2. Halani na sihol itadingkon ma susian-Ni, ipadas do tonggo-Ni hubani Bapa pasal susian-Ni. Tuhan Jesus lang manadingkon susian-Ni sonin-sonin tumang, tapi iondoskon do sidea ase totap ijaga, iramotkon Bapa (ay.11,15). Mase porlu iramotkon?

a. Halani marianan ope susian i dunia on i tongah-tongah ni buei jolma parjahat, janah sogam do uhur ni dunia on mangidah sidea halani goluh ni sidea lang be sarupa pakon dunia on (ay.14-15). Panramotion ni Naibata sangat porlu ase mampu setia ibagas haporsayaon pori pe itulak dunia on bahkan manaron halani hajahaton ni dunia on. Panramotion ni Naibata do menjamin ase margogoh susian manlawan haganup horja hajahaton ni dunia on. Gogoh on ma mambahen susian mampu setia mangirikkon Tuhan pori pe bani kenyataan gati sidea iparburu, iarsik bahkan gabe mati martir. Paradigma hidup ni susian lang be berorientasi duniawi na mengutamahon kenyamanan dunia tapi domma berorientasi sorgawi, artini: goluh ni sidea lang be mangutamahon rosuh ni parduniaon tapi domma mangutamahon rosuh ni Tuhan, halani ai pasti do ihagigihon dunia on sidea. Gogoh ai porlu ase margogoh janah totap setia ibagas haporsayaon bahkan mampu marmalas ni uhur (ay.13) pori pe gati mandompakkon tantangan atau penolakan na roh hun dunia on.

b. Halani adong tugas na iondoskon hubani susian aima manaksihon hata haluahon bani dunia on (ay.18). Ambilan Na Madear maningon do ipadas hu sab tanoh on (Mat.28:19-20). On ma alasanni ase lang mintor iboan Tuhan Jesus sidea rap pakon-Si mulak hubani Bapa. On ma sasintongni tugas na paling sangap halani horja ai berdampak hubani kehidupan na kekal lang pitah hubani susian tapi dihut hubani na ra manjalo Ambilan Na Madear ai. Ase porlu  totap irenungkon, mase ibere Tuhan ope kesempatan banta manggoluh? Balosni, ase goluhta gabe goluh na marsaksi. Na porsaya lang pitah manggoluh sonin-sonin tumang tapi ase goluhni gabe hasaksian homa hubani dunia on baik marhitei sitarononni age marhitei malas ni uhurni. Haluahon ai lang untuk isimpan-simpan untuk dirini tapi ningon ibaritahon do homa. Lang homa boi marsidalian atap halani aha pe (mis. sitaronon, umur na lanjut, pnl.) gabe terbebas humbani tugas on halani domma ipasirsir gogoh marhitei tonggo pangapition ni Jesus laho mampargogohi susian in laho marsaksi. 

c. Ase susian margogoh manjaga hapansingon halani domma ipapansing Tuhan Jesus sidea (ay.19). Manjaga uhur pakon goluh na marhapansingon aima sada hal na sangat porlu. Ulang pitah asik manjaga arta na i dunia on tapi lupa manjaga uhur ampa goluh na marhapansingon. Cara manjaga aima marhitei na ra manjalo gogoh na humbani Bapa, manjalo Tonduy-Ni marhorja ibagas uhur. Anggo domma terjaga uhur pakon pingkiran, ijai do homa terjaga goluh na marhapansingon pori pe aha na masa. Sebalikni anggo lang be Tonduy na marhorja ibagas uhur, ijai ma urah madabuh hubani habutakon ampa dosa.

3. Bahan Diskusi

a. Anggo isobut Tuhan Jesus bani ay.14, bahwa susian seng hun dunia on songon Ia na seng hun dunia on, manurut pangamatanta bani kurianta, na ija do ope gatinan lobih taridah bani goluh ni kuria in, biak-biak ni dunia on do atau domma biak-biak sorgawi? Atau: Domma takkas taridah perbedaan sikap hidup ni halak na porsaya (kuria) ibandingkon hubani halak na lape porsaya? 

b. Manurut hita, mase gati ope kuria in mabiar manaksihon haporsayaonni hubani dunia on sementara ai do sasintongni tugas utama na iondoskon Tuhan hubani sidea?

c. Aha do kira-kira na boi ibahen lansia gabe hasaksian atau pangajaran hubani kuria, niombah age pahompu bahwa na tongtong do iramoti janah ijaga Tuhan in hita bani ganup na masa domu hubani tonggo pangapition ni Tuhan Jesus on?     

pdt.jeddy s