2. Tapi domu bani pemahaman on ternyata adong do pangarusion na lepak bani kuria na marpandapot bahwa anggo domma ipapansing/ipaluah Tuhan Jesus, lang porlu be jolma in mangkorjahon na madear, atau  bebas ma jolma in mangkorjahon dosa. Domu hujin oleh Paulus paingatkon bahwa perobahan ai lang pitah secara status tapi dihut do homa perobahan hati atau sifat. Halak na dob ipapansing, maka sifat ampa karakter ni pe dihut do iubah gabe na baru, gabe na mangusihi Kristus. Halani ai secara tandas ipaingat: “Nunutonta ma mardosa ase tambah idop ni uhur? Seng sonai, na dob matei bani dosa in, sonaha tarbahen hita be manggoluh ibagas in?” (ay1-2). Maksudni, marhitei parmatei ni Kristus maka biak ni dosa ai pe dihut do imateihon sehingga lang dosa be na manrajai goluh ni na porsaya. Domu hujin, halak na dob ipapansing lang mungkin be manggoluh ibagas biak pardosaon. Lobih tandas isobut, na porsaya in domma sangkabona pakon Kristus (ay.5). Sangkabona maksudni: biak ni na porsaya domma iubah gabe biak na pansing songon Kristus.

3. Lobih tangkas isobut ‘Na dob tartanom do hita rap pakon-Si marhitei pandidion in, ase songon Kristus Jesus, na dob pinapuho humbani na matei marhitei hasangapon ni Bapa-Ni, sonai ma hita mardalan ibagas goluh na baru’ (ay.4). Rap matei pakon Kristus maksudni, biak hadosaon na adong bani jolma in pe domma dihut matei halani domma rap matei sidea pakon Kristus. Songon Kristus na dob puho humbani na matei sonai ma homa na porsaya in domma margoluh na baru. Sidea domma tubuh padua-halihon, itubuhkon use ibagas hapansingon ibagas goran ni Kristus. Hata na legan, hita tubuh hu dunia on ibagas pardagingon ampa dosa, tapi nuan domma tubuh paduahalihon ibagas hapansingon marhitei Kristus. Biak ni dosa na manrajai hita sadokah on domma ihancurhon bani silang ni Kristus. Na porsaya domma ibebaskon humbani kuasa pakon biak ni dosa ai sehingga lang be irajai dosa. On ma na isobut goluh na baru.

4. Domu hubani pangarusion na sonin, itandaskon Paulus do ase kuria in ulang be mulak hubani dosa marhitei na mansuhuni hisap-hisap ni daging.  Songon Kristus dob puho humbani na matei janah seng irajai hamateian in be Ia (ay.9), sonai ma na porsaya in ulang be mulak use gabe irajai dosa. Na manrajai goluh ni sidea lang be dosa halani domma italuhon janah ipamatei dosa ai marhitei Kristus, tapi domma manggoluh bani Naibata marhitei parmatei ampa parpuho ni Tuhan Jesus (ay.4,11).

5. Domu hubani ambilan on boi ibuat hita piga-piga rimpun aima:

a. Manggoluh janah marianan ope na porsaya i dunia on tapi lang be dunia on na manrajai goluhta tapi domma Tuhan halani domma itobus hita humbani kuasa ni dunia ampa dosa. Halani ai ulang ma kahou atau lepak mamilih dalan sidalananta marhitei na tanginan use hita bani sora ni dunia on ampa dosa. 

b. Hakristenonta menyatu do hubani sikap hidup na marhapansingon. Lang talup pitah isobut hita halak Kristen tapi ningon ipataridahkon hita do homa goluh hakristenonta ai marhitei na totap ipamatei hita sagala biak ni dosa. Mase? Halani haluahon na ipaondos Tuhan hubanta dihut do mambere gogoh banta laho manaluhon sagala biak ni dosa ai songon Tuhan Jesus na dob manaluhon hamateian pakon dosa. domma ipasirsir gogohta mangkagoluhkon hapansingon ai marhitei na ibere Tonduy Napansing. Jolma na sai rosuh mangkorjahon dosa ampa habutakon aima tandani na lape ibere uhurni gabe ianan ni Tonduy in.

c. Halani ai lang tarbahen marsidalian atap halani aha pe gabe lang mandalankon goluh na marhapansingon. Na rosuh mangkorjahon dosa ampa habutakon sasintongni lape talup isobut na porsaya. Ciri ni na porsaya aima anggo malas uhurni mangkorjahon horja na madear pori pe sipata ningon maruntol ia mangkorjahon ai. Mase? Halani na manggoki malas ni uhurni lang be perkara-perkara dunia tapi na tang manggoki malas ni uhurni aima haluahon na dob ipasirsir Tuhan Jesus na kekal ai do.

d. Domu hujin,  mangkorjahon na madear ampa hapansingon domma gabe biak banta sehingga lang be songon na tarpaksa mangkagoluhkon hapansingon ai. Kesetiaanta mangkagoluhkon hapansingon ai lang boi kabur pori pe aha na masa. Situasi ampa keadaan boi do marubah tapi biak atau jati dirinta sebagai na dob ipapansing lang boi marubah pori pe aha na masa.

e. Halani lang be dunia on simada hita tapi domma Kristus. Halani ai ningon rosuh ni Kristus  ma na gabe rosuhta, ulang sebalikni gabe ipaksahon hita rosuhta gabe rosuh ni Kristus. Ulang terjadi kekaburan identitas ni haporsayaon halani berbagai keinginan ampa sura-sura parduniaon on.

f. Haleluya No. 353 : 1 – 3

pdt.jeddy s