani mangarahkon halak Israel hun Masir sedo horja na urah ; Halani sobali manghadap raja Parao, lape tontu homa porsaya janah itangihon halak Israel ia bani tugas ai. Pori pe ia marbanggal i istana ni Parao, isadari do bahwa gok ibagas keterbatasan do ia. Halani ai nini: ‘Ham Tuhanku, seng halak parsahap-sahap ahu, …, ai borat do pamanganku pakon dilahku’ (ay.10), Hunjon gabe tangkas ma banta bahwa Naibata marsuruh Musa sedo halani ia sahalak na sempurna tapi ibagas ketidak-sempurnaan ni Musa ai do Naibata sihol patalarhon kuasa-Ni. Ihatahon Naibata do ‘On pe, laho ma ho, Ahu pe mangkasomani pamanganmu anjaha mangajari ho atap aha sihatahononmu’ (ay.12). Hata ‘On pe, laho ma ho’, sihol mangajarhon bahwa na parlobei ipindo Naibata bani Musa (suruhan-Ni) aima hasirsiron marhorja do. Mase? Halani Naibata lang pitah marsuruh tapi na memperlengkapi do homa. Tapi selanjutni ibalosi Musa: ‘Ham Tuhan, suruh Ham ma atap ise na legan’ (ay.13). Manangar ai manringis do Johowa hubani si Musa. Mase? Halani Musa totap ope berorientasi bani gogohni bani horja ai, lape berorientasi bani kuasa ni Naibata na marhorja bani dirini. Pribadi na sonon ma na gati tubuh age bani buei jolma sehingga gati mabiar janah marsidalian bani horja na ipaondos Naibata. Tapi ipatoguh Naibata do use uhur ni si Musa marhitei na marsuruh si Aron mangkasomanisi bani horja ai. Nini Naibata: ‘Huhasomani pe pamanganmu ampa pamanganni anjaha Huajari pe hanima atap aha sibahenon nima. Ia pe gantihmu marsahap hubani bangsa ai’ (ay.15-16). Hunjon gabe tangkas ma banta bahwa iharosuhkon Naibata do horja na marsiurupan. Hahurangan ni na sada iisi/ilengkapi na legan. Perbedaan sibere-bere bani masing-masing lang gabe saling melemahkan tapi ase bersinergi do. Masing-masing ningon berperan lang boi pitah penonton. Iporluhon pembagian tugas domu hubani talenta ni masing-masing. Hal on boi terjadi anggo masing-masing menyadari bahwa haganup na adong marsumber humbani Naibata do janah ningon igunahon bani horja atau suruhan ni Naibata.

3. Isuruh Naibata do homa Musa mamboan tungkotni na somal ipakei marmahan gabe parhiteianni mambahen sagala tanda (ay.17). Naibata sirsir mamakei sarana na adong bani Musa laho patalarhon kuasa-Ni. Sarana atau alat na sederhana anggo marhasoman kuasa ni Naibata banggal do pangkorhonni. Na ipangindo bani Musa ase sirsir mambere uhur, gogoh, panorang ampa sarana/alat na adong untuk ipakei Tuhan. Naibata sihol patalarhon kuasa-Ni marhitei haganup na adong bani Musa.

4. Refleksi

a. Lang ongga lupa Naibata bani padan ampa hata-Ni laho paluahkon hita na porsaya. Domma ipatalar ai marhitei Tuhan Jesus na dob paluahkon hita humbaani gomgoman ni dosa ampa hamateian.

b. Sirsir ma hita ipakei Naibata bani horja-Ni ase gabe utusan ni Naibata ma hita mamboan haluahon hubani dunia on songon si Musa na iutus mamboan haluahon hubani halak Israel.

c. Haganup do hita kuria idilo janah iutus Naibata ase dihut gabe siparugas bani horja-Ni. Ulang ma marsidalian halani ganup keterbatasan na adong banta bei. Na ipindo hubanta aima hasirsiron ipakei Tuhan. Dasar bani horja ai sedo: ise hita, tapi ise Tuhan do. Tuhan do na marhorja marhitei hita. 

d. Sirsir ma homa marsiurupan bani horja ni Tuhan, ulang gabe juri na pitah mangidah-idah hahurangan ni hasoman atau gabe penonton na lang sirsir marpambahenan.

e. Haleluya No. 375 : 1, 3, 4.    

Read 1420 times

Last modified on Wednesday, 26/09/2018