TUBUH PADUAHALIHON (Sibasaon 27 Mei 2018 Johanes 3 : 1 – 8)

*TUBUH PADUAHALIHON*

Oleh : Pdt. Jeddy Saragih

Sibasaon 27 Mei 2018

Johanes 3 : 1 – 8 

1. Nikodemus aima sahalak Farisi janah guru agama Yahudi. Sebagai guru agama janah na terpelajar, ipardiateihon do horja ampa pangajarion ni Tuhan Jesus na gok kuasa. Isimpulhon do ibagas uhurni bahwa hal na sonin boi terjadi pitah halani kuasa ni Naibata. Halani ai roh do ia manjumpahkon Tuhan Jesus borngin-borngin. Tujuanni sobali ase ulang terganggu marbual pakon Tuhan Jesus, sekaligus gabe pertemuan rahasia halani panorang ai umumni halak Parisei magigi do bani Tuhan Jesus. Isobut Nikodemus do Tuhan Jesus sebagai Rabbi. Rabbi artini Guru atau Tuan sebagai panggilan terhormat na somal ipakai bani guru-guru agama Jahudi. Hunjon Nikodemus memposisihon Tuhan Jesus sebagai tokoh na terhormat bahkan iakuhon ‘ibotoh hanami do Ham guru na roh humbani Naibata’. 

2. Bani kesempatan ai ma ipatugah Tuhan Jesus pasal haluahon bani Nikodemus, nini: ‘anggo seng tubuh halak paduahalihon, seng tarbahensi mangidah Harajaon ni Naibata’ (ay.3). Lang tararusi Nikodemus hata ai halani ia berfikir secara hajolmaon, ai lang mungkin sahalak na dob matua mulak use hupartapaan ni inangni ase itubuhkon use. Ipatorang Tuhan Jesus do arti ni tubuh paduahalihon, sedo secara fisik, tapi tubuh humbani bah pakon Tonduy do (ay.5). Sasintongni ganup jolma na tubuh hu dunia on tubuh do humbani daging na dob marbiak dosa sehingga domma manuju hu hamateian. Halani ai iporluhon tubuh paduahalihon, humbani bah pakon Tonduy ase boi use pansing jolma in i lobei ni Naibata. Bah patugahkon na boi paborsihkon. Domu hujin ma ase roh Tuhan Jesus hu dunia on laho papansingkon jolma na dob ibagas dosa, ase boi use jolma in tubuh paduahalihon. Ia do hansa na boi papansingkon jolma humbani dosa. Ibere do Tonduy-Ni bani jolma. Jolma na dob manjalo Tonduy ma na margogoh manadingkon atau pamateihon biak ni daging atau dosa ai. Halani aima ase jolma in porlu tubuh paduahalihon marhitei pandidion ibagas goran ni Naibata Bapa, Anak ampa Tonduy Na Pansing.

3. Selanjutni ipatorang Tuhan Jesus do use pasal Tonduy ai. Usih do ai hubani logou. Na marombus do logou, ibogei do pardongosni, tapi seng binotoh hunja rohni ampa huja lahouni (ay.8). Sonin ma horja ni Tonduy ai, memang lang tararusi secara pingkiran ni jolma tapi kuasa-Ni boi do iahapkon jolma in usih hubani logou na lang taridah tapi boi do iahapkon jolma in parombusni. Ase na iporluhon bani na tubuh paduahalihon aima porsaya. Usih hubani logou ai, pori pe lang boi iidah mata tapi yakin do jolma bahwa adong do logou. Sonin ma Tonduy ai hadir janah markuasa bani diri ni na porsaya, pori pe lang boi iidah mata tapi boi do iahapkon sidea kuasa-Ni. Tonduy ai mambahen jolma porsaya bahwa parholong do Naibata na sirsir papansingkon sidea humbani haganup dosa. 

4. Tonduy ni Naibata do na marhorja ibagas uhur ni jolma na dob tubuh paduahalihon. Tonduy ai do na menggerakkon sidea gabe boi marparlahou domu hubani rosuh-Ni. Artini, jolma na dob tubuh padua- halihon, goluhni lang be saguru bani daging atau rosuh ni dunia on tapi domma saguru hubani pambobai ni Tonduy ai. Marhitei na sonin malas ni uhur bani na porsaya aima mangkagoluhkon hapansingon marhitei na totap mardalan bani hata- ni Naibata. 

5. Refleksi

a. Lang adong jolma na talup i lobei ni Naibata anggo humbani diri ni jolma in. Pitah idop ni uhur ni Naibata do mambahen talup use hita Bani. Ibere do Tonduy-Ni mangajari hita pasal holong-Ni ai. Jolma na sirsir iajari Tonduy pasti do sirsir martarimakasih bani Naibata, mantarimakasihkon haluahon ai.

b. Domma ipabayu Tuhan Jesus goluhta humbani habutakon ni dosa gabe jolma na pansing. Mubah ma homa cara berfikirta, pangabak age parlahounta gabe bayu. Tadingkon hita ma haganup biak-biak hasaparion aima dosa halani domma imerdekahon hita humbani biak ni dosa ai. Gogohta laho manadingkon biak hasaparion ai aima Tonduy ni Naibata. Ulang be marsidalian gabe lang margoluh ibagas hapansingon halani domma ai biakta sonari. Usih songon omas na lang ra luntur, sonai ma pataridahkon hita biak hapansingon ai na lang mubah-ubah ibahen na masa. 

c. Sihol ma isadari hita bahwa hita domma iangkat gabe anak ni Naibata halani domma ipaluah hita. Harga tumang do hita i lobei ni Naibata. Ulang ma etek uhurta halani bagei ni na hurang ope i tanoh on atau mungkin halani lang haganup jolma memperhitungkon ampa menghargai hita. Sada hal na pasti, harga tumang do hita i lobei ni Naibata. On ma na mendorong hita totap marmalas ni uhur bani ganup na masa janah marharinggason mandalankon hata ni Naibata.

d. Haleluya No. 392 : 1 – 2    

 

Read 190 times

Last modified on Thursday, 17/05/2018

Leave a comment

Make sure you enter all the required information, indicated by an asterisk (*). HTML code is not allowed.

Go to top