ISARIHON NAIBATA DO JOLMA PARPINTOR (Ambilan 30 September 2018 1 Musa 39 : 1 – 10)

ISARIHON NAIBATA DO JOLMA PARPINTOR

Ambilan 30 September 2018

1 Musa 39 : 1 – 10 

1. Kisah ni si Josep na ijual saninani hubani kafilah ni halak Ismael, selanjutni ijual do use ia hubani si Potipar pegawai raja Parao i Masir. Sada kisah na tragis, Josep lang be iperlakuhon sebagai jolma tapi domma usih hubani barang dagangan. Bani situasi na sonin ternyata ihasomani Naibata do si Josep mambahen manjadi haganup na hinorjahonni (ay.2-3). Bahkan jumpahan idop ni uhur do ia i lobei ni tuanni halani marhitei si Josep ipasu-pasu Jahowa do ganup na adong bani si Potipar (ay.4-5). Dob mangidah haganupan ai gabe iangkat si Potipar do si Josep haondosan ni haganup artani (ay.6). Ketika jolma bahkan saninani lang mangkargahon si Josep tapi Naibata totap do mansarihonsi. Ketika Josep ianggap saninani lang berarti sehingga iondoskon hubani halak Ismael, tapi halani ihasomani Naibata do ia, Josep sangat berarti bahkan boi parohkon pasu-pasu bani Potipar. Ketika saninani mansurahon na jahat bani si Josep tapi Naibata mansurahon na madear do. Bani haganupan ai ternyata sura-sura ni Naibata do na saud bani si Josep sedo sura-sura ni jolma. Ternyata Naibata sangat peduli hubani jolma na galek / na lang berdaya na iperlakuhon tidak adil. Naibata do membela perkara ni halak na galek ampa parpintor. Pori pe bani mungkahni sura-sura hajahaton songon na berhasil do mengorbanhon halak parpintor tapi bani ujungni talar do bahwa na ihasomani Naibata do parpintor in. Sura-sura hajahaton ni jolma lang mangasi bani halak parpintor.

2. Josep na ihasomani Naibata mambahen jumpahan pasu-pasu do homa si Potipar halak Masir ai marhitei horja ni si Josep. Josep lang manolsoli aha na masa bani tapi marugas atau marhorja do ia satolap na boi ihorjahonni. Josep na galek tapi halani ihasomani Naibata gabe mambuahkon pasu-pasu na buei do horjani tanganni. Sedo halani gogoh ni tangan ase jumpahan pasu-pasu tapi pasu-pasu na buei tergantung hubani tangan na ihasomani Naibata do. Kehadiran ni Josep mamboan malas ni uhur ampa pasu-pasu bani Potipar sehingga ia iangkat jadi haondosan ni artani. Kehadiran ni halak parpintor ningon do mamboan hadearon bani halak na legan. Marhitei buah ni horja ni si Josep, Potipar mangaku bahwa na ihasomani Naibata do si Josep. Kehadiran ni Josep gabe hasaksian pasal kuasa ni Naibata age bani Potipar. Josep ihargai i rumah ni Potipar sedo halani na mambuat-buat uhur ni Potipar, sedo homa halani iirikkon sisombahon ni si Potipar tapi halani totap do ia marhabiaran bani Naibata. Josep totap balosan hubani Naibata age marianan i tongah-tongah ni halak asing.

3. Keberhasilan ni Josep i rumah ni Potipar sonai age halani jenges ni rupa pakon bohini (ay.6) mambahen tubuh uhur ni parinangon ni Potipar ase modom ia rapkonsi. Tawaran na secara kemauan daging tentu sangat menarik, tapi ijon pe Josep lang terlena. Ukuran na ipakei Josep manontuhon sikap sedo ukuran kenikmatan daging tapi hata ni Naibata do (ay.9). Ia mampu manaluhon hisap ni angkula halani marhabiaran bani Naibata. Ia lang terlena gabe madabuh hubani dosa halani keberhasilan ampa jenges ni rupa. Josep totap do marhabiaran bani Naibata age tikki tarjual sonai age dob berhasil. Josep lang madabuh hubagas dosa dob manjalo pasu-pasu ni Naibata.

4. Refleksi

a. Bani goluh on gati do halak na galek gabe korban ketidak-adilan songon pengalaman ni Josep. Bani keadaan na sonin ulang putus asa halani adong do Naibata na setia membela ampa mangkasomani hita. Bani ujungni pasti do terbukti bahwa age marhitei hajahaton ni halak na legan pe boi do ai ipakei Naibata gabe dalan-Ni mamasu-masu hita. Hadearon ampa masa depanta sedo bergantung hubani  sikap ni jolma tapi bergantung hubani Naibata do.

b. Buei do tawaran na menarik aima rosuh ni dunia on na sihol menggoda hita ase manlembang humbani rosuh ni Naibata janah madabuh hubagas dosa. Totap ma hita mardalan bani rosuh ni Naibata janah mambahen rosuh ni Naibata gabe ukuran na madear. Anggo ipasu-pasu Naibata goluh ampa horjanta, ulang ma halani ai gabe isuhuni hita use hisap-hisap ni dagingta.

c. Sihol ma kehadiranta ija pe hita boi parohkon na madear ampa pasu-pasu homa hubani halak na legan, ulang gabe sipanggeori. Ase boi sonai aima anggo totap hita bani ganup horjanta mangajamhon Naibata janah sipambalosi hubani Naibata. 

d. Ulang ma hita mencari kehormatan dengan cara ikut arus zaman, KKN, pnl. Anggo totap do marhatengeran hubani Naibata bani ganup ianan ampa keadaan, bagei do cara ni Naibata laho mamasu-masu ampa mansarihon hita mambahen tunggung hita age ija pe.

e. Haleluya No. 453 : 1 – 3 

Read 361 times

Leave a comment

Make sure you enter all the required information, indicated by an asterisk (*). HTML code is not allowed.

Go to top