2. Domu hujin, haluahon ai sedo hape halani titah songon pangajaran ni halak Jahudi (ay.21). Paulus secara tandas patugahkon lang adong jolma na boi maluah halani mangkorjahon titah (ay.27). Age halak Israel, parlobei do sidea manjalo haluahon, maluah hun Masir baru pe ase ibere Naibata titah. Jadi haluahon ai lang adong hubunganni hubani titah. Titah ai marguna sebagai pedoman hidup sebagai bangsa na dob ipaluah, ase itanda janah ibotoh sidea aha do harosuh ni Naibata, ase ulang sarupa cara hidup ni sidea pakon dunia on. Jadi mandalankon titah sedo ase maluah tapi sebagai respon hidup ni halak na dob ipaluah do, sebagai ungkapan pamujion ampa tarimakasih hubani Naibata.

3. Anggo sonai sonaha do ase boi maluah? Haluahon ai aima sibere-bere atau idop ni uhur ni Naibata na ijalo jolma marhitei haporsayaon hubani Jesus Kristus (ay.22,24-26). Tuhan Jesus do hagogokni titah ampa hata ni nabi-nabi bani Padan Na Basaia. Pintor do Ia, lang martikas dosa Ia, ase marhiteihon-Si boi ipintori haganup na porsaya Bani (ay.26). Maluah marhitei haporsayaon mararti adong panandaion diri sebagai jolma pardosa janah roh ibagas toruh ni uhur mangarapkon idop ni uhur ni Naibata. Ia lang roh mangajamhon habujuron ampa hapintoranni tapi mangajamhon idop ni uhur ni Naibata do. Ase halak na toruh maruhur do halak na porsaya in, ia lang pabanggal-banggal dirini i lobei ni jolma ampa i lobei ni Naibata, tapi na sirsir pabanggalhon goran ni Naibata do. Itandai do dirini sebagai jolma pardosa na pitah boi maluah halani idop ni uhur ni Naibata. Halani ai ia lang mangunsagah bani gogohni ampa arta na adong i dunia on tapi mangakuhon bahwa haluahon na ipasirsir Tuhan Jesus ai do arta siharganan bani. Ijaga do uhur ampa pingkiranni ase totap marhatengeran bani Naibata i tongah-tongah ni na masa i dunia on. Idompakkon do totap uhur ampa goluhni hubani Naibata sadokah manggoluh i dunia on.

4. Idop ni uhur, mararti sibere-bere tanpa syarat. Ase lang adong kwalifikasi tertentu humbani jolma ase boi dihut manjalo haluahon ai. Halani idop ni uhur do haluahon ai, maka haluahon ai terbuka hubani haganup jolma. Haganup jolma iontang manjalo haluahon ai halak Jahudi age na lang Jahudi. Artini, lang be tarolat jolma in halani dosa ampa hagalekon masa lalu gabe lang boi parsimada bani haluahon ai asal ma sirsir ia porsaya. On ma mambahen boi marmalas ni uhur halak na porsaya in age pe buei ope paruntolon idompakkon i dunia on. Dunia on lang be ianggap sebagai na utama tapi na utama bani na porsaya aima haluahon na dob ipasirsir Tuhan Jesus do. Bahkan paruntolon lang be ianggap sebagai ancaman tapi sebagai kesempatan laho patoraskon haporsayaon do. Haporsayaonni totap bertumbuh bani bagei ni keadaan.

5. Refleksi

a. ‘Horahan i toruh ni sampuran’, aima sada limbaga na patugahkon keadaan na kontras. Sasintongni anggo domma i toruh ni sampuran (bah) lang be horahan. Hita sonari domma i toruh ni sampuran haluahon ai. Ulang ma liah hita, domma sirsir haluahon ai banta, jalo hita ma ibagas haporsayaon. Ulang halani lalap gap uhurta bani na i dunia on gabe lupa use hita manjalo arta siharganan ai.

b. Lang ietong Tuhan Jesus dosanta tapi sonaha pe keadaan masa lalunta sirsir do Ia manasap haganup dosanta janah paluahkon hita. Tontu talup ma hita martarimakasih hubani Tuhan marhitei goluhta na  tongtong pasangapkon goran-Ni.

c. Halani haganup hita boi maluah pitah halani idop ni uhur ni Naibata do, talup ma homa hita ibagas toruh ni uhur sirsir marsisasapan dosa sesama hita sebagai hataridahan ni pamujionta ampa tarimakasihta hubani Tuhan. Parholong do na porsaya in halani domma parlobei ijalo sidea holong na humbani Tuhan. Atap aha pe na boi ibahen hita na madear ulang ma ai gabe gijang ni uhur janah gabe dalanta paetekkon hasomanta halani lang tarbandingkon hita holong ni Naibata na dob paluahkon hita hubani aha pe horja na madear na boi ibahen hita.

d. Haleluya No. 142 : 1,2,4  atau No. 347 : 1 – 3