a. Bani pengalaman hidupni, isadari do na galek janah gati do ia madabuh hubagas dosa, tapi sirsir do Naibata manasap panlanggaronni (ay.8). Keadilan ni Naibata sedo songon panguhum na i dunia on na mandabuh uhuman domu hubani hasalahan bahkan mambuat hauntungan humbani halak na legan. Keadilan ni Naibata aima pengampunan. Nanget do Ia manringis, sabar do Ia paimahon hamubahon ni uhur ni jolma in. Ia aima Naibata na sirsir manasap dosa ni jolma, paluahkon jolma pardosa.

b. Isadari Daud do homa anggo humbani ukuran hapentaron ampa habujuronni, lang namin talup ia manjalo hasangapon ampa pasu-pasu na humbani Naibata, hape bani kenyataanni, layak do Naibata mamasu-masu goluhni. Isadari bahwa Naibata aima Naibata parholong ampa paridop ni uhur.

c. Ambahni ai isadari do homa bahwa gati do terancam hosahni humbani munsuhni na gogohan humbani. Tapi bani kondisi na sonin pe itatang janah ipajongjong Naibata do ia (ay.14). Artini, iakuhon bahwa gogohan do Naibata marimbang haganup siparkuasa na adong i tanoh on. Gok bani kuasa-Ni do haganup na tinompa in janah lang adong na boi mangolati horja ni Naibata.

d. Selanjutni iakuhon do bahwa kuasa ni Naibata lang ibatasi panorang songon goluh ni jolma na terbatas bani panorang. Ia aima Naibata na markuasa ronsi sadokah ni dokahni janah panggomgomion-Ni marsundut-sundut, meliputi haganup generasi (ay.13). Ikuhon par-psalmen bahwa holong ni Naibata lang pitah terbatas hubani dirini, tapi dihut do hubani keturunan ampa ginomparni marsundut-sundut. 

2. Domu hujin irespon Daud do kuasa ampa pambahenan ni Naibata, nini: ‘Ham do ipuji sagala jadi-jadian-Mu, ale Jahowa, anjaha hinaholongan-Mu do pasangapkon Ham’ (ay.10). Daud lang pitah menikmati holong ni Naibata tapi holong ai dihut membentuk pribadini gabe jolma na sirsir mamuji ampa pasangapkon Naibata. Ijin iahapkon holong ni Naibata, lambin ipabanggal do homa goran ni Naibata. Ia lang madabuh hubani sifat na pabanggal-banggal diri tapi lambin ipatoruh do uhur ampa dirini i lobei ni Naibata. Haporsayaonni hubani Naibata bertumbuh seiring hubani holong ni Naibata na ijaloni. Lang homa madabuh ia hubani na mar-naibatahon dunia on halani ibotoh do bahwa Naibata do sitompa janah simada haganupan ai. Ipataridahkon do homa pamujionni ai marhitei na mambaritahon atau manaksihon goran ni Naibata hu sab tanoh on (ay.12). Goluhni pe gabe goluh na marsaksi. Haporsayaon bani Naibata ternyata lang statis tapi dinamis, hata pakon goluhni pasti do pasangapkon Naibata na berdampak kesaksian hubani halak na legan. Haporsayaon ai pasti do membentuk jati diri na baru na boi iidah halak na legan. Haporsayaon ai lang pitah isobut-sobut tapi ipataridahkon do homa bani goluh.  

3. Refleksi

a. Uhur na martarimakasih ampa mamuji Naibata merupakan bukti iman na bertumbuh. Ulang pitah asyik menikmati berkat-berkat Tuhan tapi lupa martarimakasih hubani Naibata.

b. Ibagas keterbatasan ampa hagalekonta do ipatalar Naibata holong-Ni hubanta. Galek do hita humbani gogoh age parlahou pe. Sipardosa do hita i lobei ni Naibata. Tapi justru ibagas hagalekonta ai ma hita porlu lambin marondos hubani Naibata. Ulang ma halani hagalekonta gabe tubuh uhur biar ampa ungut-ungut halani biar pakon ungut-ungut aima tandani na lape porsaya hita hubani kuasa ampa holong ni Naibata.

c. Naibata do sipabanggalon ampa sipasangaponta bani goluhta sedo dirinta halani Naibata do na mansarihon ampa sumber ni haganup na adong banta. Ulang ma homa gabe lingot uhur ampa panonggorta hubani Naibata ibahen na adong i dunia on.

d. Goluhta on memang selalu ibagas proses, janah bani proses ai gati do idompakkon hita bagei ni masalah ampa pergumulan songon pengalaman ni Daud. Halani ai ulang urah-urahtu hita mambahen kesimpulan pasal atap  aha pe halani na borit na iahapkon hita pe boi do ai ipakei Naibata gabe dalan-Ni laho mangondoskon malas ni uhur banta asal ma totap hita toguh marhaporsayaon hu-Bani.

e. Puji hita ma Naibata janah gabe saksi-Ni ma hita tongtong.

f. Haleluya 306 : 1 – 2