TUHAN JESUS, AIMA BUKTI HOLONG NI NAIBATA BANTA (Ambilan 10 Mei 2018 - Parnaik ni Tuhan Jesus - Heber 1 : 5 – 13)

TUHAN JESUS, AIMA BUKTI HOLONG NI NAIBATA BANTA

Ambilan 10 Mei 2018 (Parnaik ni Tuhan Jesus)

Heber 1 : 5 – 13

1. Alamat ni surat Heber aima halak Kristen na marasal humbani halak Jahudi. Sebagai na berlatar belakang Jahudi, domma itanda janah ibotoh sidea hinan pasal horja ampa habanggalon ni raja, nabi-nabi ampa kuasa ni malekat bani Padan Na Basaia. Umumni sidea on sangat menghormati janah mengidolakan nabi-nabi ampa malekat sebagai utusan ni Naibata. Domu hujin ma panurat Heber menegashon bahwa banggalan janah sangapan do Tuhan Jesus marimbang nabi-nabi ampa malekat. Sedo maksudni ase ulang porsaya sidea bani hata ni nabi-nabi ampa malekat tapi sihol patugahkon bahwa aha na dob ipadas nabi-nabi hinan hubani halak Israel, domma igoki / digenapi haganupan ai ibagas Tuhan Jesus. Tujuanni ase ulang mulak sidea hubani goluh parugamaon na lama mangirikkon hasoman ni sidea sabangsa na lape porsaya tapi ase lambin toguh ma manjalo janah mangkaporsayai Tuhan Jesus sebagai Mesias atau Sipaluah.

2. Domu hujin ipatugah do hata ni Naibata na ipadas nabi-nabi na manaksihon pasal Tuhan Jesus. 

  • ‘Ahu do gabe Bapa Bani, anjaha Ia anak Bangku’ (patugahkon hasadaon ni Anak pakon Bapa)
  • ‘Maningon do manrogop hu lobei-Ni sagala malekat ni Naibata’ (malekat pe marsombah / manrogop do hubani Tuhan Jesus)
  • ‘Ronsi sadokah ni dokahni do paratas-Mu, Ham Naibata, tungkot hapintoron do tungkot ni harajaon-Mu, … halani ai do ase iminakkon Naibata-Mu, minak malas ni uhur Bamu, Ham Naibata, lobih humbani hasoman-Mu’ (Tuhan Jesus aima na iminaki/iurapi Naibata gabe Raja i dunia on age i nagori atas)
  • ‘Ham do, ale Tuhan, na pajonam tanoh on bani mulani’ (Tuhan Jesus lang na itompa tapi Sipanompa tanoh on do)
  • ‘Magou do ganupan in use, tapi totap do anggo Ham’ (kuasa ni Tuhan Jesus kekal)
  • ‘Hundul ma Ho hu siamunkon, paima Hubahen munsuhmin sidogei-dogeian ni nahei-Mu’ (Tuhan Jesus domma naik hu nagori atas hu siamun ni Naibata).

3. Humbani pernyataan ni Naibata pasal Tuhan Jesus in gabe takkas ma bahwa Tuhan Jesus aima Anak ni Naibata, Mesias janah Sipaluah na manrajai rap pakon Naibata Bapa. Gok bani kuasa-Ni do haganup na i tanoh on ampa na i nagori atas. Ia do Tuhan na dob naik hu nagori atas. Harajaonni kekal janah gok ibagas hapintoron, gok bani kuasa-Ni do haganup janah munsuh-Ni maningon do talu janah gabe sidogei-dogeion ni nahei-Ni. Ise na setia manjalo janah mangkaporsayai-Si, sidea ma na dihut panean bani harajaon ampa hasangapon-Ni ai.

4. Refleksi

a. Memposisihon Tuhan Jesus sebagai Raja ampa Sipaluah merupakan ciri ni halak na porsaya. Ulang ma sangapan ibahen hita dirinta atau jolma janah atap aha pe na adong i dunia on marimbang Tuhan Jesus, halani haganup na i dunia on na tinompa do ai.

b. Domma italuhon Tuhan Jesus haganup munsuhta aima sibolis pakon dosa. Halani ai pori pe bagei akal-akal ni sibolis laho parseda goluhta, ulang ma hita tergoda. Ulang tergoda bani sibolis halani jeenges ni rupa, arta pakon kuasa na legan na adong i dunia on.

c. Hapintoron do harajaon ni Tuhan Jesus. Halani ai do ase ipintori hita marhitei na ibere diri-Ni gabe galangan pardameianta pakon Naibata ase gabe pintor hita i lobei ni Naibata. Halani ai totap ma jolom janah hagoluhkon hita hapintoron na dob ibere Tuhan Jesus ai marhitei na isimbili hita sagala horja hajahaton pakon dosa.

d. Nuan manggoluh ope hita i dunia on. Tapi na laho salpu do ganup dunia on pakon isini. Malas ni uhurta aima halani domma ipasirsir Tuhan Jesus rumah kekal banta i nagori atas rap pakon Bapa. Na porsaya bani Tuhan Jesus sebagai Mesias Sipaluah sidea ma homa na dihut gabe panean bani harajaon-Ni ampa parsimada bani hagoluhan na sadokah ni dokahni ai. On ma patoguh uhurta ase totap setia mangirikkon janah mambalosi Tuhan Jesus sanggah panorang ni goluhta i dunia on. Pori pe sipata ialami hita ope pergumulan i tanoh on,  ulang ma halani ai gabe galek haporsayaonta.

e. Haleluya No. 72 : 1 – 2   

Read 312 times

Leave a comment

Make sure you enter all the required information, indicated by an asterisk (*). HTML code is not allowed.

Go to top